ەلىمىزدىڭ وڭتۇستىگىنەن سولتۇستىك وڭىرلەرىنە قونىستانۋشىلارعا باسپانا جالداۋعا سۋبسيديا بەرىلەدى. بۇل تۋرالى بۇگىن قر پارلامەنتى سەناتىنىڭ الەۋمەتتىك-مادەني دامۋ جانە عىلىم كوميتەتى دەپۋتاتتارىمەن كەزدەسۋ بارىسىندا ەلىمىزدىڭ ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ءمالىم ەتتى، دەپ حابارلايدى قازاقپارات.
«ءبىز حالىقارالىق جانە ۇلتتىق ساراپشىلارمەن، ۇلتتىق ەكونوميكا مينيسترلىگىمەن بىرلەسىپ، حالىق سانىنا بولجام جاسادىق. سوندا قازىردىڭ وزىندە حالىقتىڭ قونىستانۋدا تەڭگەرىمسىزدىكتىڭ بار ەكەندىگى بايقالدى.
ءبىزدىڭ وڭتۇستىگىمىزدە ەل حالقىنىڭ 38 پايىزى تۇرادى. ولار قىزىلوردا، وڭتۇستىك قازاقستان، جامبىل جانە الماتى وبلىستارى. ال شامامەن 17 پايىز حالىق سولتۇستىك وڭىرلەردە تۇرىپ جاتىر.
ەگەردە مۇنداي جاعداي ودان ارى ساقتالا بەرەتىن بولسا، وندا بولجامعا سايكەس 2050 جىلعا قاراي وڭتۇستىك وڭىرلەردىڭ حالقى 5,2 ملن. ادامعا جەتەدى. سولتۇستىك وڭىرلەردىڭ حالقىنان 4 ەسەگە اسىپ تۇسەدى، ال سولتۇستىك وڭىرلەردىڭ تۇرعىندارى 1 ملن. ادامعا كەميدى»، – دەدى مينيستر. ونىڭ اتاپ وتۋىنشە، قازىردىڭ وزىندە وڭتۇستىك وڭىردە 100 جاڭا تۋعان بالاعا 12 قارت ادامنان كەلسە، سولتۇستىك وڭىردە 100 جاڭا تۋعان بالاعا 53 قارت ادامنان كەلەدى. «ياعني، قازىردىڭ وزىندە ەڭبەك رەسۋرستارىنا قاتىستى ماسەلە تۋىنداۋدا»، – دەدى ت.دۇيسەنوۆا. ءمينيستردىڭ ايتۋىنشا، «جۇمىسپەن قامتۋ جول كارتاسى» جۇيەگە اسىرىلعان جىلداردىڭ ىشىندە وڭتۇستىك وڭىرلەردەن سولتۇستىك قازاقستان، قوستاناي جانە پاۆلودار وبلىستارىنا 19 مىڭ ادام كوششىپ بارعان. ولارعا باعدارلاما اياسىندا 5,4 مىڭ قىزمەتتىك پاتەرلەر مەن جاتاقحانالاردا بولمەلەر سالىنعان. «بۇل ساياسات ودان ارى دا جالعاسا بەرەدى.
دەگەنمەن، ەندىگى ۋاقىتتا جۇمىسپەن قامتۋدىڭ جاڭا باعدارلاماسى اياسىندا باسپانا سالۋ قاراستىرىلمايدى. ويتكەنى، «نۇرلى جول» باعدارلاماسى جۇزەگە اسىرىلۋدا. بىراق، جۇمىسپەن قامتۋدىڭ جاڭا باعدارلاماسى اياسىندا قونىس اۋدارۋشىلاردىڭ جالعا الاتىن باسپانالارىنا تولەم جاساۋ مۇمكىنشىلىگى قاراستىرىلادى. وتباسى مۇشەلەرىنىڭ سانىنا بايلانىستى ءاربىر مۇشەگە 34 مىڭنان 68 مىڭ تەڭگەگە دەيىن باسپانا جالداۋعا سۋبسيديا بەرىلەدى.
ماسەلەن، ءبىر ادام كەلسە، وندا وعان قالالىق جەردە باسپانا جالداۋعا 20 اەك بەرىلەدى. بۇل شامامەن 45 380 تەڭگە. ەگەر وتباسىندا 2-دەن 4 ادامعا دەيىن بولسا،وندا 25 اەك بەرىلەدى. مۇنان بولەك، جەرگىلىكتى بيۋدجەت ەسەبىنەن تۇرعىن ءۇي سالۋ مۇمكىنشىلىگى دە قاراستىرىلۋدا»، – دەدى ول.
"ادىرنا." كز
