«جاڭا جىل» دەسە كوز الدىمىزعا جاسىل شىرشا، ءتۇرلى ءتۇستى، جالت-جۇلت ەتكەن گيرلياندالار، جان-جاعىنا ۇشقىن شاشقان بەنگال شىراقتارى، كوزدىڭ جاۋىن الاتىن وتشاشۋلار، ءتۇرلى عاجايىپ ەرتەگىلەر مەن سىيلىقتار ەلەستەيتىنى راس. دەسەك تە،«جاڭا جىل» مەرەكەسىن لايىقتى ءارى قاۋىپسىز تۇردە اتاپ ءوتۋ ءۇشىن ورت قاۋىپسىزدىگى ەرەجەلەرىنە كوڭىل ءبولىپ، ساقتىق شارالارىن ەستە ساقتاۋ قاجەت.
فەيەرۆەركتەر، وتشاشۋلار، حلوپۋشكالار مەن بەنگال شىراعى - قىسقى مەرەكە الدىنداعى تانىمال تاۋارلار. مۇنداي زاتتاردىڭ قۇرامىندا حيميالىق قوسپالار كوپ جانە ولاردى جاساۋ بارىسىندا پوروح، مەتالدىڭ بەلگىلى ءبىر مولشەرى قولدانىلادى. ەگەر پايدالانۋ ەرەجەسىن دۇرىس ساقاتاماعان جاعدايدا نەمەسە مەرزىمى وتكەن پيروتەحنيكانىڭ سالدارىنان ءورت نەمەسە باسقا دا وكىنىشتى وقيعا بولۋى مۇمكىن. كوشەدە ساپاسىز، قاۋىپتى تاۋارلاردى ساتۋى مۇمكىن، سوندىقتان پيروتەحنيكالىق بۇيىمداردى تەك مامانداندىرىلعان ساۋدا نۇكتەلەرىنەن ساتىپ العان دۇرىس.
«جاڭا جىل» مەرەكەسى قاساڭىندا قايعىلى ءورت وقيعالاردىڭ الدىن الۋ مەن بولدىرماۋ ماقساتىندا اقمولا وبلىسىندا اينالاسى 4 كۇن ىشىندە پيروتەحنيكا ساتۋشىلاردى تەكسەرۋگە 60 شاقتى رەيد ۇيىمداستىرىلىپ، بىرقاتار كاسىپكەرلەر جاۋاپكەرشىلىككە تارتىلدى.
ولار پيروتەحنيكالىق زاتتاردى ارنايى قۇجاتسىز ساتقان بولىپ شىققان. زاڭ بۇزعان كاسىپ يەلەرىنىڭ ارقايسىسىنا 70 مىڭ تەڭگەگە جۋىق ايىپپۇل سالىنىپ، تاۋارلارى تاركىلەنگەن. «مۇنىڭ ءبارىن ءبىز وقىس وقيعالاردىڭ الدىن الۋ ءۇشىن جاساپ وتىرمىز» دەيدى قۇزىرلى ورگانداردىڭ ماماندارى. ابىروي بولعاندا ايماقتا بىلتىر جانە بيىل وتشاشۋدىڭ سەبەبىنەن قايعىلى جاعدايلار بولماعان.
– رەيدتەر «جاڭا جىل» مەرەكەسى اياقتالعانشا جالعاسادى. مۇنداي زاتتار ارنايى دۇكەندەردە عانا ساتىلۋى ءتيىس. ءارى ساتۋ ءۇشىن تاۋارعا سايكەستىك سەرتيفيكاتى بولۋى كەرەك. ولاي بولماعان جاعدايدا، مۇنداي پيروتەحنيكالىق بۇيىمدار تاركىلەنەدى، - دەيدى وبلىستىق توتەنشە جاعداي وكىلدەرى.
دۋمان ارعىنگەلدى،
«ادىرنا» ۇلتتىق پورتالى
