1 اقپاندا ەلىمىزدە رەسەي فەدەراتسياسىندا وندىرىلگەن «سپۋتنيك V» ۆاكتسيناسىن ەگۋ ناۋقانى باستالعان بولاتىن. دەسە دە، پرەپارات رەسپۋبليكادا ءالى تىركەۋدەن وتپەگەن. بۇل مالىمەتتى دەنساۋلىق ساقتاۋ مينيسترلىگى راستادى، دەپ حابارلايدى «ادىرنا» ءتىلشىسى.
«ماسەلە قاراستىرىلىپ جاتىر. قۇرامىندا 22 مىڭ دوزا بار ۆاكتسينانىڭ ءبىرىنشى پارتياسى ەلگە اكەلىندى. سونىمەن قاتار، قاراعاندى فارماتسەۆتيكالىق كەشەنىندە پرەپاراتتىڭ تاجىريبەلىك سەرياسىن ءوندىرۋ ءۇشىن 6 مىڭ دوزا كولەمىندە سۋبستانتسيا العانىن بىلەسىزدەر. پارتيا گامالەيا اتىنداعى ەپيدەميولوگيا جانە ميكروبيولوگيا ينستيتۋتىنا ونىڭ تيىمدىلىگى مەن قاۋىپسىزدىگىن راستاۋ ءۇشىن جىبەرىلدى. ۆاكتسينا عىلىمي-زەرتتەۋ ورتالىعىمەن ماقۇلدانىپ، جوعارى تيىمدىلىك پەن قاۋىپسىزدىكتى كورسەتتى»،-دەدى دەنساۋلىق ساقتاۋ ءمينيسترىنىڭ ورىنباسارى ەرلان قياسوۆ.
بەلگىلى زاڭگەر كاميشا ەسمۇحامبەتقىزى Facebook جەلىسىندەگى رەسمي پاراقشاسىندا بۇل جاعدايعا قاتىستى پىكىرىن ءبىلدىردى.
«دەنساۋلىق ساقتاۋ ءمينيسترى تسوي الەكسەي ۆلاديميروۆيچتىڭ قىزمەتىن بوساتۋدى تالاپ ەتەمىن!مۇنداي سوراقىلىق تەك ءبىزدىڭ ەلدە عانا بار شىعار؟ بۇل ۆاكتسينا قازاقستان ەلىندە تىركەلمەگەن بولسا، قانداي نەگىزدەمەگە سۇيەنىپ، جاپپاي ادامدارعا سالىنىپ جاتىر؟ باسە، «دەنساۋلىق ساقتاۋ ءمينيسترىنىڭ ءىسى شالا» دەگەن ءسوزىم انىق دالەلىن تاپقانداي. ءبىز نە ءۇشىن سىناما لابوراتورياسىنىڭ تۇجىرىمىنا سەنىپ وتىرۋ كەرەكپىز، ولار نە ليتسەنزيالى ەكسپەرت پە؟ نەگە ادامدار تەكسەرىستەن وتپەي جاتىپ ەكپە الادى؟ سوندا ادام تاعدىرى ويىنشىق بولعانى ما؟
باسە، ءمينيستردىڭ ءوزى بۇل ەكپەنى الماي، قول استىنداعى باسشىلاردى پايدالانعانىن ەندى تۇسىنگەندەيمىن. جۋرناليستەر كوزىمىزدى اشپاسا، قۇجاتى تىركەلمەگەن ۆاكتسينانى الىپ، باسىمىزدى يزەپ وتىرا بەرەدى ەكەنبىز عوي. نە قازاقشا بىلمەيدى، نە دۇرىس تۇسىندىرمەيدى، نە ەكپەنى ءوزى ءبىرىنشى المايتىن ءمينيستردىڭ قاجەتى نە؟ ۇكىمەت بۇل ماسەلەنى قاداعالاماي، نە ىستەپ وتىر؟ ادامداردىڭ دەنساۋلىعىنا ءاتۇستى قارايتىن ءمينيستردىڭ تۇككە قاجەتى جوق. بوساتسىن ورنىن!
پرەزيدەنتىمىز جاقسى بولسىن دەيدى، ال قول استىنداعى مينيسترلەر ويىنا كەلگەنىن ىستەيتىن سياقتى. ۆاكتسينا ادام ومىرىنە اۋاداي قاجەت، الايدا قۇجاتتارى تىركەلمەگەن ۆاكتسينا زاڭسىز بولىپ ەسەپتەلەدى. بۇل كونتراباندالىق جولمەن اكەلىنبەسە ناق قازاقستاندا تىركەلۋگە ءتيىس. تسوي الدىڭعى ءمينيستردىڭ قاتەلىگىن قايتالاپ وتىرعانداي سەزىلەدى. ورنىنا حالىقتى ويلايتىن ادامدى تاعايىنداۋ قاجەت دەپ ەسەپتەيمىن»، — دەدى ول.
«ادىرنا» ۇلتتىق پورتالى
