بۇگىن وقۋ جىلىنىڭ ءۇشىنشى توقسانى باستالدى. الايدا، قر پارلامەنتى ءماجىلىسى مەن ءماسليحاتتار سايلاۋىندا سايلاۋ ۋچاسكەلەرى رەتىندە تارتىلعان ءبىلىم بەرۋ نىساندارىنداعى دەزينفەكتسيالىق ءىس-شارالاردىڭ سالدارىنان جاڭا توقساننىڭ ءبىرىنشى وقۋ كۇنىندە ساباقتار قاشىقتىقتان وتەدى، دەپ حابارلايدى «ادىرنا» ءتىلشىسى اكىمدىكتىڭ رەسمي سايتىنا سىلتەمە جاساپ.
ەلىمىزدە 12 قاڭتاردان باستاپ وففلاين رەجيمدە وقىتۋ جالعاسادى. ايتا كەتەيىك، ءۇشىنشى توقساندا 1-5 سىنىپ وقۋشىلارى «كەزەكشى سىنىپ» رەجيمىندە وقۋىن جالعاستىرادى.
سونىمەن قاتار، ءۇشىنشى توقساندا ءبىتىرۋشى سىنىپتار (9, 11, 12-سىنىپتار) كەزەكشى سىنىپتار قاعيداتى بويىنشا ارالاس فورماتتا (15 ادامنان ارتىق ەمەس) وقيدى.
وففلاين ساباقتار كەستەسىنە ينۆاريانتتى كومپونەنت پاندەرى كىرەدى: ورىس ءتىلى مەن ادەبيەتى، قازاق ءتىلى مەن ادەبيەتى، شەت ءتىلى، الگەبرا، گەومەتريا، فيزيكا، حيميا، بيولوگيا، گەوگرافيا، قازاقستان تاريحى جانە دۇنيەجۇزى تاريحى. بۇل وقۋ پاندەرىنىڭ 70%-ىن قۇرايدى.
قالعان 30% پاندەر — ينفورماتيكا، ءوزىن-ءوزى تانۋ، دەنە شىنىقتىرۋ، قۇقىق نەگىزدەرى، العاشقى اسكەري جانە تەحنولوگيالىق دايىندىق قاشىقتىق فورماتتا وتەدى.
مەكتەپتەر يكەمدى كەستەلەر ازىرلەيدى، ساباقتار اراسىنداعى وزگەرىستەر ءار ءتۇرلى سىنىپتار ءۇشىن ءتۇرلى ۋاقىتتا وتەدى، الەۋمەتتىك قاشىقتىق ءۇشىن اۋىسىمدار مەن كىشى اۋىسىمدار كوبەيەدى. ءبىر ساباقتىڭ ۋاقىتى 5 مينۋتتىق ۇزىلىسپەن 30 مينۋتتان اسپايدى.
ايتا كەتەيىك، 3 توقساندا 70 مىڭعا جۋىق وقۋشى مەكتەپكە بارادى.
«ادىرنا» ۇلتتىق پورتالى
