2021 جىلعى 7 اقپانداعى دەمالىس كۇنى اقمولا، شىعىس قازاقستان، قاراعاندى، سولتۇستىك قازاقستان وبلىستارىنداعى وبلىستىق جانە رەسپۋبليكالىق ماڭىزى بار اۆتوجولداردا قار قۇرساۋىنان 72 ادام قۇتقارىلىپ، 27 جەڭىل اۆتوكولىك شىعارىلدى. بۇل تۋرالى قر تجم رەسمي وكىلى تالعات ءۋالي مالىمدەدى، دەپ حابارلايدى «ادىرنا» ءتىلشىسى.
«اۆاريالىق-قۇتقارۋ جۇمىستارىن جۇرگىزۋگە تج دەپارتامەنتتەرىنىڭ، جەرگىلىكتى اتقارۋشى ورگانداردىڭ، جول قىزمەتتەرىنىڭ كۇشتەرى مەن قۇرالدارى جۇمىلدىرىلدى. سونىمەن قاتار، سولتۇستىك قازاقستان وبلىسىنىڭ قىزىلجار اۋدانىندا تجد كۇشىمەن شاحوۆسكوە اۋىلىنان 1994 جىلعى جۇكتى ايەل جەدەل جاردەم كولىگىنە جەتكىزىلدى»،-دەلىنگەن حابارلامادا.
ايتا كەتەيىك، اۋا-رايىنىڭ ناشارلاۋىنا بايلانىستى (كوكتايعاق، قار ارالاس جاڭبىر، تومەن قارلى بوران، كورۋ مۇمكىندىگى شەكتەۋلى) 6 اقپاننان باستاپ ەلىمىزدىڭ سەگىز وڭىرىندە اۆتوجولدار جابىلعان بولاتىن.
«ادىرنا» ۇلتتىق پورتالى
