تۇركىستان وبلىسىندا كامەلەتكە تولماعان بالالاردى قاعىپ، وقيعا ورنىنان قاشىپ كەتكەن كۇدىكتى ۇستالدى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
كۇنى كەشە الەۋمەتتىك جەلى ارقىلى 14 اقپاندا تۇركىستان وبلىسى جەتىساي اۋدانىندا جاسى كامەلەتكە تولماعان بالالاردىڭ قاتىسۋىمەن جول-كولىك وقيعاسى ورىن الىپ، وعان كىنالى كۇدىكتىنىڭ ىزدەستىرىلىپ جاتقانى تۋرالى اقپار تاراتىلعان بولاتىن. بۇگىن جەرگىلىكتى پوليتسيا قىزمەتكەرلەرىنىڭ تياناقتى جۇمىسىنىڭ ناتيجەسىندە كۇدىكتى ۇستالدى.
ناقتىراق ايتار بولساق، 14 اقپاندا جەتىساي اۋداندىق پوليتسيا بولىمىنە اۋرۋحانادان ءتۇرلى دەنە جاراقاتتارىمەن ءۇش بىردەي كامەلەت جاسىنا تولماعان بالالاردىڭ جەتكىزىلگەنى تۋرالى حابارلاما كەلىپ تۇسكەن. وقيعا ورنىنا جەدەل جەتكەن پوليتسەيلەر سول كۇنى كەشكى ساعات 17:50 شاماسىندا جەتىساي قالاسىنداعى س.ەرۋباەۆ كوشەسى بويىندا بەلگىسىز اۆتوكولىك وڭتۇستىكتەن سولتۇستىك باعىتىنا قاراي ءجۇرىپ بارا جاتىپ، ءۇش ءجاسوسپىرىم بالانى سوعىپ كەتىپ، جول-كولىك وقيعاسىن جاساعانىن انىقتادى.
جول-كولىك وقيعاسى سالدارىنان ءۇش بالا دا اۋرۋحاناعا جەتكىزىلدى. ياعني 16 جانە 13 جاس شاماسىنداعى بالالار ءتۇرلى دەنە جاراقاتتارىمەن ەمحانادا ەم قابىلداسا، نەبارى ءتورت جاستاعى ءبۇلدىرشىن اۋىر دەنە جاراقاتىنىڭ سالدارىنان جانساقتاۋ بولىمىنە ءتۇسىپ، كوز جۇمدى.
اتالعان جايت جەتىساي اۋداندىق پوليتسيا بولىمىندە ەكى بىردەي باپپەن، قر قك-ءنىڭ 345-بابى (كولiك قۇرالدارىن باسقاراتىن ادامداردىڭ جول ءجۇرىسى نەمەسە كولiك قۇرالدارىن پايدالانۋ قاعيدالارىن بۇزۋى) جانە كۇدىكتىنىڭ وقيعا ورنىن تاستاپ كەتكەنى ءۇشىن قر قك-ءنىڭ 347-بابى (جول-كولiك وقيعاسى بولعان جەردەن كەتىپ قالۋ) بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە تىركەلدى.
بۇل قىلمىستى جەدەل اشۋ ماقساتىندا اۋدان پوليتسەيلەرى كۇدىكتىنى انىقتاۋعا قاتىستى جەدەل ىزدەستىرۋ جۇمىستارىن جۇرگىزدى. وقيعا ورنىن تياناقتى تەكسەرگەن ءتارتىپ ساقشىلارى سول ورىننان بەلگىسىز اۆتوكولىكتىڭ ارتقى جارىق شامدارىنىڭ سىنىقتارى مەن اينا سىنىقتارىن الدى. بۇل زاتتاردىڭ “اۋدي-100” ماركالى اۆتوكولىگىنە تيەسىلى جانە كولىكتىڭ ءتۇسى سۇر-قارا (موكرىي اسفالت) بولۋى ىقتيمال دەپ بولجانىپ، ىزدەستىرىلۋ جۇمىستارى جوعارى دەڭگەيدە اتقارىلدى. ناتيجەسىندە وقيعاعا قاتىستى كۇدىكتى رەتىندە جاسى قىرىق شاماسىنداعى جەتىساي قالاسىنىڭ جەرگىلىكتى تۇرعىنى قۇرىقتالدى. پوليتسەيلەردىڭ كولىككە قاتىستى جاساعان بولجامى دا راستالىپ، كۇدىكتىنىڭ “اۋدي 100” ماركالى اۆتوكولىگى بار ەكەنى انىقتالدى.
قازىرگى ۋاقىتتا ۇستالعان ازامات قاماۋدا، تەرگەۋ امالدارى جۇرگىزىلۋدە. ال كولىك ايىپتۇراققا قويىلدى. ساراپتامالار تاعايىندالدى.
«ادىرنا» ۇلتتىق پورتالى
