زەينەتاقى مەن جاردەماقى وسەدى، تىركەلمەگەن تەلەفوندار بۇعاتتالادى

مەديتسينالىق ساقتاندىرۋ

1 شىلدەدەن باستاپ جۇمىس بەرۋشىلەر الەۋمەتتىك مەديتسينالىق ساقتاندىرۋ قورىنا العاشقى جارنا اۋدارا باستايدى. 2018 جىلعى 1 قاڭتاردان باستاپ مەملەكەت، 2019 جىلعى 1 قاڭتاردان باستاپ جالدامالى جۇمىسشىلار تولەم جاسايدى.

1 شىلدەدەن باستاپ جۇمىس بەرۋشىلەر ءاربىر قىزمەتكەردىڭ تابىسىنان 1%، 2018 جىلعى 1 قاڭتاردان 1,5%، 2020 جىلعى 1 قاڭتاردان 2%، 2022 جىلعى 1 قاڭتاردان باستاپ 3% تولەۋى ءتيىس.

جەكە كاسىپكەرلەر 1 شىلدەدەن باستاپ ەڭ تومەنگى ەكى جالاقى مولشەرىنەن 5% (2017 جىلى ەڭ تومەنگى جالاقى 24 459 تەڭگە), ياعني 2 445,9 تەڭگە تولەيدى.

جالدامالى قىزمەتكەرلەر 2019 جىلعى 1 قاڭتاردان باستاپ تابىسىنىڭ 1%-ىن، 2020 جىلعى 1 قاڭتاردان 2%-ىن اۋدارۋى قاجەت. 2022 جىلدان باستاپ الەۋمەتتىك مەديتسينالىق ساقتاندىرۋ قورىنا تۇسەتىن جۇمىس بەرۋشى مەن قىزمەتكەردىڭ جيىنتىق جارناسى تابىستىڭ 5%-ىن قۇرايتىن بولادى.

زەينەتاقى مەن جاردەماقى وسەدى

1 شىلدەدەن باستاپ زەينەتاقى مەن بالا تۋعاندا بەرىلەتىن بىرجولعى جاردەماقى وسەدى.

2017-2018 جىلدارى زەينەتاقى 3 كەزەڭدە ارتتىرىلاتىن بولادى. ءبىرىنشى كەزەڭدە، ياعني، 2017 جىلعى ءبىرىنشى قاڭتاردان باستاپ ىنتىماقتى زەينەتاقىلار مولشەرى توعىز پايىزعا، بازالىق زەينەتاقى جەتى پايىزعا ارتتى. ال ەكىنشى كەزەڭدە، 2017 جىلعى ءبىرىنشى شىلدەدەن باستاپ ىنتىماقتى زەينەتاقى مولشەرى قوسىمشا 11 پايىزعا، ال بازالىق زەينەتاقى مولشەرى 13 پايىزعا وسەدى.

ناتيجەسىندە 2017 جىلعى ءبىرىنشى شىلدەدەن باستاپ زەينەتاقىنى 2016 جىلعى زەينەتاقى مولشەرىمەن سالىستىرعاندا 20 پايىزعا ارتتىرۋ قامتاماسىز ەتىلمەك. ياعني، ەڭ تومەنگى زەينەتاقى 45 711 تەڭگە، ورتاشا زەينەتاقى 66 676 تەڭگەگە دەيىن ارتتىرىلاتىن بولادى. بۇل ءوسىم بارلىق ەكى ميلليوننان استام زەينەتكەرلەردى قامتيدى.

سونىمەن قاتار، 2017 جىلعى ءبىرىنشى شىلدەدەن باستاپ زەينەتاقى تاعايىنداۋ ءۇشىن ەسەپكە الىناتىن تابىستىڭ ەڭ جوعارى مولشەرىن 41 ايلىق ەسەپتىك كورسەتكىشتەن 46 ايلىق ەسەپتىك كورسەتكىشكە دەيىن ارتتىرۋ كوزدەلگەن.

زەينەتاقىنى ارتتىرۋدىڭ ءۇشىنشى كەزەڭى 2018 جىلعى ءبىرىنشى شىلدەدەن باستاپ جۇرگىزىلەتىن بولادى. بۇل بازالىق زەينەتاقىنى تاعايىنداۋ ادىستەمەسىنىڭ وزگەرۋىمەن بايلانىستى.

بۇدان بولەك، 2017 جىلعى 1 شىلدەدەن باستاپ بالا تۋعاندا بەرىلەتىن بىرجولعى جاردەماقىنىڭ مولشەرىن 20%-عا ءوسىرۋ كوزدەلگەن.

