الەمدە كوروناۆيرۋس ينفەكتسياسى بويىنشا جاعداي ءالى دە قيىن بولىپ تۇر. 220 ەلدە 84 ملن ادام كۆي جۇقتىرعان، ونىڭ 1 ملن 840-ى قايتىس بولدى، دەپ حابارلايدى «ادىرنا» ءتىلشىسى دەنساۋلىق ساقتاۋ مينيسترلىگىنىڭ ءباسپاسوز قىزمەتىنە سىلتەمە جاساپ.
ال قازاقستان قازىر قاۋپى تومەن جاسىل ايماقتا تۇر. الايدا، اتىراۋ وبلىسى اسا قاۋپتى - قىزىل ايماقتا. التى ءوڭىر: پاۆلودار، اقمولا، قوستاناي، سولتۇستىك قازاقستان وبلىسى جانە نۇر-سۇلتان، الماتى قالالارى سارى ايماقتا. بۇگىن ورتالىق كوممۋنيكاتسيالار قىزمەتىندە وتكەن بريفينگتە قر دەنساۋلىق ساقتاۋ ءمينيسترى الەكسەي تسوي ەلىمىزدەگى كوروناۆيرۋسقا قاتىستى ەپيدجاعداي جايلى حاباردار ەتتى.
«ەلىمىزدە 156 943 ناۋقاس COVID-19 جۇقتىرعان جانە 45 946 ادامعا كۆي- دياگنوزى قويىلعان. پاتسيەنتتەردىڭ 87% ىندەتتەن جازىلىپ شىققان، ال ماۋسىم-شىلدە ايىندا ايىققاندار قاتارى 60% اسپايتىن»، -دەدى مينيستر.
بيىل 3 قاڭتارىنداعى جاعداي بويىنشا ەلىمىزدە 18 608 ينفەكتسيالىق توسەك-ورىن بار، ونىڭ ىشىندە 4 980 توسەك-ورىندا ناۋقاس جاتىر. رەانيماتسيا بولىمشەسىندەگى پاتسيەنت سانى - 320, وتكەن ايمەن سالىستىرعاندا 1,3 ەسەگە ارتتى (3 قاراشاعا -253).
وقۋ جىلىنىڭ باسىنان 3 972 وقۋشى كۆي جۇقتىردى، ونىڭ 1047-ءى كەزەكشى سىنىپتاردا وقيتىن بالا، 2925-ءى قاشىقتىقتان ءبىلىم الادى.
مينيستر ءسوز سوڭىندا ەل ازاماتتارىنا ەپيدەميولوگيالىق جاعدايعا جاۋاپكەرشىلىكپەن قاراپ، ساقتىق شارالارىن بۇزباۋعا شاقىردى.
«پاندەميا ءالى دە جالعاسۋدا، وكىنىشكە قاراي ۆيرۋستى تولىق جەڭگەن جوقپىز، سوندىقتان جاعدايعا بارىنشا جاۋاپكەرشىلىكپەن قاراۋعا شاقىرامىن. وزگەلەرگە ىندەت جۇقتىرماۋ ءۇشىن، جۇقتىرىپ الماۋ ءۇشىن مىندەتتى تۇردە ماسكا كيىڭىزدەر، الەۋمەتتىك اراقاشىقتىق پەن گيگيەنا تالاپتارىن ساقتاڭىزدار»، - دەدى ا.تسوي.
«ادىرنا» ۇلتتىق پورتالى
