ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جاستارى استاناداعى قارتتار ءۇيىنىڭ اۋلاسىن تازارتىپ، قايىرىمدى ىستەر باستاماسىنا قوسىلدى.
ەل تاۋەلسىزدىگىنىڭ 30 جىلدىعىنا وراي «قايىرىمدى ىستەر مارافونى» جالپىۇلتتىق جوباسىنىڭ اياسىندا ۇيىمداستىرىلعان شاراعا جيىرمادان اسا ستۋدەنت قاتىستى. ولار نۇر-سۇلتان قالاسى، اققورعان كوشەسى بويىندا ورنالاسقان «شاراپات» الەۋمەتتىك قىزمەت كورسەتۋ ورتالىعى اۋماعىن قاردان تازارتتى.
ايتا كەتەيىك، «قايىرىمدى ىستەر مارافونى» باستاماسىن بىلتىر جەلتوقسان ايىندا ۆولونتەر جىلىنىڭ جابىلۋ راسىمىندە قازاقستاننىڭ پرەزيدەنتى قاسىم-جومارت توقاەۆ جاريا ەتكەن بولاتىن.
پرەزيدەنت تاۋەلسىزدىكتىڭ 30 جىلدىعى – ەل دامۋىنداعى اسا ماڭىزدى بەلەس، تاريحي مەجە جانە جەتىستىگىمىزدى سارالاپ، بولاشاعىمىزدى باعامدايتىن كەزەڭ ەكەنىن اتادى. ال بيىل ءوزىنىڭ شيرەك عاسىر – 25 جىلدىعىن اتاپ وتەتىن ەۋرازيا ۇلتتىق ۋنيۆەرسيتەتىنىڭ جاستارى مۇنداي يگى شارادان سىرت قالعان ەمەس.
«بۇل ءبىزدىڭ العاشقى نەمەسە سوڭعى قولعابىسىمىز ەمەس، الداعى ۋاقىتتا مۇنداي يگى ىستەرىمىز ءوز جالعاسىن تاباتىن بولادى. الداعى ۋاقىتتا قالامىزداعى جالعىز باستى قاريالار مەن بالالار ءۇيىنىڭ تاربيەلەنۋشىلەرىمەن دە ءتۇرلى شارالار ۇيىمداستىرامىز»،- دەيدى جاستار ورتالىعىنىڭ توراعاسى ايان سالىمگەرەەۆ.
جالىنداعان جاستاردىڭ بۇل قايىرىمدى ىسىنە قارتتار ءۇيىنىڭ قىزمەتكەرلەرى مەن قاريالار العىستارىن ءبىلدىردى
