2021 جىلدان باستاپ پەداگوگيكالىق ماماندىق بويىنشا جۇمىسقا العاش رەت تۇراتىندار كاسىبي شەبەرلىگى بويىنشا سەرتيفيكاتتاۋدان وتەدى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ مالىمدەدى، دەپ حابارلايدى «ادىرنا» ۇلتتىق پورتالى Sputnik قازاقستان تىلشىسىنە سىلتەمە جاساپ.
"ەندى 2021 جىلدان باستاپ پەداگوگيكالىق ماماندىق بويىنشا جۇمىسقا العاش رەت تۇرۋ ءۇشىن ۇمىتكەرلەر كاسىبي شەبەرلىگى بويىنشا سەرتيفيكاتتاۋدان وتەدى. ياعني ديپلومعا قوسا ءتيىستى كۆاليفيكاتسيا الۋ مىندەتى ەنگىزىلەدى", - دەدى ايماعامبەتوۆ ۇكىمەت وتىرىسىندا.
سونداي-اق، ول پەداگوگتەر جۇمىسقا كونكۋرس ارقىلى قابىلداناتىنىن اتاپ ءوتتى. ول تولىعىمەن ەلەكتروندىق فورماتتا جۇرەدى.
بۇدان بولەك، ايتۋىنشا، كادرلار دايىنداۋ دەڭگەيىن ارتتىرۋ ماقساتىندا جوعارى وقۋ ورىندارىنا قابىلداۋ تالاپتارى كۇشەيتىلدى. پەداگوگيكالىق ماماندىققا مىقتى تۇلەكتەردى عانا قابىلداۋ ءۇشىن ۇبت-نىڭ شەكتى بالى 50-دەن 75 باللعا دەيىن كوتەرىلدى. ال وسى ماماندىققا ءتۇسۋدى ىنتالاندىرۋ ءۇشىن بولاشاق پەداگوگتارعا تولەنەتىن ستيپەنديا 42 مىڭ تەڭگەگە دەيىن ارتتى.
