بەلگىلى جۋرناليست قازيس توعىزباەۆ قايتىس بولدى

1659
Adyrna.kz Telegram

28 اقپاندا ازاتتىق راديوسىنىڭ ءتىلشىسى قازيس توعىزباەۆ 72 جاسىندا الماتىداعى كوروناۆيرۋس اۋرۋحاناسىندا قايتىس بولدى. ودان كوروناۆيرۋس 25 قاڭتاردا انىقتالىپ، اۋرۋحاناعا جاتقىزىلعان، دەپ حابارلايدى «ادىرنا» ءتىلشىسى azattyq.org-كە سىلتەمە جاساپ.

ءجۋرناليستى 22 اقپاندا كلينيكادان شىعارعانىمەن، كەيىن ءحالى اۋىرلاپ قايتا اۋرۋحاناعا جەتكىزىلگەن. ال جەكسەنبىدە جاقىندارى ونىڭ جۇرەگى توقتاعانىن حابارلادى.

ول 2008 جىلدىڭ قىركۇيەگىنەن بەرى ازاتتىق راديوسىنىڭ قازاق قىزمەتىندە ءتىلشى رەتىندە جۇمىس ىستەدى.

زاپاستاعى پولكوۆنيك قازيس توعىزباەۆ اسكەري قىزمەتىنەن سوڭ جۋرناليستيكاعا، فوتوگرافياعا بەت بۇردى. وپپوزيتسيالىق ء"سوز" جانە "ازات" گازەتتەرىندە قىزمەت ەتتى. kub.info سايتىندا بلوگ جۇرگىزىپ، الماتى ماڭىنداعى شاڭىراق اۋدانىنان جۇرتتى كۇشتەپ كوشىرۋ جايلى فوتورەپورتاجدار جاريالادى.

ونى ارىپتەستەرى كاسىبيلىگى مەن جاسىن سىيلاپ "قازيس اعا" دەيتىن. اسكەري ءتارتىپ پەن تىك مىنەزى، شىنشىلدىعى، سەنىمدىلىگى جانە جايساڭدىعى ارىپتەسىمىزدىڭ رۋحتى ادام ەكەنىن ايقىنداپ تۇراتىن.

قازيس توعىزباەۆ 2007 جىلى قاڭتاردا قازاقستانداعى دەموكراتيالىق قۇندىلىقتاردى دامىتۋعا قوسقان ۇلەسى ءۇشىن "ازاتتىق" سىيلىعىمەن ماراپاتتالدى. ول ازاتتىقتىڭ قازاق قىزمەتىندە كوبىنە ساياسي، ادام قۇقىعى، اسكەري تاقىرىپتارىن جازدى. ازاتتىق رەداكتسياسى قازيس اعاعا اۋىر ساياسي تاقىرىپتاردى تاپسىراتىن. ول ارقاشان سەنىمدى اقتاپ، تولىمدى ماقالالار جولدايتىن.

قازيس توعىزباەۆ - 2011 جىلى جەلتوقساندا جاڭاوزەنگە بارىپ، سول جاقتاعى وقيعادان العاش بولىپ بارعان جۋرناليست. 2011 جىلى جەلتوقساندا بولعان جاڭاوزەندەگى مۇنايشىلار ەرەۋىلىندە پوليتسيا نارازىلارعا وق اتىپ، رەسمي دەرەك بويىنشا 17 ادام قايتىس بولدى. قازيس اعا ماڭعىستاۋ وبلىسىنان وبەكتيۆتى رەپورتاجدار تاراتىپ، جاڭاوزەندە نە بولىپ جاتقانىن دەر كەزىندە حابارلاپ وتىردى.

قازيس اعانىڭ "زامانبەك نۇرقادىلوۆتىڭ ءولىمى. ءۇش رەت اتىلعان وق جانە رەجيمدى ساقتاپ قالۋ جولى", "ارون اتابەكتىڭ قاپاستا وتكىزگەن 14 جىلداعى العاشقى ءوتىنىشى", "سايلاۋدان كەيىنگى ءبىر جىل. توقاەۆ نازارباەۆتىڭ كولەڭكەسىنەن شىعا الدى ما؟", "سوۆەت كەزىندە قۋعىندالىپ، نازارباەۆ تۇسىندا ديسسيدەنتكە اينالعان كارىشال اسانوۆ" سىندى ماقالالارىن وقىرمان تاراپىنان كوپ وقىلىپ، كوپ تالقىلاندى.

«ادىرنا» ۇلتتىق پورتالى

پىكىرلەر