L.N.Gýmılev atyndaǵy Eýrazııa ulttyq ýnıversıtetiniń jastary astanadaǵy qarttar úıiniń aýlasyn tazartyp, qaıyrymdy ister bastamasyna qosyldy.
El Táýelsizdiginiń 30 jyldyǵyna oraı «Qaıyrymdy ister marafony» jalpyulttyq jobasynyń aıasynda uıymdastyrylǵan sharaǵa jıyrmadan asa stýdent qatysty. Olar Nur-Sultan qalasy, Aqqorǵan kóshesi boıynda ornalasqan «Sharapat» áleýmettik qyzmet kórsetý ortalyǵy aýmaǵyn qardan tazartty.
Aıta keteıik, «Qaıyrymdy ister marafony» bastamasyn byltyr jeltoqsan aıynda Volonter jylynyń jabylý rásiminde Qazaqstannyń Prezıdenti Qasym-Jomart Toqaev jarııa etken bolatyn.
Prezıdent Táýelsizdiktiń 30 jyldyǵy – el damýyndaǵy asa mańyzdy beles, tarıhı meje jáne jetistigimizdi saralap, bolashaǵymyzdy baǵamdaıtyn kezeń ekenin atady. Al bıyl óziniń shırek ǵasyr – 25 jyldyǵyn atap ótetin Eýrazııa ulttyq ýnıversıtetiniń jastary mundaı ıgi sharadan syrt qalǵan emes.
«Bul bizdiń alǵashqy nemese sońǵy qolǵabysymyz emes, aldaǵy ýaqytta mundaı ıgi isterimiz óz jalǵasyn tabatyn bolady. Aldaǵy ýaqytta qalamyzdaǵy jalǵyz basty qarııalar men balalar úıiniń tárbıelenýshilerimen de túrli sharalar uıymdastyramyz»,- deıdi Jastar ortalyǵynyń tóraǵasy Aıan Sálimgereev.
Jalyndaǵan jastardyń bul qaıyrymdy isine qarttar úıiniń qyzmetkerleri men qarııalar alǵystaryn bildirdi
