كوروناۆيرۋستىق ينفەكتسياعا قارسى Moderna ۆاكتسيناسىنىڭ پارتياسىن قاساقانا بۇزعان مەديتسينالىق ورتالىقتىڭ قىزمەتكەرى اقش-تىڭ ۆيسكونسين شتاتىندا قاماۋعا الىندى. بۇل تۋرالى «ادىرنا» ۇلتتىق پورتالى informburo.kz-كە سىلتەمە جاساي وتىرىپ حابارلايدى.
Aurora Health Care مەديتسينالىق مەكەمەلەر جەلىسىنىڭ بۇرىنعى قىزمەتكەرى ءتۇنى بويى ساقتاۋ كامەراسىنان تىس 570 دوزا ۆاكتسينانىم ادەيى قالدىرعان. ول وسىدان كەيىن پرەپارات تيىمدىلىگىن جوعالتاتىنىن بىلگەن.
وعان ۆاكتسينانى قاساقانا بۇزدى، 8 مىڭنان 11 مىڭ دوللارعا دەيىن ماتەريالدىق شىعىن كەلتىردى، سونداي-اق باسقا ادامداردىڭ دەنساۋلىعىنا قاۋىپ توندىرەتىن ارەكەتتەر جاسادى دەگەن ايىپ تاعىلدى.
باسىندا فارماتسەۆت باسقا ءدارى-دارمەكتەردى العاندا ۆاكتسينانى كەزدەيسوق توڭازىتقىشتان تىس قالدىردىم دەگەن بولاتىن، بىراق كەيىنىرەك ول پرەپاراتتى ادەيى بۇلدىرگەندىگىن جانە وسىنداي ارەكەتىن بىرنەشە رەت جاساعانىن مويىندادى.
"بۇرىنعى قىزمەتكەر ۆاكتسينانى ساقتاۋ كامەراسىنان ادەيى شىعارعانىن مويىندادى. ول بۇلىنگەن ۆاكتسيناتسيالاردىڭ پايداسىز بولاتىنىن جانە ءىس جۇزىندە ولاي بولماسا دا، ۆاكتسينا العان ادامدار وزدەرىن ۆاكتسينا قابىلدادىق دەپ ويلايتىندارىن ءبىلدى.", – دەلىنگەن پوليتسيا حابارلاماسىندا.
Aurora Health Care مەديتسينالىق ورتالىعىندا بۇلىنگەن ۆاكتسينانى سالعان 57 ادامعا بولعان جاعداي تۋرالى حابارلاندى. ولاردىڭ دەنساۋلىعىنا قاۋىپ ءتونىپ تۇر دەپ ايتۋعا نەگىز جوق، دەپ اتاپ ءوتتى ورتالىق.
