ءۇندىستاندا كورونوۆيرۋسقا شالدىققاندارعا ارنالعان اۋرۋحانادا ءورت شىعىپ، جانساقتاۋ بولىمىندە جاتقان 13 ناۋقاس كوز جۇمدى. ەلدەگى احۋال قيىنداپ بارادى. سوڭعى تاۋلىكتە 314 مىڭ ادام قاۋىپتى ىندەتتىڭ ىلمەگىنە ىلىنگەن. بۇل جاھان جۇرتشىلىعىنىڭ اراسىنداعى رەكوردتىق ءوسىم بولىپ وتىر. اۋرۋحانالار لىق تولى، ال قايتىس بولعانداردىڭ دەنەلەرىن ورتەۋگە ۋاقىت تاپشى، دەپ حابارلايدى «استانا» تەلەارناسى.
ماحاراشترا شتاتىنداعى اۋرۋحانادا شىققان ءورت 3 ساعاتتا ارەڭ اۋىزدىقتالدى. وقيعانىڭ سەبەبى قازىر انىقتالىپ جاتىر. ال ناۋقاستار جاقىن ماڭداعى ەمدەۋ مەكەمەلەرىنە اۋىستىرىلدى.
«وكىنىشكە قاراي، ءبىزدىڭ اۋرۋحانادا تۇنگى 3 شاماسىندا الىپ ءورت شىقتى. كەنەتتەن كونديتسيونەردەن ۇشقىن پايدا بولىپ، ينتەنسيۆتى تەراپيا بولىمىندە وتتەگى جەتكىلىكتى بولعاندىقتان، بارلىعى 2 مينۋتتىڭ ىشىندە اياقتالدى.
ەلدە جاعداي ونسىز دا ۋشىعىپ تۇر. اسىرەسە سوڭعى كۇندەرى ۆيرۋس جۇقتىرۋ دەرەگى كوبەيگەن. ءبىر كۇندە 314 مىڭ ادام اۋرۋعا شالدىعىپ، الەمدىك انتيرەكورد ورنادى»، - دەيدى اۋرۋحانا قىزمەتكەرى ديليپ شاح.
ءبىر تاۋلىكتە 330 مىڭعا جۋىق ادام كوروناۆيرۋس جۇقتىرىپ، 2 جارىم مىڭعا جۋىق ناۋقاس قايتىس بولعان. ءۇندىستان مەديتسينالىق قاۋىمداستىعىنىڭ بۇرىنعى حاتشىسىنىڭ ايتۋىنشا، ەلدەگى بارلىق اۋرۋحانادا ناۋقاستار كوپ.
«8 ساۋىردە تاۋلىگىنە 16 000-عا جۋىق اۋرۋ تىركەلسە، بۇگىندە 324 000-نان استى. بۇل ايسبەرگتىڭ شىڭى عانا. تەكسەرىلمەگەن، راستالماعان نەمەسە سيمپتومسىز جاعدايلار كوپ. سوڭعى تاۋلىكتە 2 263 ادامنىڭ قايتىس بولعانى دا ءبىزدى الاڭداتىپ وتىر.
قازىر بارلىق اۋرۋحانالاردا ىعى-جىعى ناۋقاس. بىرنەشە كۇن بۇرىن ۇندىستانعا 500 توننا وتتەگى جەتكىزىلگەن. بىراق بۇل از. ويتكەنى اۋا جەتپەي دەمىككەندەرگە 700 توننا وتتەگى باللونى قاجەت. قيىن ساتتە كرەماتوريلار مەن مەكەمەلەردىڭ دە جۇمىسى ەسەلەندى. دارىگەرلەردىڭ ايتۋىنشا، ۆيرۋستىڭ العاشقى تولقىنىندا كۇنىنە 18 ءمايىت شىعارىلاتىن. قازىر تاۋلىگىنە 80 دەنە ورتەلەدى»، - دەيدى ءۇندىستان مەديتسينالىق قاۋىمداستىعىنىڭ بۇرىنعى حاتشىسى راۆي ماليك.
ال مەديتسينالىق ورتالىق باسشىسى كوروناۆيرۋستان قايتىس بولعان ناۋقاستاردى ورتەپ جاتقاندىقتارىن ايتتى. ولاردىڭ ايتۋىنا قاراعاندا، بۇرىن اۆتوتۇراق بولعان جەر قازىر مايىتتەردى ورتەيتىن ورىنعا اينالعان.
«ءبىز كۇندىزگى ساعات 16:00-دە 60-قا جۋىق دەنەنى ورتەدىك. سىرتتا تاعى 15 ءمايىت تۇر ورتەيتىن. مەن كۇندە كورىپ جۇرگەن سۇمدىقتى قۇداي ەشكىمگە كورسەتپەسىن دەپ تىلەيمىن. 5, 15, 25 جاستاعى بالالار مەن جاسوسپىرىمدەردى جاعىپ جاتىر. ەندى ۇيلەنگەن جۇبايلاردى دا ورتەپ جاتىرمىز. دەنەلەرى ورتكە ورانىپ جاتقان كوپ كىشكەنتاي بالالاردى كورگەندە جۇرەگىم قان جىلايدى. بۇرىن بۇل جەر اۆتوتۇراق بولعان، قازىر مايىتتەردى ورتەيتىن ورىنعا اينالدى»، - دەيدى مەديتسينالىق ورتالىق باسشىسى دجيتەندەر سينگح شۋنتي.
سونىمەن قاتار دجيتەندەر سينگح شۋنتي دەنەلەردىڭ كۇننەن كۇنگە كوبەيىپ جاتقاندىعىن ايتىپ ءوتتى. بۇلاي جالعاسا بەرسە، مايىتتەردى جولدا ورتەۋگە تۋرا كەلەتىندىگىن دە ەسكەرتتى.
«باسىندا 24 وت بولدى. بىرتە-بىرتە سانى 50-گە جەتتى. دەنەلەردىڭ كوپتىگى سونشالىق، بىزدە وتىن تاۋسىلۋعا جاقىن. ءبىز 30 توننا اعاش اكەلەمىز، ول تەز ارادا بىتەدى. سودان كەيىن تاعى 30-ىن اكەلەمىز، ول دا بىتەدى. جاعداي وتە ناشار، ەگەر وسىلاي جالعاسا بەرسە، 4-5 كۇندە مايىتتەردى جولدا ورتەۋگە تۋرا كەلەدى، باسقا امال جوق»، - دەيدى مەديتسينالىق ورتالىق باسشىسى دجيتەندەر سينگح شۋنتي.
ءۇندىستاندا ەكپە ەگۋ 16 قاڭتاردان باستالعان بولاتىن. وسى ۋاقىتقا دەيىن 30 ميلليون ادامعا ۆاكتسينا سالىندى. الايدا، حالىق سانى بويىنشا الەمدە 2-ورىندا تۇرعان مەملەكەت ءۇشىن بۇل وتە تومەن كورسەتكىش. بىراق ەلدەگى بازارلار مەن ساۋدا ورتالىقتارى 1 كۇنگە دە جابىلعان جوق.
سونداي-اق توي-تومالاق، ءدىني مەرەكەلەر توقتار ەمەس. ونان بولەك 1 ميلليوننان استام ادامنىڭ گانگ وزەنىندە جاپپاي شومىلۋ شاراسىنا قاتىسۋى ۋشىققان جاعدايدى ودان ءارى تىعىرىققا تىرەپ تۇر.
«ادىرنا» ۇلتتىق پورتالى
