ەرجان اشىقباەۆ قازاقستاننىڭ اقش-تاعى ەلشىسى بولىپ تاعايىندالدى، - دەپ حابارلايدى "ادىرنا" ءتىلشىسى.
«مەملەكەت باسشىسىنىڭ جارلىعىمەن اشىقباەۆ ەرجان نىعماتۋللاۇلى قازاقستان رەسپۋبليكاسىنىڭ امەريكا قۇراما شتاتتارىنداعى توتەنشە جانە وكىلەتتى ەلشىسى بولىپ تاعايىندالدى»، - دەلىنگەن حابارلامادا.
ول 2013 جىلدىڭ جەلتوقسانىنان بەرى قىزمەت ەتىپ كەلە جاتقان قر سىرتقى ىستەر ءمينيسترىنىڭ ورىنباسارى قىزمەتىنەن بوساتىلدى. اقش-تاعى بۇرىنعى ەلشى ەرجان قازىحانوۆ پرەزيدەنتتىڭ حالىقارالىق ىنتىماقتاستىق جونىندەگى ارنايى وكىلى بولىپ تاعايىندالدى. جاڭا لاۋازىمدى قۇرۋدى قاسىم-جومارت توقاەۆ ماقۇلدادى.
ەرجان اشىقباەۆ 1974 جىلى 16 ماۋسىمدا الماتىدا دۇنيەگە كەلگەن. ءال-فارابت اتىنداعى قازاق ۇلتتىق ۋنيۆەرسيتەتىن، كەننەدي اتىنداعى باسقارۋ مەكتەبى جانە گارۆارد ۋنيۆەرسيتەتىن بىتىرگەن. حالىقارالىق قاتىناستار مامانى، مەملەكەتتىك باسقارۋ ماگيسترى. ديپلوماتيالىق مانسابىن 1998 جىلى ءتورتىنشى بولىمدە ازيا، تاياۋ شىعىس جانە افريكا اكىمشىلىگىندە كومەكشى بولىپ باستاعان.
ول سىرتقى ىستەر مينيسترلىگىنىڭ ورتالىق اپپاراتىندا ءارتۇرلى لاۋازىمداردا جۇمىس ىستەدى، سونىمەن قاتار بەلگياداعى قازاقستان ەلشىلىگىنە جىبەرىلدى. 2012 جىلى ول پرەمەر-مينيستر كەڭسەسى باسشىسىنىڭ ورىنباسارى، ۇكىمەتتىڭ رەسمي وكىلى بولدى. 2012-2013 جىلدارى - پرەزيدەنت اكىمشىلىگى سىرتقى ساياسات ورتالىعىنىڭ جەتەكشىسى بولىپ جۇمىس ىستەدى. ونىڭ 1-دارەجەلى توتەنشە جانە وكىلەتتى ەلشىسى ديپلوماتيالىق دارەجەسى بار.
"ادىرنا" ۇلتتىق پورتالى
