پرەزيدەنت قاسىم-جومارت توقاەۆتىڭ قازاق ءتىلىن جەتىك مەڭگەرمەگەن وتانداستارىمىزعا جاساعان ۇندەۋىنەن كەيىن، KAZGUU ۋنيۆەرسيتەتى مەملەكەتتىك ءتىلدى قولداۋ ماقساتىندا تەگىن اۋىزەكى سويلەۋ كلۋبىن اشتى، دەپ حابارلايدى «ادىرنا» ءتىلشىسى ۋنيۆەرسيتەتتىڭ ءباسپاسوز قىزمەتىنە سىلتەمە جاساپ.
«مەملەكەتتىك ءتىلدى ءبىلۋ – قازاقستاننىڭ ءاربىر ازاماتىنىڭ پارىزى. مىندەتى دەپ تە ايتۋعا بولادى. وسى ورايدا مەن بارشا قازاقستاندىقتارعا، ونىڭ ىشىندە قازاق ءتىلىن ءالى جەتە مەڭگەرمەگەن وتانداستارىما ۇندەۋ تاستاعىم كەلەدى. حالقىمىزدا «ەشتەن كەش جاقسى» دەگەن ءسوز بار. ەڭ باستىسى، ىنتا بولۋى كەرەك»، – دەگەن بولاتىن پرەزيدەنت 2021 جىلدىڭ 6 قاڭتارىندا «ەگەمەن قازاقستان» گازەتىندە جاريالانعان ماقالاسىندا.
«ءبىز 2020 جىلدىڭ سوڭىندا اعىلشىن ءتىلىن وقىتاتىن الەۋمەتتىك جوبا باستاعان بولاتىنبىز. سونىڭ نەگىزىندە يدەياسى وزگەشە «كەل، قازاقشا سويلەسەيىك!» كلۋبى قۇرىلىپ وتىر. مۇندا ساباق ۇلتتىق مەنتاليتەت، تاريح پەن فولكلوردىڭ ەرەكشەلىكتەرىن، قازاق حالقىنىڭ قۇندىلىقتارى مەن باسىمدىقتارىن ەسكەرە وتىرىپ، ارنايى ادىستەمە بويىنشا وتكىزىلەدى. اۋىزەكى سويلەۋ كلۋبىنىڭ مۇشەلەرى الەۋمەتتىك ماڭىزى بار ماسەلەلەر مەن قوعامنىڭ وزەكتى تاقىرىپتارىن تالقىلايدى»، - دەدى م.س. نارىكباەۆ اتىنداعى كازگيۋ جوعارى گۋمانيتارلىق مەكتەبىنىڭ ديرەكتورى انار يبراەۆا.
ۋنيۆەرسيتەت ءباسپاسوز قىزمەتىنىڭ حابارلاۋىنشا، ساباق اپتاسىنا ەكى رەت ZOOM پلاتفورماسىندا جانە وفلاين فورماتتا وتەدى. العاشقى ساباق 21 قاڭتار كۇنى ساعات 17:00-دە باستالادى. قىزىعۋشىلىق تانىتقان كەز كەلگەن ادام سىلتەمە http://bit.ly/qazsoile ارقىلى ءوتىپ، قازىردەن باستاپ جوباعا تىركەلە الادى.
ەلوردالىق ۋنيۆەرسيتەتتىڭ سايتىندا كلۋب جۇمىسىنا قازاق تىلىندە سويلەۋ داعدىسىن جەتىلدىرگىسى كەلەتىن كەز كەلگەن ادام قاتىسا الاتىنى جازىلعان. كلۋب مۇشەلەرىنىڭ جاس ەرەكشەلىگى، قازاق ءتىلىن ءبىلۋ دەڭگەيى ماڭىزدى ەمەس. تەگىن كۋرستى بىلىكتى ماماندار جۇرگىزەدى.
«ادىرنا» ۇلتتىق پورتالى
