تالعار اۋدانىندا تۋىستار اراسىنداعى تۇسىنبەۋشىلىك ادام ولىمىنە اكەلدى، – دەپ حابارلايدى «ادىرنا» ۇلتتىق پورتالى Polisia.kz-كە سىلتەمە جاساپ.
16 اقپان كۇنى تالعار اۋدانى پوليتسيا بولىمىنە تۇزدىباستاۋ اۋىلىنداعى جانار-جاعارماي بەكەتى اۋماعىندا ەر ادامنىڭ ءمايىتى تابىلعانى تۋرالى حابار تۇسكەن. وقيعا ورنىنا شۇعىل جەتكەن ءتارتىپ ساقشىلارى قايتىس بولعان ادامنىڭ 1973 جىلى تۋعان بايبۇلاق اۋىلىنىڭ تۇرعىنى ەكەنىن انىقتاعان.
– قيناپ ءولتىرۋ بەلگىلەرى بار ەر ادامنىڭ ءمايىتى تابىلدى. وسىعان وراي، قر قىلمىستىق كودەكسىنىڭ 99-بابىنا سايكەس ادام ءولتىرۋ دەرەگى بويىنشا قىلمىستىق ءىس قوزعالدى. قىلمىسقا قاتىسى بار كۇدىكتىنى جەدەل انىقتاۋ شارالارى بارىسىندا 29 جاستاعى جىگىت ۇستالدى. سوتقا دەيىنگى تەرگەۋ امالدارى جۇرگىزىلۋدە. وزگە اقپارات تەرگەۋ قۇپيالىعىنا بايلانىستى تاراتىلمايدى، – دەدى تالعار اۋدانى پوليتسيا باسقارماسىنىڭ باستىعى جانبولات زيادين.
تەرگەۋ بارىسىندا كۇدىكتى قىلمىس جاساعانىن تولىعىمەن مويىنداعان. ونىڭ قايتىس بولعان ەر ادامعا جاقىن تۋىس ەكەنى انىقتالدى. كوپ ۋاقىتقا سوزىلعان تۋىستار اراسىنداعى كيكىلجىڭ وسى قىلمىسقا اكەپ سوققان.
– تەرگەۋ بارىسىندا 1992 جىلى تۋعان جىگىتتىڭ نەگە قىلمىسقا بارعانى انىقتالادى. تۋىسىمەن سوزگە كەلىسپەي قالعان ول اشۋعا بوي الدىرىپ، قولىنداعى پىشاقپەن دەنە جاراقاتىن سالعانى بەلگىلى بولدى. ءىس بويىنشا ءتيىستى ساراپتامالار تاعايىندالدى. كۇدىكتى ۋاقىتشا ۇستاۋ يزولياتورىنا قاماققا الىندى، – دەپ تولىقتىردى جانبولات زيادين.
«ادىرنا» ۇلتتىق پورتالى
