Elimizde bir mıllıonnan astam adamnyń kólik salyǵy boıynsha qaryzy 30,7 mıllıard teńgeni quraıdy. Qaryzdyń eń úlken somasy Almaty qalasyna tıesili. Bul týraly qarjy mınıstrligi memlekettik kirister komıteti habarlady.
«Jalpy respýblıka boıynsha 1 mıllıonnan astam adamnyń memleket aldynda qaryzy 30,7 mıllıard teńgeni quraıdy. Onyń ishinde 26,8 mıllıard teńge – qaryzdyń negizgi somasy, qalǵan 3,8 mıllıard teńge ósimpul eseptelgen», - delingen habarlamada.
Habarlamada bereshektiń eń úlken somasy Almaty qalasynda tirkelgeni de aıtylǵan. Almaty qalasynyń turǵyndary 6,1 mıllıard teńge salyq tólemegen. Ekinshi orynǵa Almaty oblysy ornalasty. Bul óńirdiń kólik ıeleri 4,8 mıllıard teńge qaryz bolyp shyqty. Al Nur-Sultan qalasy qaryz mólsheri boıynsha alǵashqy úshtikti aıaqtaıdy. Bul qalanyń júrgizýshileri memleketke 3 mıllıard teńge berýi kerek.
Boryshkerler sany boıynsha antıreıtıngti Almaty oblysy bastap tur: 165 myńnan asa adam salyq mindettemelerin oryndamaǵan. Ekinshi orynda - Almaty qalasy. Onda boryshkerler sany 107 myńnan asady. Alǵashqy úshtikti Túrkistan oblysy aıaqtady: 104 myń adam.
"Adyrna" ulttyq portaly
