وبلىس اكىمدىگىندە ءوڭىر باسشىسى وڭداسىن ءورازاليننىڭ توراعالىعىمەن وزەكتى ەكولوگيالىق ماسەلەلەردى شەشۋگە بايلانىستى سۇراقتار قارالدى.
جيىنعا وبلىس اكىمىنىڭ ءبىرىنشى ورىنباسارى نۇرجاۋعان قالاۋوۆ، شالقار اۋدانىنىڭ اكىمى جانبولات جيدەحانوۆ، تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ باسشىسى جاقسىعالي يمانقۇلوۆ، ەكولوگيا دەپارتامەنتىنىڭ باسشىسى نۇرجان اققۇل، «اكتوبەۆودپروەكت»، «TOLAGAI-2050» جشس وكىلدەرى قاتىستى.
«شالقار اۋدانى تۇرعىندارى شالقار كولىنىڭ ءتۇبىن تازارتۋعا قاتىستى سۇراقتى بىرنەشە رەت كوتەرىپ، بۇرىنعى قالپىنا كەلتىرىپ بەرۋدى سۇراعان. ءبىز بۇل جۇمىسقا ماماندار مەن ساراپشىلاردى تارتتىق. بىلتىر جوبالىق-سمەتالىق قۇجاتتامانى ازىرلەۋ جۇمىستارى اياقتالعان بولاتىن. ۇكىمەت اتالمىش جوبانى قولدادى، بيىل ءبىز سونى جۇزەگە اسىراتىن بولامىز. اۋقىمدى جوبا ءۇش جىلعا جوسپارلانعان، دەگەنمەن جۇمىستى جداعاتتاپ ەكى جىلدا اياقتاۋعا بولادى. ونىڭ ءوڭىر ءۇشىن رەكرەاتسيالىق جانە شارۋاشىلىق تۇرعىدا ماڭىزى زور. وسى جوبادان ۇلكەن ەكولوگيالىق پايدا تابامىز دەپ كۇتىپ وتىرمىز»،- دەپ اتاپ ءوتتى وبلىس اكىمى.
قۇرىلىس، ساۋلەت جانە قالاقۇرىلىسى باسقارماسىنىڭ باسشىسى ناعىمجان الدياروۆ شالقار كولىنىڭ ءتۇبىن تازارتۋ جوباسىن تانىستىردى.
بايانداماشى كول ءتۇبىنىڭ تارتىلىپ، باتپاقتانۋ ماسەلەسى وتكەن عاسىردىڭ 90-شى جىلدارىنىڭ سوڭىندا پايدا بولعانىن اتاپ ءوتتى.
«كول اعىندى سۋلاردىڭ جەتىسپەۋىنەن، سۋ ۇستىندە جانە سۋ استىندا وسىمدىكتەردىڭ ءوسىپ كەتۋى سالدارىنان دەگراداتسياعا ۇشىراپ، سۋدىڭ ساپاسى ناشارلايدى. «شالقار كولىنىڭ ءتۇبىن تازارتۋ» جوباسىنىڭ تەحنيكالىق-ەكونوميكالىق نەگىزى ازىرلەنىپ، ساراپتامادان وڭ ناتيجە الىندى. جوبانىڭ جالپى سوماسى 3 ملرد تەڭگەنى قۇرايدى. وسى جىلى بۇل ماقساتقا رەسپۋبليكالىق بيۋدجەتتەن 432,95 ملن. تەڭگە ءبولىندى. سونداي-اق، سالالىق مينيسترلىككە قوسىمشا قارجى ءبولۋ ءۇشىن تاپسىرىس جىبەرىلدى»، دەدى ناعىمجان الدياروۆ.
جيىن سوڭىندا وڭداسىن ورازالين مەملەكەتتىك ورگاندار مەن «TOLAGAI-2050» جشس مەردىگەر مەكەمەسىنىڭ باسشىلارىنا ءوڭىر ءۇشىن ماڭىزدى جوبانىڭ ساپالى جۇزەگە اسىرىلۋىن، سونداي-اق قورشاعان ورتاعا زيان كەلتىرمەي، بارلىق شارالاردى قابىلداۋدى تاپسىردى.
