22 aqpanda onnan astam áıel Almaty ákimdiginiń aldyna jınalyp, máslıhat depýtaty, sportshy Ermahan Ibraımovtan "kóp balaly áıelder týraly aıtqanyn" túsindirýdi talap etti dep habarlaıdy «Adyrna» ulttyq portaly Azattyq tilshisine silteme jasap.
Ibraımov jýrnalıst Nartaı Aralbaıulyna bergen suhbatta Jambyl oblysy Jańatas kentinde bir otbasynyń bes sábıi qaza bolǵan qaıǵyly oqıǵa týraly "bes balany syrtynan jaýyp, ketip qalýdy" naǵyz "túk kórmegendik" degen.
– Jyly kabınette otyra bermeı, "túk kórmegenderdiń" jaǵdaıyn ózi shyǵyp kórsin. Ondaı jaǵdaıdan shyǵý úshin ne isteý qajettigin óz aýzynan estıik. Bizdiń aramyzda múgedek bala tárbıelep otyrǵandar, kóp bala ósirip otyrǵandar bar. Solardyń jaǵdaıyn kórsin. Balalardy úıge qamap, ne úshin shyǵyp júrgenimizdi kórsin. 60-70 myń teńge jalaqy tabýǵa jaǵdaıy joqtyqtan shyǵyp júrgenin kórsin, - dedi múgedek bala tárbıelep otyrǵan jalǵyzbasty ana Ińkár Janádilqyzy.
Onyń aıtqanyn janyndaǵylar da qostady. Sálden soń ákimdikten Almaty máslıhatynyń hatshysy Stanıslav Kankýrov shyǵyp, áıelderdiń talaptaryn tyńdady. Ibraımovtyń ózine habarlasyp, áıelderge tústen keıin máslıhat depýtatynyń ózimen kezdesýge bolatynyn aıtty.
20 aqpanda Youtube-te jarııalanǵan suhbatta sportshy Ermahan Ibraımov bes qyzdyń qazasy "Qazaqstan qoǵamyn dúr silkindirdi" dep aıtqan. Sportshy balalardy úıde jalǵyz tastap ketpes buryn "qaýipsizdikti qarastyrý qajet edi" degen.
"Bes balany túni boıy qaldyryp ketý óte durys emes. Týǵan týysqany bar. Áke-sheshesi bar. Bir sózben aıtqanda, balalardy olaı qaldyrýǵa bolmaıdy. Bes balany syrtynan jaýyp, ketip qalý ol naǵyz ... túk kórmegendik" degen sportshy.
19 aqpanda Jambyl oblysy Sarysý aýdany Jańatas qalasynda bes qabatty úıdegi páterde órt shyǵyp, bir otbasynyń bes balasy qaıtys boldy. Ákimdiktiń málimetinshe, balalardyń ákesi jumysta bolǵan, sheshesi dúkenge shyǵyp ketken. Balalar ıis gazyna tunshyǵyp qalǵan. Prezıdent Qasym-Jomart Toqaev bul oqıǵany "el basyna túsken tragedııa" dep ataǵan.
Osyǵan uqsas qaıǵyly oqıǵa 2019 jyly 4 aqpanǵa qaraǵan túni Astana qalasynyń (qazirgi Nur-Sultan) shetindegi Kóktal-1 eldimekeninde bolǵan. Ol kezde shaǵyn úıden órt shyǵyp, bir úıdiń bes qyzy qazaǵa ushyrady. Osy oqıǵadan keıin elde kóp balaly áıelderdiń narazylyǵy kúsheıdi. Olar áleýmettik kómekti kúsheıtýdi, turǵyn-úı máselesin sheshýdi talap etti.
Bokstan Sıdneı olımpıadasynyń chempıony, halyqaralyq baqylaýshylar synaǵan máslıhat saılaýynyń nátıjesinde depýtat bolǵan Ermahan Ibraımovtyń ústinen buǵan deıin belsendiler aryz túsirgen. Oǵan 10 qańtarda - ortalyq alańda polıııa ádil saılaýdy talap etken belsendilerdi qorshap turǵan kezde sportshynyń "usaq buzaqylyq jasap, narazylardyń plakatyn jyrtýy" sebep bolǵan.
