Būrynǧy Mädeniet jäne sport ministrı, QR Ūlttyq muzeiınıŋ direktory Arystanbek Mūhamediūly menşıgındegı dünielerge qatysty aitylyp jürgen äŋgımelerge jauap berdı, dep habarlaidy "Adyrna" ūlttyq portaly skifnews saityna sılteme jasap.
Mūhamediūlynyŋ aituynşa, Elordadaǧy «Diplomat» qonaq üiı men «Şapaǧat» bazarynda, taǧy basqa ortalyqtarda otbasynyŋ ülesı bar.
«Jūbaiymnyŋ atynda The Family degen kafe bar. Men turaly videoda aitylǧandai 2000 emes, 900 şarşy metr. Ötken jyly «Qazaq ensiklopediiasyn» (baspa üiı) satyp aldyq. Ol naqty jūbaiymnyŋ atynda. Ekı ūlymnyŋ atynda «Alem Education System» bılım ortalyǧy bar. Qazır kolledjdı de aldyq. Halyqaralyq kolledjdıŋ negızgı baǧyty – turizm, meiramhana ısı, audaru ısı, aspazdyq. Turizm salasyn özım bırneşe jyl basqarǧan soŋ oilasam, bızde «servis» joq. Sondyqtan kolledj ben qonaq üidı bırıktırıp jatyrmyz. Bılım salasymen ainalysatyn kompaniiaǧa «AiDimZhan-CO» degen at qoidyq. Ol menıŋ üş balamnyŋ aty – Aijan, Dimaş, Jandos», - dedı ol Qasqa Jol Youtube-kanalyna bergen sūhbatynda.Sondai-aq ol «Diplomat» qonaq üiı turaly da aitty.
«Diplomattyŋ» 71%-y menıŋ enemnıŋ atynda. Ony bız 2020 jyly satyp aldyq. Al, «Bali Spa» ortalyǧy «Diplomattyŋ» bır bölıgı. Deklarasiia bar. Men jastaiymnan eŋbekqormyn. Astanaǧa köşıp kelgende 2000 jyly äielım ekeumız «Iаkutskie brillianty» degen düken aşqanbyz. Sebebı onyŋ ülken aǧasy Iаkutiiada tūratyn. Intercontinental qonaq üiınıŋ ışınen oryn jalǧa alyp, ıs bastadyq. Ärı qarai taǧy türlı ūsynystar boldy. Sosyn gaz kompaniiasymen ainalystyq (Tauekel-T JŞS). Qazır basqa dünieler alu üşın ol kompaniiadan şyqtyq. Eger osynyŋ bärın jasyratyn bolsam düniemdı offşorǧa tyǧar edım ǧoi», - dedı ol.Eks-ministr «Şapaǧat» bazary jaiyndaǧy äŋgımenıŋ ras ekenın de aityp öttı.
«Elordadaǧy «Şapaǧat» bazaryn tūŋǧyş qyzym Aijan Mūhamedige ūsynys bolǧan soŋ, jaqyn aralasyp jürgen azamattarmen bırge aldyq. 45%-y Aijanǧa tiesılı. Biznes türınde emes, dostyq qarym-qatynas bolsyn degen yrymmen alynǧan dünie ǧoi. Barlyǧy byltyr alynǧan. Ministr bolyp jürgende alsaq «būl qalai» deuge bolar edı. Aijan qyzymdy biyl tūrmysqa berıp jatyrmyz, quanyş bolyp jatyr. «Şapaǧat» ta syilyqtyŋ bırı», - dep aitty ol.Aita ketetın jait, jaqynda ol turaly taraǧan videoda körsetılgen Köktöbedegı sarai men ippodrom onyŋ otbasyna tiesılı emes. https://youtu.be/f2oyTumdi0k
"Adyrna" ūlttyq portaly
