اتىراۋ وبلىسىندا ءبىلىم بەرۋ ساپاسىن ارتتىراتىن جول كارتاسى ىسكە اسىرىلادى.
بۇگىن اتىراۋ وبلىسى ءبىلىم بەرۋ جۇيەسىن دامىتۋدىڭ 2021-2023 جىلدارعا ارنالعان جول كارتاسى تانىستىرىلدى. اۋكىمدى جوبانى اتىراۋ وبلىسى ءبىلىم بەرۋ باسقارماسى «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمدارىمەن بىرلەسە جۇزەگە اسىرادى. بۇل - «نازارباەۆ زياتكەرلىك مەكتەپتەرى» دببۇ-نىڭ قازاقستاندا قولعا العان العاشقى تىڭ جوباسى.
شارا بارىسىندا ۇستازدار قاۋىمىن عىلىم قىزمەتكەرلەرى كۇنىمەن قۇتتىقتاعان اتىراۋ وبلىسى اكىمى ماحامبەت دوسمۇحامبەتوۆ بۇگىندە ادام كاپيتالى كەز كەلگەن مەملەكەت ءۇشىن باستى قۇندىلىققا اينالعانىن، ونى دامىتۋدى ساپالى ءبىلىمسىز كوزگە ەلەستەتۋ مۇمكىن ەمەس ەكەنىن اتاپ ءوتتى. «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمدارى الەمدە ۇزدىكتەردىڭ قاتارىندا ەكەنىن بىلەمىز. تىڭ جوبانى اتىراۋ وبلىسىنان باستاعاندارىڭىز قۋانتادى. وڭىرىمىزدەگى ءبىلىم بەرۋ سالاسىنداعى پروبلەمالاردى بىرلەسە شەشەمىز دەگەن ويدامىن. اتىراۋلىق وقۋشىلاردىڭ بىلىمدىك، زياتكەرلىك جانە رۋحاني-ادامگەرشىلىك دامۋ تۇرعىسىنان وزگەلەردەن وق بويى وزىق تۇرعانىن كورۋ - ءبىز ءۇشىن اسا ماڭىزدى ميسسيالاردىڭ ءبىرى»،-دەگەن ايماق باسشىسى ءبىلىم سالاسىنا دامىتۋعا قولداۋ كورەتۋگە ارقاشان دايىن ەكەنىن اتاپ ءوتتى.
وبلىس اكىمىنىڭ تاپسىرماسى بويىنشا وبلىستىق ءبىلىم بەرۋ باسقارماسى جانىنان قۇرىلعان جۇمىس توبى وڭىردەگى ءبىلىم بەرۋ احۋالىنا تالداۋ جاساعان. سونىڭ ناتيجەسىندە سالاداعى پروبلەمالاردى شەشىپ، ءبىلىم بەرۋدى دامىتۋ ءۇشىن ازىرلەنگەن ءۇش جىلدى قامتيتىن ارنايى باعدارلاما ازىرلەنگەن.
جيىن بارىسىندا ءسوز العان «نازارباەۆ زياتكەرلىك مەكتەپتەرى» دببۇ باسقارماسىنىڭ ءتورايىمى كۇلاش ءشامشيدينوۆا ءبىلىم بەرۋ سالاسىنداعى كەشەندى جاڭعىرتۋ جانە ءبىلىم بەرۋ ساپاسىن ارتتىرۋعا قاتىستى جوسپارلانعان ءىس-شارالارعا جان-جاقتى توقتالدى. «ايماقتىڭ ءبىلىم جۇيەسىن دامىتۋدى بىردەن قولعا العان وبلىس اكىمىنە العىسىمىز شەكسىز. مۇنى ءوڭىردىڭ بولاشاعىنا جاناشىرلىق، جاس ۇرپاققا دەگەن ۇلكەن ماحاببات دەپ بىلەمىن»،-دەگەن كۇلاش ءشامشيدينوۆا جول كارتاسىنىڭ تالداۋ جانە مونيتورينگ، بالالاردىڭ ءال-اۋقاتى، مۇمكىندىكتەر مەكتەبى، پەداگوگيكالىق كادرلار سونداي-اق ينفراقۇرىلىم سىندى نەگىزگى باعىتتارىنا توقتالدى. «جوباعا ساي، پاندىك باعالاۋ جۇيەسى بويىنشا وقىتامىز. وعان قوسا مۇعالىمدەردىڭ ءوزىنىڭ تاجىريبەسىن زەرتتەۋ ارقىلى جۇمىس بارىسىنداعى ۇتىمدى جاقتارىن كۇشەيتە وتىرىپ، پروبلەمالاردى شەشۋگە دۇرىس باعىت-باعدار بەرۋ كوزدەلگەن. سوندىقتان، بۇل جوبانىڭ كەڭسەسى اشىلدى. وعان «نازارباەۆ زياتكەرلىك مەكتەپتەرى»، ءبىلىم بەرۋ، باعالاۋ جانە مۇعالىمدەردىڭ بىلىكتىلىگىن دامىتۋ ورتالىقتارى قاتىسادى. بۇل ۇزاق مەرزىمدى جوبا، سول سەبەپتەن ءبىر جىلدىڭ ىشىندە 23 قالا، 27 اۋىل مەكتەپتەرىندە بالالاردىڭ فۋنكتسيونالدىق ساۋاتتىلىعى، جەتىستىكتەرى باعىتىندا مونيتورينگ وتكىزىلەدى. مۇعالىم، اتا-انالار اراسىندا ساۋالنامالار جۇرگىزىلىپ، سودان كەيىن بەلگىلى ءبىر شەشىمدەر قابىلدانىپ، جاتيجەسى بەلگىلى بولادى»، - دەدى ك.ءشامشيدينوۆا.
سونىمەن قاتار، 4 جانە 8-سىنىپتا وقيتىن 5000 وقۋشىنىڭ جەتىستىكتەرى سارالانىپ، مەكتەپ باسشىلارىنىڭ كاسىبي قۇزىرەتتىلىكتەرىن كەڭەيتۋ بويىنشا جۇمىستار جۇرگىزىلەدى. 50-دەن استام مەكتەپتە STEM جانە IT داعدىلارىن وقىتۋ بويىنشا جەتەكشى جاتتىقتىرۋشىلاردى كەزەڭ-كەزەڭىمەن دايارلاۋ جوسپارلانىپ وتىر. مەكتەپتەردە قوسىمشا ءبىلىم بەرۋ، پەداگوگ-پسيحولوگتار مەن اتا-انالاردىڭ وقۋ-تاربيە پروتسەسىنە قاتىسۋى ءۇشىن جاعدايلار قارالاتىن بولادى.