جالپى، زەينەتاقى مەن اتالعان جاردەماقىنى وسىرۋگە رەسپۋبليكالىق بيۋدجەتتەن 81,6 ملرد تەڭگە قاراستىرىلعان.

تىركەلمەگەن تەلەفونداردى بۇعاتتاۋ

قازاقستاندا قابىلدانعان ەكسترەميزم مەن تەرروريزمگە قارسى كۇرەس زاڭىنا سايكەس ەلدە  IMEI كودتارىنىڭ بىرىڭعاي دەرەكتەر بازاسىن قۇرۋ قاراستىرىلعان.

بۇل بازا ۇيالى تەلەفونداردىڭ يەلەرى تۋرالى اقپاراتتى تارتىپكە كەلتىرۋدى جانە ولاردى قىلمىس كەزىندە پايدالانۋعا كەدەرگى جاساۋدى كوزدەيدى.

اقپارات جانە كوممۋنيكاتسيالار ءمينيسترى داۋرەن اباەۆتىڭ مالىمدەۋىنشە، جۇيەنىڭ ىسكە قوسىلۋى تەلەفون ۇرلىعىنىڭ سانىن ازايتۋى ءتيىس. زارداپ شەككەن ادام پوليتسياعا بارعاننان كەيىن ۇرلانعان تەلەفون بۇعاتتالادى. وسىلايشا، تەلەفون ۇرلاۋدىڭ ەشقانداي ءمانى بولماي قالادى، دەپ ايتقان ەدى ول.

وزگەرىستەرگە سايكەس، ۇيالى بايلانىس وپەراتورلارى 1 شىلدەدەن باستاپ IMEI-كودى بازاسىندا تىركەلمەگەن تەلەفونداردى بۇعاتتاۋعا مىندەتتى. ابونەنتتىك قۇرىلعىلاردىڭ IMEI-كودتارىن تىركەۋ تەلەفولن ۇيالى بايلانىس وپەراتورىنىڭ جەلىسىنە قوسىلعان كەزدە وپەراتورلاردىڭ دەرەكتەر بازاسىندا اۆتوماتتى تۇردە جۇرگىزىلەتىن بولادى.

ەلەكتروندى ۇكىمەتتەگى جاڭاشىلدىقتار

1 شىلدەدەن باستاپ مەملەكەتتىك قىزمەتتەر كورسەتۋ جەڭىلدەتىلمەك. ەندى ەلەكتروندى ۇكىمەت پورتالىندا 20 مەملەكەتتىك قىزمەتتى ەلەكتروندىق تسيفرلىق قولتاڭباسىز الۋعا بولادى. ءبىر رەتتىك پارول ارقىلى 20 قىزمەتتىڭ 15-ءى قولجەتىمدى، قالعان بەس قىزمەت ءۇشىن تەك پورتالدا اۆتوريزاتسيادان ءوتۋ كەرەك.

ءبىر رەتتىك پارول ارقىلى مۇلىك تۋرالى، جەكە تۇلعالاردىڭ جىلجىمايتىن مۇلىك ءۇشىن تىركەلگەن نەمەسە توقتاتىلعان قۇقىقتارى جونىندە انىقتاما، جىلجيتىن مۇلىككە كەپىلدى تىركەۋ تىزىلىمىنەن كوشىرمە الۋ، جىلجىمايتىن مۇلىك نىسانىنىڭ تەحنيكالىق پاسپورتىن الۋ، ازاماتتىق احۋال اكتىسىن تىركەۋ نەمەسە ەكىنشى قايتارا كۋالىك الۋ مۇمكىندىگى بار.

ءبىر رەتتىك پارول – سۇراۋدان كەيىن تەلەفونعا جىبەرىلەتىن sms-حابارلاما. تەلەفونعا كەلەتىن تەكسەرۋ كودىنان كەيىن ونى eGov.kz سايتىنا ەنگىزۋ كەرەك.

eGov.kz سايتىنداعى اۆتوريزاتسيا ارقىلى قازاقستاندىقتار ۇيىنە دارىگەر شاقىرا الادى، دارىگەرگە قابىلداۋعا جازىلادى، مەديتسينالىق ۇيىمعا ەلەكتروندىق تسيفرلىق قولتاڭباسىز تىركەلەدى.

سونىمەن بىرگە اسكەري قىزمەتتە بولعانى جونىندە انىقتاما، جەڭىلدىكتەر قاراستىرىلعان سوعىس ارداگەرلەرى، چەرنوبىل اپاتى زاردابىن جويۋشىلاردىڭ انىقتاماسى قولجەتىمدى بولماق.