قورعانىس مينيسترلىگىنىڭ سۋ-30 ۇشاعى قاراعاندى وبلىسىندا قۇلادى. بۇل تۋرالى قورعانىس مينيسترلىگىنىڭ ءباسپاسوز قىزمەتى حابارلادى.
"بالقاش قالاسىنداعى اۆياتسيالىق وقۋ ورتالىعىندا ءوتىپ جاتقان وقۋ-جاتتىعۋ كەزىندە سۋ-30سم كوپفۋنكتسيونالدى يسترەبيتەلى قونۋ الاڭىنا جاقىنداپ قالعان ساتتە اپاتقا ۇشىرادى. وزگە جاعدايلار انىقتالعان سوڭ، ءتيىستى حابارلاما جاسايتىن بولامىز", – دەپ ءتۇسىندىردى قورعانىس مينيسترلىگىنىڭ ءباسپاسوز قىزمەتى.
ايتا كەتەيىك، سۋ-30 ۇشاعى ەكى ورىندى كوپماقساتتى ءتورتىنشى بۋىندى اسكەري ۇشاق ساناتىنا جاتادى.
سەنبى، 13 ناۋرىزدا الماتى اۋەجايىنىڭ ماڭىنداعى قىزىل تۋ اۋىلىنىڭ ىرگەسىنە اسكەري ۇشاق اپاتتى جاعدايدا قونۋعا ءماجبۇر بولعان. الايدا، ان-26 ۇشاعى قونۋ الاڭىنا جاقىنداعاندا وتقا ورانىپ، قۇلادى. سالدارىنان ءتورت ادام قازا تاۋىپ، اۋىر جاراقات العان ەكى اسكەري قىزمەتكەر ءتورتىنشى قالالىق اۋرۋحاناعا جەتكىزىلدى. دارىگەرلەر ولاردىڭ جاعدايىن وتە اۋىر دەپ باعالاپ وتىر.
ۇلتتىق قاۋىپسىزدىك كوميتەتى بورتتىق ءنومىرى 02 سانىمەن بەلگىلەنگەن ۇشاق ۆەدومستۆونىڭ اۆياتسيالىق قىزمەتىنە تيەسىلى ەكەنىن راستادى.
