يندونەزيا تۇرعىنى تۋعان ۇلىنا ەرەكشە ەسىم بەرىپ، الەم نازارىنا ىلىكتى. ول ۇلىن سۇيىكتى جۇمىسىنىڭ قۇرمەتىنە «اقپاراتتىق كوممۋنيكاتسيالاردىڭ ستاتيستيكالىق باسقارماسى» دەپ اتاعان، دەپ حابارلايدى «ادىرنا» ۇلتتىق پورتالى nege.kz سايتىنا سىلتەمە جاساپ.
ونىڭ اكەسى - سامەت ۆاحيۋدي ەسىمدى يندونەزيا تۇرعىنى بولىپ شىقتى. سامەت ءوز جۇمىسىن قاتتى جاقسى كورەتىنى سونشالىق، بالاسىنا جۇمىسىنىڭ اتاۋىن ەسىم رەتىندە بەرۋدى ۇيعارعان. سامەتتىڭ ايەلى كۇيەۋىنىڭ بۇل ويى تۋرالى ءاۋ باستان ءبىلىپ كەلگەن ەكەن. الايدا ونىڭ شەشىمىنە كونۋدەن باسقا امالى بولماپتى.
ولاردىڭ تۇڭعىشى قىز بالا بولعاسىن، سامەت وعاش ەسىمدى وعان بەرە الماعان. الايدا ەكىنشىسى ۇل بالا بولعان ساتتە سامەت بىردەن ءوز ويىن جۇزەگە اسىرىپ، بالاسىن «اقپاراتتىق كوممۋنيكاتسيالاردىڭ ستاتيستيكالىق باسقارماسى» دەپ اتايدى. نارەستە دۇنيەگە كەلە سالىسىمەن، ەسىمىنىڭ ارقاسىندا جەرگىلىكتى تۇرعىندار اراسىندا ەرەكشە تانىمالدىققا يە بولعان. بۇقارالىق اقپارات قۇرالدارى ءسابي تۋرالى جارىسا جازۋدا. كوپشىلىك نارەستەنى دينكو دەگەن قىسقا ەسىممەن اتاۋدى ادەتكە اينالدىرعان ەكەن.
دەسە دە سامەت ۇلى ەرجەتكەندە ءوز ەسىمىن ماقتان تۇتاتىنىنا سەنىمدى. ال جەلى قولدانۋشىلارى بولسا، ەر ادامنىڭ بۇل شەشىمىن قۇپتاي قويمادى. ولار بالاسى وسسە اكەسىن مۇنداي ەسىم بەرگەنى ءۇشىن سوتقا بەرۋى ىقتيمال دەگەن بولجامدارىن العا تارتتى.
"ادىرنا" ۇلتتىق پورتالى
(فوتو ren.tv سايتىنان)
