قازاقستاندا ەكى وبلىستا اۋا-رايىنىڭ قولايسىزدىعىنا بايلانىستى تاسجولدار جابىلدى، تاعى ءبىر وڭىردە جول قوزعالىسىنا شەكتەۋ ەنگىزىلىپ وتىر، دەپ حابارلايدى “ادىرنا” ۇلتتىق پورتالى "قازاۆتوجول" ۇلتتىق كومپانياسىنىڭ رەسمي سايتىنا سىلتەمە جاساپ.
پورتالدا جولدارداعى جاعدايعا بايلانىستى اقپارات جاريالانىپ وتىرادى. وعان سايكەس، قازىرگى كەزدە "نۇر-سۇلتان - تەمىرتاۋ", "نۇر-سۇلتان - شىدەرتى" تاسجولدارى، سونداي-اق، "ستەپنوي-شىدەرتى" جول ۋچاسكەسى جابىق تۇر.
ال پاۆلودار وبلىسىندا اۋا-رايىنىڭ قولايسىزدىعىنا "پاۆلودار-سەۆەرنوە" (ارى قاراي رەسەي شەكاراسىنا دەيىن)" تاسجولى تولىعىمەن جابىلدى.
شىعىس قازاقستان وبلىسىندا جىلاندى اۋىلىنان باستاپ پاۆلودار وبلىسىنداعى اققۋلى اۋىلىنا دەيىنگى جول ۋچاسكەسى جابىق. ال سەمەي قالاسىنان رەسەي شەكاراسىنا دەيىنگى تاسجولدا ديزەلدى جانە قوعامدىق كولىكتىڭ قوزعالىسىنا شەكتەۋ ەنگىزىلىپ وتىر. بۇدان بولەك، "وسكەمەن-سەرەبريانسك" باعىتىندا تىركەمەسى بار جۇك كولىكتەرگە ازىرشە جۇرۋگە بولمايدى.
ايتا كەتەيىك، كەشە جولداردىڭ جابىلۋىنا قاتىستى تولىق اقپاراتتى مىنا جەردەن كورۋگە بولادى. سونداي-اق كومپانيانىڭ بايلانىس ورتالىعىنا (1403) حابارلاسىپ، قاجەتتى مالىمەت الۋعا مۇمكىندىك بار.
