ۋكراينا مەن رەسەي اراسىنداعى ساياسي جانجال ۋشىعىپ، كەزەكتى اسكەري قاقتىعىس الدىندا تۇر. ناتو، رەسەي جانە ۋكراينا ساراپشىلارى سوعىستىڭ قانداي ستسەناريمەن ءوربيتىنى جايلى ءتۇرلى بولجامدار ايتۋدا. "رەسەي فەدەراتسياسى ىدىراعان سوڭ، قىرىم ۋكرايناعا قايتىپ ورالماۋى دا مۇمكىن" دەيدى ۋكرايندىق Obozrevatel اقپارات كوزىنە بەرگەن سۇحباتىندا ناتو-نىڭ ماسكەۋدەگى وكىلى بولعان، اقش تەڭىز كۇشتەرىنىڭ زەينەتتەگى كاپيتانى گارري تاباح.
«رەسەي ەرتەڭ ىدىراپ كەتۋى عاجاپ ەمەس. ول رەسەيلىكتەر ءۇشىن دە جامان ەمەس قوي. قىرىم ۋكرايناعا وداقتاس، تاتۋ كورشى بولاتىن تاۋەلسىز ەل بولۋى مۇمكىن نەمەسە ۋكراينانىڭ قۇرامىنا قايتا ورالادى», — دەدى ول.
ول ۋكراينانىڭ شىعىسىنداعى سەپاراتيستەر قولىنداعى دونەتسك پەن لۋگانسك ايماقتارىنا قاتىستى دا سونداي پىكىر ءبىلدىردى. ونىڭ ويىنشا قازىر ۋكراينا اسكەرى دونباسستى قايتارىپ الاتىن الەۋەتكە يە.
«ءبىر كۇننىڭ ىشىندە بۇل شەشىلمەيدى. سىزدەردىڭ مينيسترلەرىڭىز دۇرىس ايتادى، ول جاعدايدى باعامداپ وتىر، تىكەلەي جۇمىسى عوي»، — دەيدى وفيتسەر.
وفيتسەر ەۋروپا مەن اقش رەسەيگە جۇمساق پوزيتسيا ۇستانىپ وتىرعانىن ايتادى. ونىڭ ويىنشا رەسەيدى قىسپاققا الۋدى كۇشەيتۋ كەرەك.
رەسەي 2014 جىلى قىرىمدا ۋكراينادان تارتىپ العان بولاتىن. وتكىزىلگەن رەفەرەندۋمدى رەسەي حالىقارالىق تالاپتارعا ساي دەسە دە، قىرىمدى الەمنىڭ تاۋەلسىز ەلدەرى ۋكراينانىڭ بولىنبەس بولشەگى ساناپ كەلەدى. رەسەيدىڭ اگرەسسيالىق ساياساتىنا قارسى باتىس الەمى سانكتسيا سالىپ، ماسكەۋ-ۆاشينگتون اراسىنداعى ساياسي قاقتىعىس ۋشىعىپ كەتتى.
اسحات قاسەنعالي،
"ادىرنا" ۇلتتىق پورتالى
