سەيسەنبى كۇنى ۋكراينا پەرزيدەنتى ۆلاديمير زەلەنسكي «وپپوزيتسيالىق پلاتفورما - ءومىر ءۇشىن» (OPZH) پارتياسىنان سايلانعان جوعارعى رادانىڭ دەپۋتاتى تاراس كوزاك پەن وعان تيەسىلى «112 ۋكراينا» «NewsOne» جانە «ZIK» تەلەارنالارىنا سانكتسيا سالۋ تۋرالى جارلىققا قول قويدى دەپ حابارلايدى "ادىرنا" قلتتىق پورتالى Abai.kz پورتالىنا سىلتەمە جاساپ.
سانكتسياعا سايكەس، اكتيۆتەردى بۇعاتتاۋ، ساۋدا وپەراتسيالارىن شەكتەۋ، ۋكراينادان كاپيتالدىڭ شىعارىلۋىنا جول بەرمەۋ جانە باعالى قاعازدارمەن وپەراتسيالارعا تىيىم سالىنعان.
بۇعان دەيىن ۋكراينانىڭ ۇلتتىق قاۋىپسىزدىك جانە قورعانىس كەڭەسىنىڭ حاتشىسى الەكسەي دانيلوۆ جوعارعى راداعا پروپاگاندامەن اينالىساتىن بۇقارالىق اقپارات قۇرالدارىنىڭ جۇمىسىنا قاتىستى زاڭنامانى قاتاڭداتۋ تۋرالى وتىنىشپەن جۇگىنەتىنىن مالىمدەگەن.
ول ساۆيك شۋستەردىڭ «ءسوز بوستاندىعى» ەفيرىندە:
«بىزدە ءوز مەملەكەتىمىزدى قورلاۋمەن اينالىساتىن ارنالار بار. وكىنىشكە وراي، قولدانىستاعى زاڭناما ولارعا اسەر ەتە المايدى. مۇنداي ارنالار، وكىنىشكە قاراي، ءبىزدىڭ ەلدە وتە كوپ. ولاردىڭ بارلىعى ۋكراين حالقىنان تالان-تاراجعا تۇسكەن سالىق ەسەبىنەن قارجىلاندىرىلادى. ولار تاڭەرتەڭنەن كەشكە دەيىن حالىقتىڭ ميىن ۋلاپ جاتىر», - دەدى دانيلوۆ.
ال، تاراس كوزاك رەسمي تۇردە يەلىك ەتەتىن ءۇش كانالدى ءىس جۇزىندە «وپپوزيتسيالىق پلاتفورما - ءومىر ءۇشىن» (OPZH) پارتياسى ساياسي كەڭەسىنىڭ جەتەكشىسى ۆيكتور مەدۆەدچۋك باقىلايدى ەكەن. ۋكراينالىق اقپارات قۇرالدارىندا ۆيكتور مەدۆەدچۋك رەسەي پرەزيدەنتىنىڭ قۇداسى ەكەنى ايتىلادى.
كەشە ول تەلەارنالارعا سالىنعان سانكتسيالاردى زاڭسىز دەپ اتادى. جانە مۇنداي شەشىم ءۇشىن پرەزيدەنت زەلەنسكي جاۋاپكەرشىلىككە تارتىلۋى كەرەك دەپ سانايدى.
- «ۆلاديمير زەلەنسكي «112 ۋكراينا» «NewsOne» جانە «ZIK» تەلەارنالارىنا قارسى سانكتسيالار قولداندى. بۇل شەشىم مۇلدە زاڭسىز.
زەلەنسكيدىڭ اينالاسىنداعىلار مەن مۇحيتتىڭ ارعى جاعىنداعى قوجايىندارى ونىڭ قولىمەن اقپاراتتىق كەڭىستىكتى وپپونەنتتەرىنەن تازارتىپ جاتىر. پرەزيدەنتتى ءوز ايتقاندارىنا سەندىرىپ، زاڭعا قايشى شەشىم شىعارتتى. بىراق مۇنداي شەشىم ءۇشىن جاۋاپكەرشىلىك بارىن ءبىلۋى كەرەك»,- دەدى مەدۆەدچۋك.
ءسويتىپ، «وپپوزيتسيالىق پلاتفورما - ءومىر ءۇشىن» پارتياسى (OPZH) پرەزيدەنت ۆلاديمير زەلەنسكيدى دەموكراتيا مەن ءسوز بوستاندىعىن شەكتەدى دەپ ايىپتاپ، يمپيچمەنت جاريالاۋ پروتسەسىن باستايتىنىن مالىمدەگەن.
الايدا، ۋكراينا پرەزيدەنتى ءسوز بوستاندىعىن قولدايتىنىن، الايدا رەسەيلىك پروپاگانداعا جول بەرىلمەيتىنىن العا تارتتى. ول تۆيتتەر پاراقشاسىندا:
«سانكتسيا سالۋ - قاتاڭ شەشىم. ۋكراينا ءسوز بوستاندىعىن قولدايدى. بىراق ءبىزدىڭ ەلگە قارسى اگرەسسور قارجىلاندىراتىن ۇگىت-ناسيحاتتى قولداي المايدى. بۇل ۋكراينانىڭ ەۋروپالىق جانە ەۋرواتلانتيكالىق ينتەگراتسياعا بارار جولىنا كەدەرگى كەلتىرەدى.
تاۋەلسىزدىك ءۇشىن كۇرەس - بۇل سونداي-اق، ەۋرو قۇندىلىقتار مەن اقپاراتتىق سوعىستاعى شىندىق ءۇشىن كۇرەس»,- دەپ جازدى.
سونداي-اق، ول بۇگىن «ۇلكەن جەتىلىك» جانە ەۋروپالىق وداق وكىلدەرىمەن كەزدەسۋىندە بۇل شەشىمنىڭ ءسوز بوستاندىعىنا شابۋىل ەمەس، ۇلتتىق قاۋىپسىزدىكتى قورعاۋعا نەگىزدەلگەن شەشىم ەكەنىن ايتتى.
- «بۇل ەموتسيونالدى شەشىم ەمەس، ول جەتىلىپ، ۇزاق ۋاقىت بويى ۋكراينالىق مەملەكەتتىك ورگانداردىڭ اقپاراتى نەگىزىندە دايىندالعان.
بۇل ءسوز بوستاندىعىنا ەشقانداي شابۋىل ەمەس، بۇل ۇلتتىق قاۋىپسىزدىكتى قورعاۋعا نەگىزدەلگەن شەشىم»،- دەدى ۋكراينا پەرزيدەنتى.
ول سونداي-اق، مەدۆەدچۋكتىڭ يەلىگىندەگى ارنالاردىڭ مەملەكەت قاۋىپسىزدىگىن بۇزۋعا جانە ۋكراينانىڭ ەۋروپالىق وداق پەن ناتو-عا ينتەگراتسيالانۋىنا باعىتتالعان ارەكەتتەرىنە قارسى اقپاراتتىق شابۋىل جاساعانىن ايتتى.
