گرۋزيادا قازا تاپقان قازاقستاندىق قىزدىڭ اناسى ايسۇلۋ ايتباەۆا گرۋزين جۋرناليستەرگە قىزى اسەل ايتباەۆانىڭ ولىمىنە قاتىستى جاڭا مالىمەت ايتتى، دەپ حابارلايدى «ادىرنا» ۇلتتىق پورتالى Tengrinews.kz سايتىنا سىلتەمە جاساپ.
ايەلدىڭ ايتۋىنشا، ول سوڭعى رەت اسەلدىڭ ولىمىنە دەيىن قىزىمەن ەكى ساعات بۇرىن سويلەسكەن. اناسىنىڭ ايتۋىنشا، قىزى ودان قوناققا كەلۋىن سۇراعان. كەيىن اسەل ايتباەۆا قايتىس بولعانىن بىلگەن سوڭ، ول گرۋزياعا ءمايىتتى تانۋ ءۇشىن ۇشىپ بارعان.
«قيىن كۇن بولدى، بالامدى انىقتاۋعا باردىم. ءيا، شىنىمەن ول بولىپ شىقتى. مەن ءبارىبىر ونى ءولتىردى دەگەن ويدامىن. اۋديوقوڭىراۋعا سۇيەنىپ وتىرمىن، وندا ءبارى بار. بۇل سۋيتسيد ەمەس. ماعان اسەلدى يتەرىپ جىبەرگەن ءساتتى كورشىلەر ۆيدەوعا ءتۇسىرىپ العانىن ايتتى. ول ادام بولسا، پوليتسيا بولىمشەسىنە بارۋدى سۇرايمىن. بۇگىن كەشكە قىزىمنىڭ دەنەسىن قازاقستانعا الىپ كەتەمىن»، - دەدى ايسۇلۋ ايتباەۆا.
ول قىزىن بىرنەشە ەر ادام ءولتىردى دەپ كۇدىكتەنەتىنىن ايتتى. مارقۇمنىڭ اناسى ولاردىڭ ءبىرى قازاقستانعا قايتىپ ۇلگەرگەنىن اتاپ ءوتتى. وسىعان بايلانىستى ول ەكى ەلدىڭ بيلىگىنەن كۇدىكتىلەردىڭ ءبىرىن گرۋزياعا دەپورتاتسيالاۋعا كومەكتەسۋىن سۇرادى.
اسەل ايتباەۆانى جەرلەۋ ءراسىمى، تۋىستارىنىڭ ايتۋىنشا، بۇرسىگۇنى نۇر-سۇلتان ماڭىنداعى قابانباي باتىر اۋىلىندا وتەدى.
بۇعان دەيىن گرۋزيادا 26 جاستاعى قازاقستاندىق اسەل ايتباەۆا جۇمباق جاعدايدا قايتىس بولعانى حابارلانعان ەدى.
مارقۇمنىڭ اپكەسىنىڭ سوزىنشە، اسەل قايتىس بولارىنىڭ الدىندا قۇربىسىنا اۋديوحابارلاما جىبەرىپ ۇلگەرگەن. اۋديودا بەلگىسىز ەر ادام وعان قوقان-لوقى كورسەتىپ جاتقانى ەستىلەدى.
كەيىن گرۋزيا پروكۋراتۋراسى قىز قايتىس بولعانعا دەيىن زورلانعانىن مالىمدەدى. قىلمىس جاسادى دەگەن كۇدىكتى بەسيك توردۋا كەلەسى كۇنى ۇستالدى. ونىڭ كىناسى دالەلدەنسە، 8 جىلدان 10 جىلعا دەيىن باس بوستاندىعىنان ايىرىلۋى مۇمكىن.
سونىمەن قاتار گرۋزيالىق باق قازاقستاندىق قىزدى زورلاپ، ءوزىن-ءوزى ولتىرۋگە دەيىن جەتكىزگەن كۇدىكتىنىڭ سۋرەتىن جاريالادى. ول سوت باستالعانعا دەيىن قاماۋعا الىندى. ءىس بويىنشا الدىن الا تىڭداۋ 23 ماۋسىمدا وتەدى.
باق مالىمەتىنشە، قايتىس بولعان قىز گرۋزياعا ساۋىردە جۇمىسقا كەتكەن. الدىمەن ول رۋستاۆي قالاسىندا تۋىستارىمەن بىرگە تۇرعان، ال ەكى اپتا بۇرىن تبيليسيگە كوشكەن.
"ادىرنا" ۇلتتىق پورتالى
