Koronavırýspen aýyrǵan úndistandyq azamat týystaryna aýrýyn juqtyrmas úshin ózin oqshaýlap, 11 kún boıy taldyń basynda otyrǵan, dep habarlaıdy «Adyrna» ulttyq portaly The Print saıtyna silteme jasap.
Úndistannyń Telangana shtatynda turatyn Ramavat Shıva Naık esimdi stýdent koronavırýs juqtyrǵan. Alaıda ol aýrýhanadaǵy adamdardyń kóptigine baılanysty aýrýhanadan oryn taba almaǵan. Onyń otbasy kishkentaı bir bólmeli úıde turady eken. Sondyqtan ol aǵash basyna shyǵyp, ózin oqshaýlaǵan. Ol úshin aǵashtyń basy jalǵyz ǵana qaýipsiz oryn bolǵan. Stýdent bambýktan kishigirim platforma jasap, aǵash basyna ornalastyrǵan. Ústine kórpe tósep, sonda túnegen. Ata-anasy ulyna arqandaǵy shelektiń kómegimen tamaq pen sý bergen. Shıva taldyń basynda ýaqytynyń kóp bóligin telefon qaraýmen ótkizgen.
Bul oqıǵa buqaralyq aqparat quraldarynda jarııalanǵanda, jergilikti bılik jigitke aýylynyń janyndaǵy jataqhanadan oryn beripti. Sodan keıin ol karantınniń birneshe kúnin jaıly jerde ótkizgen.
Qıyn jaǵdaıdan shyǵýdyń jolyn izdegen úndistandyqtar sońǵy kezdegi eldegi jaǵdaıǵa baılanysty ózderin oqshaýlaý úshin jýyný bólmelerin nemese ýaqytsha oryndardy panalaǵan.
Aıta ketý kerek, sońǵy aptalarda Úndistanda táýligine júz myńdaǵan adam koronavırýs juqtyryp, eldegi epıdemıologııalyq ahýal kúrt nasharlaǵan.
Halyqaralyq kómekke qaramastan, mundaǵy aýrýhanalarda naýqastarǵa tósek-oryn jáne ottegi jetispeı, máıitter kóshede órtenip jatyr.
"Adyrna" ulttyq portaly
