ەلىمىزدە ءبىر ميلليوننان استام ادامنىڭ كولىك سالىعى بويىنشا قارىزى 30,7 ميلليارد تەڭگەنى قۇرايدى. قارىزدىڭ ەڭ ۇلكەن سوماسى الماتى قالاسىنا تيەسىلى. بۇل تۋرالى قارجى مينيسترلىگى مەملەكەتتىك كىرىستەر كوميتەتى حابارلادى.
«جالپى رەسپۋبليكا بويىنشا 1 ميلليوننان استام ادامنىڭ مەملەكەت الدىندا قارىزى 30,7 ميلليارد تەڭگەنى قۇرايدى. ونىڭ ىشىندە 26,8 ميلليارد تەڭگە – قارىزدىڭ نەگىزگى سوماسى، قالعان 3,8 ميلليارد تەڭگە ءوسىمپۇل ەسەپتەلگەن»، - دەلىنگەن حابارلامادا.
حابارلامادا بەرەشەكتىڭ ەڭ ۇلكەن سوماسى الماتى قالاسىندا تىركەلگەنى دە ايتىلعان. الماتى قالاسىنىڭ تۇرعىندارى 6,1 ميلليارد تەڭگە سالىق تولەمەگەن. ەكىنشى ورىنعا الماتى وبلىسى ورنالاستى. بۇل ءوڭىردىڭ كولىك يەلەرى 4,8 ميلليارد تەڭگە قارىز بولىپ شىقتى. ال نۇر-سۇلتان قالاسى قارىز مولشەرى بويىنشا العاشقى ۇشتىكتى اياقتايدى. بۇل قالانىڭ جۇرگىزۋشىلەرى مەملەكەتكە 3 ميلليارد تەڭگە بەرۋى كەرەك.
بورىشكەرلەر سانى بويىنشا انتيرەيتينگتى الماتى وبلىسى باستاپ تۇر: 165 مىڭنان اسا ادام سالىق مىندەتتەمەلەرىن ورىنداماعان. ەكىنشى ورىندا - الماتى قالاسى. وندا بورىشكەرلەر سانى 107 مىڭنان اسادى. العاشقى ۇشتىكتى تۇركىستان وبلىسى اياقتادى: 104 مىڭ ادام.
"ادىرنا" ۇلتتىق پورتالى
