Elimizdiń ońtústiginen soltústik óńirlerine qonystanýshylarǵa baspana jaldaýǵa sýbsıdııa beriledi. Bul týraly búgin QR Parlamenti Senatynyń Áleýmettik-mádenı damý jáne ǵylym komıteti depýtattarymen kezdesý barysynda elimizdiń Eńbek jáne halyqty áleýmettik qorǵaý mınıstri Tamara Dúısenova málim etti, dep habarlaıdy QazAqparat.
«Biz halyqaralyq jáne ulttyq sarapshylarmen, Ulttyq ekonomıka mınıstrligimen birlesip, halyq sanyna boljam jasadyq. Sonda qazirdiń ózinde halyqtyń qonystanýda teńgerimsizdiktiń bar ekendigi baıqaldy.
Bizdiń ońtústigimizde el halqynyń 38 paıyzy turady. Olar Qyzylorda, Ońtústik Qazaqstan, Jambyl jáne Almaty oblystary. Al shamamen 17 paıyz halyq soltústik óńirlerde turyp jatyr.
Egerde mundaı jaǵdaı odan ary saqtala beretin bolsa, onda boljamǵa sáıkes 2050 jylǵa qaraı ońtústik óńirlerdiń halqy 5,2 mln. adamǵa jetedi. Soltústik óńirlerdiń halqynan 4 esege asyp túsedi, al soltústik óńirlerdiń turǵyndary 1 mln. adamǵa kemıdi», – dedi mınıstr. Onyń atap ótýinshe, qazirdiń ózinde ońtústik óńirde 100 jańa týǵan balaǵa 12 qart adamnan kelse, soltústik óńirde 100 jańa týǵan balaǵa 53 qart adamnan keledi. «Iaǵnı, qazirdiń ózinde eńbek resýrstaryna qatysty másele týyndaýda», – dedi T.Dúısenova. Mınıstrdiń aıtýynsha, «Jumyspen qamtý jol kartasy» júıege asyrylǵan jyldardyń ishinde ońtústik óńirlerden Soltústik Qazaqstan, Qostanaı jáne Pavlodar oblystaryna 19 myń adam kóip barǵan. Olarǵa baǵdarlama aıasynda 5,4 myń qyzmettik páterler men jataqhanalarda bólmeler salynǵan. «Bul saıasat odan ary da jalǵasa beredi.
Degenmen, endigi ýaqytta jumyspen qamtýdyń jańa baǵdarlamasy aıasynda baspana salý qarastyrylmaıdy. Óıtkeni, «Nurly jol» baǵdarlamasy júzege asyrylýda. Biraq, jumyspen qamtýdyń jańa baǵdarlamasy aıasynda qonys aýdarýshylardyń jalǵa alatyn baspanalaryna tólem jasaý múmkinshiligi qarastyrylady. Otbasy músheleriniń sanyna baılanysty árbir múshege 34 myńnan 68 myń teńgege deıin baspana jaldaýǵa sýbsıdııa beriledi.
Máselen, bir adam kelse, onda oǵan qalalyq jerde baspana jaldaýǵa 20 AEK beriledi. Bul shamamen 45 380 teńge. Eger otbasynda 2-den 4 adamǵa deıin bolsa,onda 25 AEK beriledi. Munan bólek, jergilikti bıýdjet esebinen turǵyn úı salý múmkinshiligi de qarastyrylýda», – dedi ol.
"Adyrna." kz
