قىزىلوردادا تۇزەۋ مەكەمەسىنە كەلگەن سالەمدەمەدەن، قولدان جاسالعان قۇرت ىشىنەن ەسىرتكى شىقتى، دەپ حابارلايدى "ادىرنا" ۇلتتىق پورتالى قازاقپارات سايتىنا سىلتەمە جاساپ.
بۇل وقيعا قىزىلوردا وبلىسى بويىنشا قىلمىستىق اتقارۋ جۇيەسى دەپارتامەنتىنە قاراستى زك-169/5 مەكەمەسىندە بولدى. قىلمىستىق كودەكستىڭ 297-بابى 3-بولىگىمەن جازاسىن وتەپ جاتقان.
ۆ ەسىمدى ازاماتقا جولدانعان سالەم-ساۋقاتتىڭ ىشىنەن ەسىرتكى تەكتەس زات انىقتالدى. التى دانا قۇرتتىڭ ىشىنەن داكەگە ورالىپ سالىنعان وزىنە ءتان حوش ءيىسى بار ءشوپ تاركىلەندى.
"مەكەمەگە قىزىلوردا قالالىق پوليتسيا باسقارماسىنىڭ جەدەل-تەرگەۋ توبى شاقىرتىلدى. تاركىلەنگەن زات بويىنشا سوت ساراپتاما جۇمىستارىنىڭ ناتيجەسىندە ول سالماعى 3,2 گرامم كەپتىرىلگەن ماريحۋانا بولىپ شىقتى. اتالعان دەرەك بويىنشا قر قىلمىستىق كودەكسىنىڭ 297-بابىنىڭ 3-بولىگىمەن سوتقا دەيىنگى تەرگەپ-تەكسەرۋ جۇمىستارى جۇرگىزىلۋدە", – دەپ ءمالىم ەتتى قىزىلوردا وبلىسى بويىنشا قىلمىستىق-اتقارۋ جۇيەسى دەپارتامەنتىنەن.
"ادىرنا" ۇلتتىق پورتالى
