قازاقستاندىقتار گوزال اينيتدينوۆا مەن جىبەك قۇلامباەۆا جۇپتىق سىندا مىسىر مەن تۋنيستە ITF تۋرنيرلەرىندە جەڭىمپاز اتاندى، دەپ حابارلايدى «ادىرنا» ءتىلشىسى. بۇل تۋرالى قتف ءباسپاسوز قىزمەتى مالىمدەدى.
گ.اينيتدينوۆا بەلارۋستىق اننا كۋبارەۆامەن بىرگە تۋنيستەگى جارىستا ۇزدىك شىقتى. قازاقستاندىق-بەلارۋستىق جۇپ جارتىلاي فينالدا رەسەيلىك داريا لوديكوۆا – بەلگيالىق ەليسسا ۆان لانگەندونكتى 6:4, 6:4 ەسەبىمەن تىزە بۇكتىردى. ال فينالدا وسى دودانىڭ 1-راكەتكالارى، ۇلىبريتانيالىق سارا بەت گرەي – امەريكالىق داشا يۆانوۆانى 7:5, 6:2 ەسەبىمەن ۇتتى. بۇل – گ.اينيتدينوۆانىڭ ITF تۋرنيرلەرىندەگى التىنشى تابىسى. سونىڭ ەكەۋىندە جەكەلەي، تورتەۋىندە جۇپتىق سىندا چەمپيوندىق اتاققا قول جەتكىزدى.
ج.قۇلامباەۆا رۋمىنيالىق وانا گاۆريلامەن بىرگە مىسىر استاناسى كايردە جارتىلاي فينالدا رەسەيلىكتەر ەلينا اۆانەسيان – ەكاتەرينا ۆيشنەۆسكايانى جولدان تايدىردى – 7:6, 6:4. سوڭعى باسەكەدە مىسىرلىق ياسمين ەززات – امەريكالىق كلەرۆي نگونوۋنيگە ەش امال قالدىرمادى – 6:4, 6:0. بۇل – ج. قۇلامباەۆانىڭ ITF دودالارىنداعى توعىزىنشى تيتۋلى.
سونىڭ سەگىزىندە جۇپتىق سىندا جەڭىسكە جەتسە، بيىل ءۇشىنشى رەت ۇزدىك شىعىپ وتىر. سونىمەن قاتار «قازاقمىس» تەننيس كلۋبىنىڭ تۇلەگى ىڭكار دۇيسەباي تيرانا (البانيا) قالاسىندا وتكەن Tennis Europe National Sport Park Open U16 ءتۋرنيرىنىڭ فينالىنا دەيىن جەتتى. فينالدىق سايىستا ىڭكار ۋكراينالىق اناستاسيا فيرمانعا 5:7, 2:6 ەسەبىمەن ەسە جىبەردى.
«ادىرنا» ۇلتتىق پورتالى
