ولجاس ءابىل: قاتتى ۇيالىپ ءجۇرمىن

2806
Adyrna.kz Telegram
وتكەندە تۇرىك جاستارى "قازاقستان جالعىز ەمەس" دەگەن فلەشموب ۇيىمداستىرىپ بىزگە قولداۋىن كورسەتىپ جاتىر، ىزگى نيەتتەرى ءۇشىن ولارعا ۇلكەن العىس ارينە. ول ءبىز ءۇشىن ۇلكەن دەمەۋ بوپ قالدى.
يۋتۋبتە جۇرگەن سول روليكتىڭ كورىلىمى 200 مىڭنان اسىپتى.
ەندى كەشە سول روليكتىڭ استىنداعى پىكىرلەردى وقىپ وتىرسام ورىسشا كوممەنتتەر بىقىپ ءجۇر ەكەن...
قۇداي بىلەدى، سونى جازىپ وتىرعان ءوزىمىزدىڭ قاراگوز قازاقتار.
جالپى، تۇركى حالىقتارى ءبىزدى سىيلاسا "ورتاق اتاجۇرتتاعى شاڭىراقتاعى ءتىلىن، ءدىلىن، سالت - ءداستۇرىن ساقتاپ وتىرعان باۋىرلارىمىز" دەپ قانا سىيلايدى.
مەنىڭشە بىزگە وسىنى ءتۇسىنۋ كەرەك سياقتى.
ايتپەسە ولارعا ءتۇرى عانا قازاق، ءوزى ءورىستىلدى، ءورىسدىلدى حالىقتى باۋىرعا تارتىپ اعايىن بولۋدىڭ كوكتيىنعا دا قاجەتى جوق.
مەن التاي تاۋىنىڭ ماڭىن مەكەندەگەن رەسەيدەگى بىزگە باۋىرلاس تۇركى حالىقتارىنىڭ قاتتى ورىستانىپ كەتكەنىن بىلەمىن. ولار ءوز تاريحىن دا ورىستىڭ كوزىمەن وقيدى.
ءالى كۇنگە شەيىن ەكىنشى دۇنيەجۇزىلىك سوعىستا ورىس ءۇشىن قانشا باتىرى سوعىسىپ جان بەرگەنىن، قان بەرگەنىن ماقتان تۇتادى.
ورىسشا سويلەيتىندىگىن دارەجە كورەدى. ءسوز اراسىندا ورىس كلاسسيكتەرىنەن ءۇزىندى كەلتىرىپ، بىلىمدىلىگىن بايقاتىپ تىراشتانىپ جاتادى. سونى وزدەرى مادەنيەتتىڭ شىڭى دەپ بىلەدى.
ءبىر سوزبەن ايتساق، سىبىردەگى تۇركى حالىقتارى ورىسشىل، يدەولوگيالىق تۇرعىدا شاتاسقان ماقتاباس حالىقتار.
مەنىڭشە، ءبىز دە سولاردان پالەندەي الىس كەتكەن جوقپىز.
ءبىز تاۋەلسىز تۇركى ەلدەرىنىڭ، ازات تۇركى حالىقتارىنىڭ اراسىنداعى ەڭ ورىسشىل حالىقپىز. سونى بىلەمىن.
سونى ءتۇسىنىپ، سوڭعى كەزدە وزگە تۇرىك حالىقتارىنىڭ اراسىندا اقتالىپ، قاتتى ۇيالاتىن بوپ ءجۇرمىن.
پىكىرلەر