تانىمال بوكسشى ەرماحان يبرايموۆ سايلاۋ كۇنى تاۋەلسىزدىك الاڭىندا بولعان جايتقا قاتىستى تۇسىنىكتەمە بەردى، دەپ حابارلايدى «ادىرنا» ءتىلشىسى. ول بۇل تۋرالى Instagram جەلىسىندەگى رەسمي پاراقشاسىندا جازدى.
«قۇرمەتتى وتانداستار! وسى ۋاقىتقا دەيىن مەن حالقىممەن بىرگە بولدىم جانە ءالى دە بىرگە بولاتىنىمدى ايتقىم كەلەدى. ميتينگ كەزىندە نارازىلىق بىلدىرگەن حالىققا كۇش كورسەتۋ ماقساتىندا ەمەس، سابىرعا شاقىرۋ ءۇشىن بارعان بولاتىنمىن. بىراق قارسى توپتاردىڭ بەلسەندىلەرى ماعان كەرى پىكىر ءبىلدىرىپ، مەنىڭ جەكە نامىسىما تيەتىن سوزدەر ايتىپ جاتقاسىن، جاقىنداپ بارىپ، ءبارىن تۇسىندىرمەكشى بولدىم. سول تۇستا قارسى توپتاردىڭ ارانداتۋشىلارى مەنى كادرعا الىپ، ءتۇرلى باعىتتا اقپاراتتار تاراتىپ جىبەرگەن بولاتىن»،-دەدى ول.
سونداي-اق، سيدنەي وليمپياداسىنىڭ جەڭىمپازى جازىلعان پىكىرلەرگە سىني تۇرعىدان قارايتىنىن جەتكىزدى.
«ءيا، الەۋمەتتىك جەلىلەردە سۋرەتىم مەن ۆيدەو تاراپ كەتىپ، ماعان كەرى پىكىرلەر ايتىلۋدا. ونىڭ ءبارىن سىني تۇرعىدا قابىلدايمىن.
الايدا مەن وسى سايلاۋعا قاتىسۋىمنىڭ سەبەبى دە قاراپايىم حالىق ءۇشىن ەكەنىن تاعى دا ايتقىم كەلەدى. سەبەبى توبەمە كوتەرىپ، قۇرمەتتەگەن حالىققا قارسى شىعۋ مەنىڭ ويىمدا دا بولماعان!
سوندىقتان قادىرلى قازاق ەلى، ميتينگ كەزىندە بولعان جاعدايدى قىسقاشا وسىلاي تۇسىندىرگىم كەلەدى. بارلىعى الدا. ەل مۇددەسى ءۇشىن الدا ءالى دە يگىلىكتى ىستەردى اتقاراتىن بولامىن»،-دەپ ءسوزىن قورىتىندىلادى سپورتشى.
«ادىرنا» ۇلتتىق پورتالى
