رەسەي فۋتبولشىلارى تىزە بۇگىپ، كەشىرىم سۇراۋى ءتيىس

2003

"رەسەي جانە گەرمانيا فۋتبولشىلارى ويىن الدىندا پولياكتاردان تىزەرلەپ تۇرىپ كەشىرىم سۇراۋى ءتيىس" دەگەن وي ايتتى پولياك ءپۋبليتسيستى پيوتر ليسەۆيچ.

بۇل تۋرالى ويىن ول الەۋمەتتىك جەلىدەگى قىزۋ پىكىرتالاس بارىسىندا بىلدىرگەن. پولشا مەن انگليا قۇرامالارىنىڭ كەزدەسۋىندە پولياك فۋتبولشىلارى تىزەرلەۋدەن باس تارتىپ، اعىلشىن فۋتبولشىلارى قارا ناسىلدىلەرگە قۇرمەت رەتىندە تىزە بۇككەن ەدى. بۇل ارەكەتتەرى الەۋمەتتىك جەلىدە پىكىرتالاس تۋدىردى. ءبىر توپ "تىزە بۇگىپ، باتىسپەن بىرگە ەكەنىمىزدى كورسەتۋ كەرەك ەدى" دەسە، ەندى ءبىر توپ ول ارەكەتتى قاتە سانادى.

"ارينە ءبىز باتىس مادەنيەتىنىڭ بولشەگىمىز. بىراق ءبىز قارا ناسىلدىلەردى قۋدالاعان ەمەسپىز، ونىڭ ۇستىنە ءبىز شىعىستىڭ دا، باتىستىڭ دا قاندى رەجيمدەرىنەن قۋدالاۋ كوردىك.  الەمدىك ويىن الاڭدارىندا وسىنداي سانگە اينالعان ەكەن، ەندەشە رەسەيلىك جانە نەمىس فۋتبولشىلارى تىزە بۇگىپ، كەشىرىم سۇراسىن.  ءتۇرلى ەلدەر اعىلشىنداردىڭ وتارى بولعان ساتتە، پولياكتار ورىستار نەمەسە نەمىستەردىڭ بوداندىعىندا بولدى.  بۇل دەگەنىمىز تەك قانا قىرعىن مەن دەپورتاتسيا ەمەس، سونىمەن قاتار قاساقانا جاسالعان ورىستاندىرۋ مەن نەمىس مادەنيەتىن ەنگىزۋ، پولياك ۇلتىنىڭ بىرەگەيلىگىن جويۋ، ءتىلدى قۇرتۋ دەگەن ءسوز. ياعني راسيزمگە ۇقساس.  ارتىنشا 20-عاسىردا گەنوتسيد باستالدى. لاگەرلەر، پولياك زيالىلارىن قىرۋ مەن كۇشتەپ جويۋ. مانۋەل نويەر مەن الەكساندر گولوۆين تىزە بۇگىپ، كەشىرىم سۇراسا ءجون بولار ەدى", — دەپ جازدى پيوتر ليسەۆيچ Niepodległości پورتالىنا.

اسحات قاسەنعالي،

"ادىرنا" ۇلتتىق پورتالى

 

.

 

پىكىرلەر
رەداكتسيا تاڭداۋى