22 اقپاندا وننان استام ايەل الماتى اكىمدىگىنىڭ الدىنا جينالىپ، ءماسليحات دەپۋتاتى، سپورتشى ەرماحان يبرايموۆتان "كوپ بالالى ايەلدەر تۋرالى ايتقانىن" ءتۇسىندىرۋدى تالاپ ەتتى دەپ حابارلايدى «ادىرنا» ۇلتتىق پورتالى ازاتتىق تىلشىسىنە سىلتەمە جاساپ.
يبرايموۆ جۋرناليست نارتاي ارالبايۇلىنا بەرگەن سۇحباتتا جامبىل وبلىسى جاڭاتاس كەنتىندە ءبىر وتباسىنىڭ بەس ءسابيى قازا بولعان قايعىلى وقيعا تۋرالى "بەس بالانى سىرتىنان جاۋىپ، كەتىپ قالۋدى" ناعىز "تۇك كورمەگەندىك" دەگەن.
– جىلى كابينەتتە وتىرا بەرمەي، "تۇك كورمەگەندەردىڭ" جاعدايىن ءوزى شىعىپ كورسىن. ونداي جاعدايدان شىعۋ ءۇشىن نە ىستەۋ قاجەتتىگىن ءوز اۋزىنان ەستيىك. ءبىزدىڭ ارامىزدا مۇگەدەك بالا تاربيەلەپ وتىرعاندار، كوپ بالا ءوسىرىپ وتىرعاندار بار. سولاردىڭ جاعدايىن كورسىن. بالالاردى ۇيگە قاماپ، نە ءۇشىن شىعىپ جۇرگەنىمىزدى كورسىن. 60-70 مىڭ تەڭگە جالاقى تابۋعا جاعدايى جوقتىقتان شىعىپ جۇرگەنىن كورسىن، - دەدى مۇگەدەك بالا تاربيەلەپ وتىرعان جالعىزباستى انا ىڭكار جانادىلقىزى.
ونىڭ ايتقانىن جانىنداعىلار دا قوستادى. سالدەن سوڭ اكىمدىكتەن الماتى ءماسليحاتىنىڭ حاتشىسى ستانيسلاۆ كانكۋروۆ شىعىپ، ايەلدەردىڭ تالاپتارىن تىڭدادى. يبرايموۆتىڭ وزىنە حابارلاسىپ، ايەلدەرگە تۇستەن كەيىن ءماسليحات دەپۋتاتىنىڭ وزىمەن كەزدەسۋگە بولاتىنىن ايتتى.
20 اقپاندا Youtube-تە جاريالانعان سۇحباتتا سپورتشى ەرماحان يبرايموۆ بەس قىزدىڭ قازاسى "قازاقستان قوعامىن ءدۇر سىلكىندىردى" دەپ ايتقان. سپورتشى بالالاردى ۇيدە جالعىز تاستاپ كەتپەس بۇرىن "قاۋىپسىزدىكتى قاراستىرۋ قاجەت ەدى" دەگەن.
"بەس بالانى ءتۇنى بويى قالدىرىپ كەتۋ وتە دۇرىس ەمەس. تۋعان تۋىسقانى بار. اكە-شەشەسى بار. ءبىر سوزبەن ايتقاندا، بالالاردى ولاي قالدىرۋعا بولمايدى. بەس بالانى سىرتىنان جاۋىپ، كەتىپ قالۋ ول ناعىز ... تۇك كورمەگەندىك" دەگەن سپورتشى.
19 اقپاندا جامبىل وبلىسى سارىسۋ اۋدانى جاڭاتاس قالاسىندا بەس قاباتتى ۇيدەگى پاتەردە ءورت شىعىپ، ءبىر وتباسىنىڭ بەس بالاسى قايتىس بولدى. اكىمدىكتىڭ مالىمەتىنشە، بالالاردىڭ اكەسى جۇمىستا بولعان، شەشەسى دۇكەنگە شىعىپ كەتكەن. بالالار ءيىس گازىنا تۇنشىعىپ قالعان. پرەزيدەنت قاسىم-جومارت توقاەۆ بۇل وقيعانى "ەل باسىنا تۇسكەن تراگەديا" دەپ اتاعان.
وسىعان ۇقساس قايعىلى وقيعا 2019 جىلى 4 اقپانعا قاراعان ءتۇنى استانا قالاسىنىڭ (قازىرگى نۇر-سۇلتان) شەتىندەگى كوكتال-1 ەلدىمەكەنىندە بولعان. ول كەزدە شاعىن ۇيدەن ءورت شىعىپ، ءبىر ءۇيدىڭ بەس قىزى قازاعا ۇشىرادى. وسى وقيعادان كەيىن ەلدە كوپ بالالى ايەلدەردىڭ نارازىلىعى كۇشەيدى. ولار الەۋمەتتىك كومەكتى كۇشەيتۋدى، تۇرعىن-ءۇي ماسەلەسىن شەشۋدى تالاپ ەتتى.
بوكستان سيدنەي وليمپياداسىنىڭ چەمپيونى، حالىقارالىق باقىلاۋشىلار سىناعان ءماسليحات سايلاۋىنىڭ ناتيجەسىندە دەپۋتات بولعان ەرماحان يبرايموۆتىڭ ۇستىنەن بۇعان دەيىن بەلسەندىلەر ارىز تۇسىرگەن. وعان 10 قاڭتاردا - ورتالىق الاڭدا پوليتسيا ءادىل سايلاۋدى تالاپ ەتكەن بەلسەندىلەردى قورشاپ تۇرعان كەزدە سپورتشىنىڭ "ۇساق بۇزاقىلىق جاساپ، نارازىلاردىڭ پلاكاتىن جىرتۋى" سەبەپ بولعان.
