Otshashýmen oınamańyz

2125
Adyrna.kz Telegram

«Jańa jyl» dese kóz aldymyzǵa jasyl shyrsha, túrli tústi, jalt-jult etken  gırlıandalar, jan-jaǵyna ushqyn shashqan bengal shyraqtary, kózdiń jaýyn alatyn otshashýlar, túrli ǵajaıyp ertegiler men syılyqtar elesteıtini ras. Desek te,«Jańa jyl» merekesin laıyqty ári qaýipsiz túrde atap ótý úshin  órt qaýipsizdigi erejelerine kóńil bólip, saqtyq sharalaryn este saqtaý qajet.

Feıerverkter, otshashýlar, hlopýshkalar men bengal shyraǵy - qysqy mereke aldyndaǵy tanymal taýarlar. Mundaı  zattardyń  quramynda hımııalyq qospalar kóp jáne olardy jasaý barysynda poroh, metaldyń belgili bir mólsheri qoldanylady. Eger paıdalaný erejesin durys saqatamaǵan jaǵdaıda  nemese merzimi ótken pırotehnıkanyń saldarynan órt nemese  basqa da ókinishti oqıǵa bolýy múmkin. Kóshede sapasyz, qaýipti taýarlardy satýy múmkin, sondyqtan pırotehnıkalyq buıymdardy tek mamandandyrylǵan saýda núktelerinen satyp alǵan durys.

«Jańa jyl» merekesi qasańynda qaıǵyly órt oqıǵalardyń aldyn alý men  boldyrmaý maqsatynda Aqmola oblysynda aınalasy 4 kún ishinde pırotehnıka satýshylardy tekserýge 60 shaqty reıd uıymdastyrylyp, birqatar kásipkerler jaýapkershilikke tartyldy.

Olar pırotehnıkalyq zattardy arnaıy qujatsyz satqan bolyp shyqqan. Zań buzǵan kásip ıeleriniń árqaısysyna 70 myń teńgege jýyq aıyppul salynyp, taýarlary tárkilengen. «Munyń bárin biz oqys oqıǵalardyń aldyn alý úshin jasap otyrmyz» deıdi quzyrly organdardyń mamandary. Abyroı bolǵanda aımaqta byltyr jáne bıyl  otshashýdyń sebebinen qaıǵyly jaǵdaılar bolmaǵan.

– Reıdter «Jańa jyl» merekesi aıaqtalǵansha jalǵasady. Mundaı zattar arnaıy dúkenderde ǵana satylýy tıis. Ári satý úshin taýarǵa sáıkestik sertıfıkaty bolýy kerek. Olaı bolmaǵan jaǵdaıda, mundaı pırotehnıkalyq buıymdar tárkilenedi, - deıdi oblystyq tótenshe jaǵdaı ókilderi.

 

Dýman Arǵyngeldi,

«Adyrna» ulttyq portaly

 

Pikirler