بۇرىنعى مادەنيەت جانە سپورت ءمينيسترى، قر ۇلتتىق مۋزەيىنىڭ ديرەكتورى ارىستانبەك مۇحامەديۇلى مەنشىگىندەگى دۇنيەلەرگە قاتىستى ايتىلىپ جۇرگەن اڭگىمەلەرگە جاۋاپ بەردى، دەپ حابارلايدى "ادىرنا" ۇلتتىق پورتالى skifnews سايتىنا سىلتەمە جاساپ.
مۇحامەديۇلىنىڭ ايتۋىنشا، ەلورداداعى «ديپلومات» قوناق ءۇيى مەن «شاپاعات» بازارىندا، تاعى باسقا ورتالىقتاردا وتباسىنىڭ ۇلەسى بار.
«جۇبايىمنىڭ اتىندا The Family دەگەن كافە بار. مەن تۋرالى ۆيدەودا ايتىلعانداي 2000 ەمەس، 900 شارشى مەتر. وتكەن جىلى «قازاق ەنتسيكلوپەدياسىن» (باسپا ءۇيى) ساتىپ الدىق. ول ناقتى جۇبايىمنىڭ اتىندا. ەكى ۇلىمنىڭ اتىندا «Alem Education System» ءبىلىم ورتالىعى بار. قازىر كوللەدجدى دە الدىق. حالىقارالىق كوللەدجدىڭ نەگىزگى باعىتى – تۋريزم، مەيرامحانا ءىسى، اۋدارۋ ءىسى، اسپازدىق. تۋريزم سالاسىن ءوزىم بىرنەشە جىل باسقارعان سوڭ ويلاسام، بىزدە «سەرۆيس» جوق. سوندىقتان كوللەدج بەن قوناق ءۇيدى بىرىكتىرىپ جاتىرمىز. ءبىلىم سالاسىمەن اينالىساتىن كومپانياعا «AiDimZhan-CO» دەگەن ات قويدىق. ول مەنىڭ ءۇش بالامنىڭ اتى – ايجان، ديماش، جاندوس»، - دەدى ول Qasqa Jol Youtube-كانالىنا بەرگەن سۇحباتىندا.
سونداي-اق ول «ديپلومات» قوناق ءۇيى تۋرالى دا ايتتى.
«ديپلوماتتىڭ» 71%-ى مەنىڭ ەنەمنىڭ اتىندا. ونى ءبىز 2020 جىلى ساتىپ الدىق. ال، «Bali Spa» ورتالىعى «ديپلوماتتىڭ» ءبىر بولىگى. دەكلاراتسيا بار. مەن جاستايىمنان ەڭبەكقورمىن. استاناعا كوشىپ كەلگەندە 2000 جىلى ايەلىم ەكەۋمىز «ياكۋتسكيە بريلليانتى» دەگەن دۇكەن اشقانبىز. سەبەبى ونىڭ ۇلكەن اعاسى ياكۋتيادا تۇراتىن. Intercontinental قوناق ءۇيىنىڭ ىشىنەن ورىن جالعا الىپ، ءىس باستادىق. ءارى قاراي تاعى ءتۇرلى ۇسىنىستار بولدى. سوسىن گاز كومپانياسىمەن اينالىستىق (تاۋەكەل-ت جشس). قازىر باسقا دۇنيەلەر الۋ ءۇشىن ول كومپانيادان شىقتىق. ەگەر وسىنىڭ ءبارىن جاسىراتىن بولسام دۇنيەمدى وففشورعا تىعار ەدىم عوي»، - دەدى ول.
ەكس-مينيستر «شاپاعات» بازارى جايىنداعى اڭگىمەنىڭ راس ەكەنىن دە ايتىپ ءوتتى.
«ەلورداداعى «شاپاعات» بازارىن تۇڭعىش قىزىم ايجان مۇحامەديگە ۇسىنىس بولعان سوڭ، جاقىن ارالاسىپ جۇرگەن ازاماتتارمەن بىرگە الدىق. 45%-ى ايجانعا تيەسىلى. بيزنەس تۇرىندە ەمەس، دوستىق قارىم-قاتىناس بولسىن دەگەن ىرىممەن الىنعان دۇنيە عوي. بارلىعى بىلتىر الىنعان. مينيستر بولىپ جۇرگەندە الساق «بۇل قالاي» دەۋگە بولار ەدى. ايجان قىزىمدى بيىل تۇرمىسقا بەرىپ جاتىرمىز، قۋانىش بولىپ جاتىر. «شاپاعات» تا سىيلىقتىڭ ءبىرى»، - دەپ ايتتى ول.
ايتا كەتەتىن جايت، جاقىندا ول تۋرالى تاراعان ۆيدەودا كورسەتىلگەن كوكتوبەدەگى ساراي مەن يپپودروم ونىڭ وتباسىنا تيەسىلى ەمەس.
"ادىرنا" ۇلتتىق پورتالى
