نۇر-سۇلتاندا LRT جوباسىن ىسكە اسىرۋ كەزىندەگى اقشا جىمقىرۋ ءىسى بويىنشا سوت تەرگەۋى قايتا باستالدى. وتىرىس بارىسىندا قىلمىستىق ىستەر جونىندەگى مامانداندىرىلعان اۋدانارالىق سوتتىڭ سۋدياسى قاجىمۇحان مەكەمتاس سوتتالۋشىلاردىڭ تىيىم سالىنعان مۇلكىن ءتىزىپ شىقتى، - دەپ حابارلايدى "ادىرنا" ۇلتتىق پورتالى Tengrinews.kz-كە سىلتەمە جاساپ.
"سوت وسى قىلمىستىق ءىس بويىنشا تەرگەۋدى قىلمىستىق ءىس جۇرگىزۋ كودەكسىنىڭ 385-بابى نەگىزىندە سوت تەرگەۋىندە كومەسكى تۇستار مەن كۇمانداردى شەشۋ ءۇشىن قايتا باستاۋ تۋرالى قاۋلى شىعاردى. اتاپ ايتقاندا، قارالىپ جاتقان ىسكە بايلانىستى بىرقاتار جاعدايدى، قاماۋعا الىنعان مۇلىكتى انىقتاۋ ءۇشىن. جاعدايلاردى ناقتىلاۋ قاجەت. سوتتىڭ سوتتالۋشى ابدىحاميتوۆكە بىرنەشە سۇراعى پايدا بولدى", - دەدى سۋديا قاجىمۇحان مەكەمتاس وتىرىس بارىسىندا.
بۇل رەتتە سۋديا مۇلىك بويىنشا ماسەلەلەر بارلىق سوتتالۋشىعا قاتىستى ەكەنىن ءتۇسىندىردى. ونىڭ ايتۋىنشا، بۇرىنعى كاسىپكەر ءابدىحاميتوۆ پەن ونىڭ وتباسى مۇشەلەرىنە بىرنەشە كولىك پەن جىلجىمايتىن مۇلىك تىركەلگەن.
"نەگىزى بۇل ءۇيدى انام ءوز قاراجاتىنا ساتىپ العان. ونىڭ زاڭداستىرىلعان اقشاسى بار", - دەدى ءابدىحاميتوۆ.
وتىرىس بارىسىندا سوتتالۋشىنىڭ اناسىنا Bentley, S-كلاستى Mercedes ، گاز-33022, 2013 جىلعى ءتورت Toyota Hiace, كاماز جانە Toyota Camry اۆتوكولىگى تىركەلگەنى بەلگىلى بولدى.
ءابدىحاميتوۆ وتباسىنىڭ تىيىم سالىنعان مۇلكىنىڭ اراسىندا: ءابدىحاميتوۆتىڭ جۇبايىنا تىركەلگەن جەر ۋچاسكەسى مەن ەلوردانىڭ الماتى اۋدانىنداعى جەكە ءۇي، سونداي-اق بىرنەشە تۇراق ورنى، الماتى وبلىسىنىڭ ىنتىماق اۋىلىنداعى جەكە ءۇي بار.
سونداي-اق، بۇرىن ءابدىحاميتوۆ يەسى بولعان كومپانياعا ەكى اۆتوموبيل تىركەلگەن - Mercedes جانە Toyota Land Cruiser.
سۋديانىڭ مالىمەتىنشە، سوتتالۋشى تيمۋر قاساباەۆتىڭ مۇلكى اراسىندا 2011 جىلى ساتىپ الىنعان، جۇبايىنا تىركەلگەن Mitsubishi Pajero اۆتوكولىگى، سونداي-اق 145 500 تەڭگە بولعان.
سوتتالۋشى ۇلىقبەك اچيلوۆتىڭ مۇلكى اراسىندا تسەلينوگراد اۋدانىنداعى قوسشى كەنتىندە يپوتەكاعا ساتىپ الىنعان جەكە ۇيگە تىيىم سالىندى. قازىر بانك ءۇيدى تارتىپ الماق، سەبەبى 2,5 جىل قارىز تولەمەگەن. سونداي-اق، ودا 2006 جىلدىڭ ساۋىرىندە ساتىپ الىنعان Daimler جانە 2003 جىلى ساتىپ الىنعان Land Rover كولىگى بار. اچيلوۆتىڭ كارتوچكاسىندا 354 946 تەڭگە كولەمىندە جەكە قاراجات بولعان.
بۇرىنعى دەپۋتات پەن نۇر-سۇلتان ءماسليحاتىنىڭ حاتشىسى جانات نۇرپەيىسوۆتىڭ مۇلكى رەتىندە ەسىل اۋدانىنداعى پاتەر مەن ەكى تۇراق ورنىنا تىيىم سالىنعان. تۇرعىن ءۇي 2012 جىلى ساتىپ الىنىپ، ونىڭ اتىنا 2014 جىلى تىركەلگەن. سونداي-اق، ونىڭ ءبىر ميلليون تەڭگەدەن اسا جەكە قارجىسى بولعان.
نۇر-سۇلتان قالاسىنىڭ جولاۋشىلار كولىگى جانە اۆتوموبيل جولدارى باسقارماسىنىڭ بۇرىنعى باستىعى راشيد امانجولوۆتىڭ دا 2007 جىلى ەسىل اۋدانىنىنان ساتىپ الىنعان پاتەرى تىركەلگەن.
سوتتالۋشىلار قورعاۋشىلارى سوت قۇرامىنداعى سۋديا قاجىمۇحان مەكەمتاسقا قارسىلىق ءبىلدىردى. ءوتىنىش قابىلدانبادى.
نۇر-سۇلتاندا LRT سالۋ كەزىندەگى اقشا جىمقىرۋ ءىس بويىنشا سوت 2020 جىلدىڭ قازانىندا باستالعان. بۇعان دەيىن جەتى ادامعا ايىپ تاعىلعانى حابارلانعان بولاتىن. ولاردىڭ اراسىندا ەلوردانىڭ جولاۋشىلار كولىگى جانە اۆتوموبيل جولدارى باسقارماسىنىڭ بۇرىنعى باستىعى راشيد امانجولوۆ، نۇر-سۇلتان ءماسليحاتىنىڭ بۇرىنعى دەپۋتاتى جانە حاتشىسى جانات نۇرپەيىسوۆ، "Astana Innovations" اق باسقارماسىنىڭ بۇرىنعى توراعاسى تالعات ءاشىم، سونداي-اق ءتۇرلى كاسىپورىندار قىزمەتكەرى ۇلىقبەك اچيلوۆ، تيمۋر قاساباەۆ، دۋلات مۋسەنوۆ جانە داۋرەن ءابدىحاميتوۆ بولعان.
سىبايلاس جەمقورلىققا قارسى قىزمەت اقپاراتى بويىنشا، قىلمىستىق سحەمانى اكىمنىڭ ورىنباسارى سۇلتانبەكوۆ پەن "استانا LRT" باسشىسى اردان شەتەلدىك جانە قازاقستاندىق كومپانيالار كومەگىمەن ۇيىمداستىرعان. ەكەۋىنە دە حالىقارالىق ىزدەۋ جاريالانعان.
اردان 2014 جىلدان 2017 جىلعا دەيىن "استانا LRT" توراعاسى بولعان. سىبايلاس جەمقورلىققا قارسى ءىس-قيمىل اگەنتتىگىنىڭ مالىمەتى بويىنشا، ول ۇرلىق دەرەگى انىقتالعانعا دەيىن ەلدەن كەتىپ قالعان.
"ادىرنا" ۇلتتىق پورتالى
