لاۆروۆ: قازاقستاننىڭ اۋماقتىق تۇتاستىعىن تولىقتاي قولدايمىز

3764
Adyrna.kz Telegram

رەسەيلىك ساياساتكەرلەر قازاقستاننىڭ اۋماقتىق تۇتاستىعى تۋرالى ارانداتۋشىلىق مالىمدەمەلەر جاساي وتىرىپ وزدەرىنە نازار اۋدارۋعا تىرىسىپ جاتىر. رەسەيدىڭ قازاقستانعا قاتىستى ساياساتىن انىقتايتىندار مۇنداي ءسوزدى ەشقاشان ايتپاعان، ايتپايدى دا. بۇل تۋرالى رەسەي ءسىم باسشىسى سەرگەي لاۆروۆ مالىمدەدى، - دەپ حابارلايدى Tengrinews.kz سايتى "حابار" اگەنتتىگىنە سىلتەمە جاساپ. 

بۇل تۋرالى لاۆروۆ رەسەي ساياساتكەرلەرىنىڭ قازاقستانعا قاتىستى داۋلى مالىمدەمەلەرىنە پىكىر بىلدىرگەندە ايتتى.

"ساياساتكەرلەر ءوز كارەراسىن ءارتۇرلى جولمەن قۇرادى. سەنساتسيا ىزدەيتىن ساياساتكەرلەر بار. وتە داۋلى بولىپ كورىنەتىن سۇراقتاردى قوزعاسا، جۇمساق ايتسام، ولاردى ۇمىتىپ كەتپەۋى ءۇشىن ادامداردىڭ نازارى اۋادى دەپ ويلايتىن ساياساتكەرلەر دە بار. بىزدە قالاي ايتاتىنىن بىلەسىز بە: "جاقسى ما، جامان با ماڭىزدى ەمەس، ەڭ باستىسى - سەن تۋرالى گازەتتەردە جازسا بولعانى". مۇمكىن وسىدان شىعار.

بىراق رەسەي فەدەراتسياسىنىڭ قازاقستانعا قاتىستى ساياساتىن ايقىندايتىن تۇلعالاردان ەشقانداي مالىمدەمەلەر، ءبىزدىڭ وداقتاستىعىمىزدى قالاي دامىتاتىنىمىز تۋرالى ۋاعدالاستىقتاردىڭ كەز كەلگەنىنە وسى تۇلعالاردان قانداي دا ءبىر كۇمان كەلتىرەتىن ەشقانداي مالىمدەمەلەر ەشقاشان ايتىلمادى، ايتىلمايدى دا. بۇل كەلىسىمدەر ءبىر-ءبىرىمىزدىڭ ەگەمەندىگىمىزدى، اۋماقتىق تۇتاستىعىمىزدى، ساياسي تاۋەلسىزدىگىمىزدى تولىق قۇرمەتتەيتىنىمىزدىڭ بەلگىسى. ءبىز مەملەكەت باسشىلارى كەلىسكەن جانە قول قويعان، پارلامەنتتەر ماقۇلداعان جانە زاڭ سانالاتىن، حالىقارالىق قۇقىقتىڭ بولىگى بولىپ تابىلاتىن قۇجاتتار نەگىزىندە وداقتاستىق قاتىناستاردى دامىتامىز", - دەدى لاۆروۆ.

رەسەي ءسىم باسشىسى ساياساتكەرلەردىڭ، كەيبىر پارلامەنتشىلەردىڭ مۇنداي كۇماندى، كەيدە ارانداتۋشىلىق مالىمدەمەلەرى دەموكراتيالىق ءومىردىڭ ءسوزسىز بولىگى ەكەنىن ايتتى.

"ەڭ باستىسى، حالىقتارىمىز اراسىنداعى قالىپتى قارىم-قاتىناستى نىعايتپايتىن مالىمدەمەلەر پىكىرتالاس كلۋبتارىندا قالۋى ءتيىس", - دەپ ءتۇسىندىردى ول.

بۇعان دەيىن رەسەي مەملەكەتتىك دۋماسىنىڭ ءبىلىم جانە عىلىم كوميتەتىنىڭ توراعاسى ۆياچەسلاۆ نيكونوۆ ء"بىرىنشى ارناداعى" "بولشايا يگرا" باعدارلاماسىندا "قازاقستان بولعان جوق، سولتۇستىك قازاقستان مۇلدە قونىستانباعان. ولار (قازاقتار. - ەسكەرت.) الدەقايدا وڭتۇستىكتە بولعان. جانە، شىن مانىندە، قازاقستان اۋماعى - بۇل رەسەي مەن كەڭەس وداعىنىڭ ۇلكەن سىيى" دەپ مالىمدەگەن. قازاقستاندا رەسەيلىك دەپۋتاتتىڭ مالىمدەمەسى ۇلكەن قوعامدىق رەزونانس تۋدىردى.

نيكونوۆتىڭ ءوزى داۋلى سوزىنە تۇسىنىكتەمە بەردى.

"قازاقستان رەسپۋبليكاسىنىڭ شەكاراسىنا اينالعان قازاق كسر شەكارالارىن ايقىنداۋ كەزىندە قازاقستاننىڭ مۇددەلەرى تولىق كولەمدە ساقتالدى دەپ ويلايمىن. بۇل تۋرالى "بولشايا يگرا" باعدارلاماسىندا وسىنى ايتپاق بولدىم. وسى مۇمكىندىكتى پايدالانىپ، باۋىرلاس قازاقستان حالقىنا دەگەن ەڭ جىلى سەزىمدەرىمدى تاعى دا بىلدىرەمىن", - دەپ جازدى نيكونوۆ تەلەگرام-كانالىندا.

پىكىرلەر