پاۆلوداردا جالعان قۇجات دايىنداۋمەن اينالىسقان ستۋدەنتتەر ۇستالدى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
– 2021 جىلعى 10 اقپاندا ينستاگرام الەۋمەتتىك جەلىcىنە مونيتورينگ جۇرگىزۋ بارىسىندا @hooligan.market پابليگىندە قر ءىىم قىزمەتكەرلەرىنىڭ قىزمەتتىك كۋالىكتەرىن دايىنداۋ جانە ساتۋ تۋرالى بەينەجازبا انىقتالدى. تەكسەرۋ بارىسىندا پاۆلودار قالاسىنىڭ ورتالىق پوليتسيا ءبولىمىنىڭ ۋچاسكەلىك پوليتسيا ينسپەكتورلارى پاۆلودار مەملەكەتتىك ۋنيۆەرسيتەتىنىڭ ەكى ستۋدەنتىن انىقتاپ، ۇستادى، ولار ۇيدە وتىرىپ، قولدان جاسالعان بەلگىلەرى بار قازاقستان رەسپۋبليكاسى ىشكى ىستەر ورگاندارى قىزمەتكەرلەرىنىڭ قىزمەتتىك كۋالىكتەرىن زاڭسىز دايىنداعان، – دەدى پاۆلودار وبلىسى پوليتسيا دەپارتامەنتى باستىعىنىڭ ورىنباسارى راشاد وتەۋوۆ.
پوليتسيا قىزمەتكەرلەرى جالعان قۇجاتتاردى قولدان جاساۋ، دايىنداۋ جانە ساتۋ فاكتىسى بويىنشا قازاقستان رەسپۋبليكاسى قك-ءنىڭ 385-بابىنىڭ 2-بولىگى بويىنشا سوتقا دەيىنگى تەرگەۋ باستالعانىن اتاپ ءوتتى.
«ادىرنا» ۇلتتىق پورتالى
