الماتىداعى NIS وقۋشىسى دانيال سۋلتانوۆتى «جاساندى ينتەللەكت» ۇتب ارنايى بەيىنىندەگى جەڭىسى ءۇشىن سبەربانك پرەزيدەنتى گەرمان گرەف قۇتتىقتادى

4980
Adyrna.kz Telegram

الماتى قالاسىنداعى حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ وقۋشىسى دانيال سۋلتانوۆ رەسەي فەدەراتسياسى، ۇلتتىق تەحنولوگيالىق باستامالار (ۇتب) ۇيىرمە قوزعالىسى حالىقارالىق وليمپياداسىنىڭ جەڭىمپازى اتاندى. «جاساندى ينتەللەكت» ارنايى پروفيلىندە دانيال ۇزدىك شەتەلدىك جوبا ءۇشىن «حالىقتار دوستىعى» نوميناتسياسىندا ءبىرىنشى ورىن الدى.

وليمپيادانى ۇيىمداستىرۋشىلاردىڭ قاتارىندا – ۇيىرمە قوزعالىسى جانە ۇتب «پلاتفورماسى»، رەسەيدىڭ عىلىم جانە جوعارى ءبىلىم، وقۋ-اعارتۋ مينيسترلىكتەرىمەن بىرلەسكەن ستراتەگيالىق باستامالار اگەنتتىگى جانە رەسەيلىك ۆەنچۋرلىق كومپانيا بار. جابىلۋ سالتاناتى مەن جەڭىمپازداردى ماراپاتتاۋ ماسكەۋدە ءوتتى، جاساندى ينتەللەكت سالاسىنداعى ۇزدىك وقۋشىلاردى سبەربانك پرەزيدەنتى، باسقارما توراعاسى گەرمان گرەف قۇتتىقتادى:

– بەس جىل بۇرىن AI تاقىرىبىندا سويلەگەن كەزدە ءشول دالاداعى جاڭعىرىق سەكىلدى ەستىلەتىن، ال بۇگىن AI — بۇل «ەلەكتر»، ول قايتا ورلەۋ، جاندانۋ كەزەڭىندە. بىراق عىلىم، زەرتتەۋ جانە پراكتيكالىق تۇرعىدان قولدانۋ بىردەي شامادا كەلە جاتىر. قىمباتتى بالالار، سىزدەر دۇرىس باعىتتا جانە دۇرىس جولدا كەلەسىزدەر، دۇرىس ۋاقىتتا جانە دۇرىس جەردە ءومىر سۇرۋدەسىزدەر. الىنعان تاجىريبە پايدالى بولارىنا سەنىمدىمىن.

الەمدەگى ەڭ بەدەلدى وليمپيادالاردىڭ بىرىندە بەس مىڭنان استام وقۋشى كەزدەستى، بايقاۋلار جاساندى ينتەللەكت پەن سۋ استى روبوتوتەحنيكاسىنان باستاپ گەنومدىق وڭدەۋ مەن VR تەحنولوگياسىنا دەيىن 28 تەحنولوگيالىق بەيىندە وتكىزىلدى. «اقپاراتتىق قاۋىپسىزدىك»، «جاساندى ينتەللەكت»، «بيزنەس پروتسەستەردى اۆتوماتتاندىرۋ» ەڭ تانىمال IT پروفيلدەر قاتارىندا بولدى. بيىل وليمپيادا جاڭا رەكورد ورناتتى – بارلىق ترەكتەر بويىنشا رەسەيدىڭ 85 ءوڭىرى مەن شەتەلدەردەن 110 000-نان استام بالا قاتىسۋعا ءوتىنىم بەردى.

– فينالدا قاتىسۋشىلار تەك تەحنولوگيالىق تاپسىرمالاردى عانا شەشىپ قويعان جوق – وقۋشىلار الدىندا جاساندى ينتەللەكت، روبوتوتەحنيكا، عارىش يندۋسترياسى سالاسىنداعى جەتەكشى كومپانيالاردا جۇمىس ىستەيتىن ماماندار اينالىساتىن جاڭا سىن- قاتەرلەر تۇردى. جوعارى سىنىپ وقۋشىلارى ەرەسەك ارىپتەستەرىنىڭ ويلارىنان اسىپ تۇسەتىن قىزىقتى شەشىمدەردى ۇسىنا ءبىلدى،  –  دەيدى ۇتب «جاس ماماندار» باعىتى ديرەكتورىنىڭ ورىنباسارى يۋليا حانجينا.

2021 جىلى فيناليستەر ەڭ كوپ سۇرانىسقا يە تەحنولوگيالارمەن بايلانىستى ماسەلەلەردى شەشتى: جاساندى ينتەللەكت، ماشينالىق وقىتۋ، كومپيۋتەرلىك كورۋ، ۆيرتۋالدى جانە كەڭەيتىلگەن شىندىق، گەنومدىق وڭدەۋ. بولىنگەن فورماتتاعى ينجەنەرلىك تاپسىرمامەن جۇمىس ىستەۋ ءۇشىن 2020 جىلى فينالدا سىنالعان بىرقاتار تەحنولوگيالار قولدانىلدى: مامانداندىرىلعان باعدارلامالىق جاساقتاما، سيمۋلياتورلار، كوماندالىق جۇمىس ءۇشىن جەكە بەينە جانە داۋىستىق ارنالار، سىناق الاڭدارىنان ترانسلياتسيالار. قورىتىندى سايىسقا جۇزدەن استام وقۋشى قاتىستى، ولاردىڭ الدىندا اقىل-ويدى ەسكەرەتىن الگوريتم قۇرۋ مىندەتى تۇردى. سوڭعى سىناق ءۇشىن قاتىسۋشىلارعا كريستوفاريدىڭ سۋپەركومپيۋتەرىنە قول جەتىمدىلىك بەرىلدى.

–  «بولاشاققا ۇلەس» سبەر قايىرىمدىلىق قورىمەن جانە جاساندى ينتەللەكت اكادەمياسىمەن بىرلەسىپ وتكىزىلەتىن «جاساندى ينتەللەكت» بەيىنىنىڭ فينالىندا ورىسشا ماتىندەردى ماشينالىق ءتۇسىنۋ سالاسىندا سەرپىلىس بولدى. وقۋشىلار ءبىر جىل بويى وسىنداي تاپسىرمامەن جۇمىس ىستەگەن رەسەيلىك data-science قوعامداستى قول جەتكىزە الماعان ناتيجەنى كورسەتتى، – دەيدى «ۇيىرمە قوزعالىسى» ۇتب جۇمىس توبىنىڭ جەتەكشىسى دميتري زەمتسوۆ.

– جاساندى ينتەللەكت جاي عانا ءبىزدىڭ بولاشاعىمىز ەمەس، ول بۇگىننىڭ وزىندە راسىمەن ەنگىزىلىپ جاتىر. سوندىقتان ءبىز ترەندتە بولۋعا جانە وقۋعا، ىزدەۋگە، سىناپ كورۋگە ءتيىسپىز، وليمپيادا بۇل تۇرعىدا مەن ءۇشىن جاقسى مەكتەپكە اينالدى، – دەپ دانيال ماراپاتتاۋ راسىمىنەن كەيىن اسەرىمەن ءبولىستى.

 

 

پىكىرلەر