قازاقستان سىرتقى ىستەر مينيسترلىگى مولدوۆا اۋماعىنداعى كوكوچەنى حۋتورى (قازىرگى ۆوينەسكۋ) ءۇشىن فاشيستىك باسقىنشىلارمەن بولعان قيان-كەسكى شايقاستاردا 1944 جىلى قازا تاپقان قازاقستاندىق جاۋىنگەر يۆان چەرەدنيكتىڭ سۇيەگى مەن جاۋىنگەرلىك ناگرادالارىن سولتۇستىك قازاقستان وبلىسىنىڭ اكىمدىگى مەن قورعانىس ىستەرى جونىندەگى دەپارتامەنتىنىڭ وكىلدەرىنە رەسمي تۇردە تابىس ەتتى، دەپ حابارلايدى «ادىرنا» ءتىلشىسى مينيسترلىكتىڭ ءباسپاسوز قىزمەتىنە سىلتەمە جاساپ.
وسى جىلدىڭ اقپان ايىندا حىنچەشت اۋدانىنىڭ ۆوينەسكۋ اۋىلىنىڭ ماڭىندا مولدوۆالىق ىزدەۋشىلەر كەڭەس ساربازدارىنىڭ باۋىرلاس اسكەري زيراتىن تاۋىپ، ولاردىڭ اراسىندا جەرلەسىمىز، پۋلەمەتشىلەر توبىنىڭ كومانديرى، گۆارديا كىشى سەرجانتى يۆان چەرەدنيكتىڭ جەكە باسى انىقتالدى.
مولدوۆا رەسپۋبليكاسىنىڭ قورعانىس مينيسترلىگى مەن «پوبەدا» ۇلتتىق ۇيلەستىرۋ كوميتەتى كيشينەۆ قالاسىنداعى «ماڭگىلىك» مەموريالدىق كەشەنىندەگى «بەلگىسىز سولداتتىڭ» قابىرىندە قۇرمەت قاراۋىلى روتاسىنىڭ قاتىسۋىمەن وعان ءتيىستى اسكەري قۇرمەت كورسەتۋ بويىنشا رەسمي ءراسىم وتكىزدى.
جەڭىس كۇنىن مەرەكەلەۋ قارساڭىندا قازاقستاننىڭ مولدوۆاداعى ەلشىلىگى پاۆلودارلىق «مايدان جولى» ىزدەستىرۋ-زەرتتەۋ جاساعىمەن بىرلەسە وتىرىپ، جاۋىنگەردىڭ سۇيەكتەرىن تۋعان قازاقستاندىق جەرگە جەتكىزۋدى ۇيىمداستىردى.
«ادىرنا» ۇلتتىق پورتالى
