بەلگىلى جۋرناليست پەريزات مىرزاحمەت ءوزىنىڭ ينستاگرام پاراقشاسىندا ءانشى ديماش قۇدايبەرگەنگە ارناپ جازبا قالدىردى دەپ جازادى «ادىرنا» ۇلتتىق پورتالى. ءجۋرناليستىڭ جازباسىنان تۇسىنگەنىمىز، ديماش رەسەيلىك اقپارات قۇرالدارىنا سۇحبات بەرۋ بارىسىندا ۇساق دۇنيەلەردى ءسوز ەتىپ، قازاقستاندا كىمگە وكپەلى ەكەنىن ايتقان.
تومەندە جۋرناليست پەريزات مىرزاحمەتتىڭ جازباسىن وزگەرىسسىز نازارلارىڭىزعا ۇسىنىپ وتىرمىز. «ەح، ديماش... @kudaibergenov.dimash سەن باعىم مەن ريناتتا كەتكەن وكپەڭدى ايتامىن دەپ تۇتاس ەلدى تىزە بۇكتىردىڭ عوي. اسۇيدە ايتاتىن رەنىشىڭدى اتاسى باسقا، ماقساتى باسقانىڭ الدىندا جىرلاعانىڭ قاي ساسقانىڭ؟ باسكوۆ پەن لازارەۆ، مالاحوۆ جانى اشىپ ايتتى دەپ ارقاڭنىڭ قىشۋى قاندى ما؟ ءالى بالاسىڭ، بالا بولعان سوڭ شالاسىڭ.
قىتايدىڭ تورىندە «سامالتاۋدى» ايتقان بالانىڭ باسى بار شىعار دەپ سەندىم. سويتسەم سەنگەن قويىم كەبەك بەرگەننىڭ ۇيىنە قاراپ كۇيسەپ ءجۇر ەكەن عوي.
40 جىل بۇرىن بولعان «ساز الەمى»، ءوزىڭ ايتقانداي 17 جاسىڭدا بولعان ەسكى بوقتا باعىم مۇحيتدينوۆا 100% دۇرىس ايتتى. داۋىس قابىلەتىڭ مەن ارزانقول ءان ەكى جاقتا لاعىپ جاتتى. قۇلاعى باردىڭ ءبارى ەستىدى. ول كەزدە سەندە نە تاجىريبە، نە سەنىم، نە قولداۋ جوق ەدى. قۇدايدىڭ بەرگەن تالانتىنا سەنىپ شىعىپ ەدىڭ ساحناعا. شيكى ەدىڭ. راس، رينات زايىتوۆ ەزدى. «قاتىنداۋىستى ەركەك» دەپ ءوزىنىڭ سەكسيستىك بيىگىنەن ايتتى. ونىمىزدى قاتەلىك دەپ مويىندادىق. سەن ءالى وكپەلىسىڭ.
قىتايعا بارعان ديماش باسقا ديماش. جۇمىس ىستەگەن، دايىندالعان، بالەنباي ماماننىڭ كومەگىمەن ءستيلى مەن مانەرىن وزگەرتكەن، تولىسقان ءانشى بولدىڭ. الەم سەنى سولاي تانىدى. «ساز الەمىندەگى» شيكى كۇيىڭمەن بارساڭ، سول كەزدەگى اندەرىڭدى ايتساڭ، يتشە تالاپ، مازاققا اينالدىرار ەدى... ماسەلە سەنىڭ تالانتىڭدى تانىماعان قازاقتا ەمەس، ەلىمىزدى ءشىرىتىپ جاتقان جەمقورلىقتا ەدى. سەنى سۇيكىمدى شىعارار ستيليست پەن ۆوكاليستەر بىزدە دە بار، الايدا ولاردا ونداي قارجى مەن ۋاقىت جوق. ءوز قوتىرلارىن وزدەرى قاسىپ جۇرگەن جاندار.
قايسىبىرىن ايتايىن... تاڭ اتپاي ادامدى جىلاتىپ قويدىڭ عوي. جەرىمىزگە كوزىن الارتىپ، «كوكەلىگىمدى تانىتام، تىزەمدى باتىرام» دەپ وتىرعان ەلگە بارىپ باسىڭدى ءيىپ كەلدىڭ. «سول سىننىڭ ارقاسىندا ءوستىم، ەنەسى تەپكەن قۇلىننىڭ ەتى كوگەرمەيدى» دەپ باعىمدى ەمەس، ەلىڭدى قورعاساڭ ازامات بولار ەدىڭ. بىراق سەن ءالى وكپەنىڭ ولەڭىن ايتىپ جۇرگەن بالاسىڭ.
ماعان دايرەكتە نەگەلەپ جاتقاندار، شىنىمەن تۇسىنبەيسىڭدەر مە؟ شىنىمەن ويلانبايسىڭدار ما؟ شىنىمەن سونشا تايازسىڭدار ما؟»
فوتو اشىق دەرەككوزدەن الىندى.
