ەش دالەلى جوق “قىلمىس”

3023
Adyrna.kz Telegram

بۇقارالىق اقپارات قۇرالدارىنداعى ماتەريالداردى سارالاپ، سوت پروتسەسىنىنىڭ ستەنوگرامماسىمەن تانىسا وتىرىپ، قىزىلوردا وبلىسىنىڭ بۇرىنعى اكىمى قۋانىشبەك دوسمايىلۇلى ىسقاقوۆقا تاعىلعان ايىپتاردىڭ بىرىنە دە دالەل جوق ەكەنىنە كوز جەتكىزەسىز.

بۇلتارتپاس دالەل:
ەكس اكىمگە قاتىستى بۇل وقيعا سىبايلاس جەمقورلىققا قارسى كۇرەس اگەنتتىگى قىزمەتىمەن «جابىرلەنۋشى» دەپ تانىلعان ابدراحيموۆا ساپۋرا زايتجانقىزىنىڭ 26 ناۋرىز 2020 جىلى سىبايلاس جەمقورلىققا قارسى ءىس-قيمىل اگەنتتىگىنىڭ تاپسىرماسىمەن سول كەزدەگى قىزىلوردا وبلىسىنىڭ اكىمى ىسقاقوۆ قۋانىشبەك دوسمايىلۇلىنىڭ قابىلداۋىنا كىرۋدەن باستالادى. اكىمنىڭ الدىنا دىبىس جازۋ قۇرالىمەن كىرگەن ابدراحيموۆانىڭ اكىممەن اڭگىمەسى تۇگەل اۋديوتاسپالانادى. دىبىستاسپا سوت زالىندا تىڭدالىپ، سوت نازارىنا ۇسىنىلعان.
№14 زەرتتەلىنەتىن فونوگراممانىڭ انىقتالعان ءماتىنى
№2 كومپاكت-ديسك («ديسك №6» تۇسىندىرمە جازۋى بار)
«2020_03_26_11-30-53.wav» فايلى
تاسپاداعى جازۋعا سۇيەنسەك، وبلىس اكىمى قۋانىشبەك ىسقاقوۆ «سىر مەيىرىمى» قايىرىمدىلىق قورىنىڭ ديرەكتورى ساپۋرا ابدراحيموۆانى اكىمدىك زاڭگەرىمەن بىرگە وتىرىپ قابىلدايدى. ورتاداعى اڭگىمەدە قۋانىشبەك ىسقاكوۆتىڭ ساپۋرا ابدراحيموۆانىڭ باسقارۋىنداعى «سىر مەيىرىمى» قورىنان شىققان قاراجاتقا ەش قاتىسى جوق ەكەنى انىق كورىنىپ تۇر.
قۋانىشبەك ىسقاقوۆ س.ز.ابدراحيموۆانىڭ ماسەلەسىن تىڭداپ وتىرىپ، 4 قۇرىلىس كومپانياسىنا 20 ملننان 80 ملن اقشانى ەشبىر قۇجاتسىز جىبەرە سالعانىنا تاڭعالادى. «نەگە قۇجاتسىز جىبەرەسىز، باسىڭىز ەكەۋ ەمەس. كىم تاپسىرما بەرسە دە، قۇجاتسىز اۋدارمايمىن دەپ وتىرىپ المادىڭىز با» دەپ، نەگە وسى ۋاقىتقا دەيىن ول كومپانيالاردان ءتيىستى قۇجاتتى تالاپ ەتپەگەنىن، نەگە ءتيىستى كومپانيالارعا قۇجاتتى تالاپ ەتەتىن رەسمي حات جازباعانىن سۇرايدى.
سونىمەن قاتار اڭگىمە بارىسىندا ابدراحيموۆاعا ءتيىستى قۇقىق قورعاۋ ورگاندارىنا ارىزدانۋعا كەڭەس بەرەدى.
ەگەر قۋانىشبەك ىسقاقوۆ بۇل «الاياقتىق» دەپ اتالىپ وتىرعان ىسكە قاتىسى بولسا، وزىنە ءوزى قاستاندىق جاساپ، ابدراحيموۆاعا قۇقىق قورعاۋ ورگاندارىنا ارىزدانىڭىز دەپ ايتا ما؟
ونىڭ ۇستىنە ءدال سول كەزدەسۋدە قۋانىشبەك ىسقاقوۆ ابدراحيموۆانىڭ سىبايلاس جەمقورلىققا قارسى كۇرەس اگەنتتىگى قىزمەتكەرلەرىنىڭ تاپسىرماسىمەن بويىنا دىبىس جازۋ قۇرالىن تاعىپ كەلگەنىنەن بەيحابار ەدى.
«2020_03_26_11-30-53.wav» فايلداعى دىبىس جازۋدا تاسپالانعان ساپۋرا ابدراحيموۆا مەن ەكس اكىم قۋانىشبەك ىسقاقوۆتىڭ اراسىندا بولعان اڭگىمەگە دەن قويساق، قۋانىشبەك ىسقاقوۆ الدىنا شاعىمدانىپ، «قينالىپ» كەلىپ وتىرعان ابدراحيموۆاعا تازا ادامگەرشىلىك تۇرعىدا جاناشىرلىق تانىتىپ، كەڭەس بەرىپ وتىرعانى بايقالادى. ال شىنتۋايتىندا ساپۋرا ابدراحيموۆا سىبايلاس جەمقورلىققا قارسى كۇرەس اگەنتتىگى قىزمەتكەرلەرىنىڭ تاپسىرماسىمەن وبلىس اكىمىن «قىلمىستىق تورعا» تۇسىرۋگە كەلىپ وتىرعان ەدى. ابدراحيموۆانىڭ «جورىعىنان» سوڭ، سول كۇنى تۇستەن كەيىن ق.ىسقاقوۆتى كابينەتىنەن ۇستاپ اكەتەدى.
2-ءشى دالەل
كەلەسى ءىس ماتەريالدارىنا سايكەس، «Nur Otan» پارتياسى باسشىلىعى وبلىس اكىمى اپپاراتىنىڭ سول كەزدەگى باسشىسى م.ن.دەلمۇحانوۆقا ارىس قالاسىنىڭ اسكەري بولىمىندە ورىن العان توتەنشە جاعدايعا بايلانىستى وبلىس بويىنشا بارلىق مەكەمە قىزمەتكەرلەرىنىڭ بىركۇندىك جالاقىسىن اۋدارۋعا قولداۋ كورسەتۋ تۋرالى 25.06.2019 جىلى №SQ- 1212-19/318 ساندى حاتىن جولدايدى (حات قوسا جاريالانادى). (8-بۋما 134-بەت).
(قىلمىستىق ءىستىڭ نەگىزگى فاكتىسىنە اينالىپ وتىرعان 80 ملن قارجى وسى ءبىر كۇندىك جالاقىدان جينالعان قاراجاتتان اۋدارىلعان.)
حات 25 ماۋسىمدا جولدانعان. بۇل داتادا ىسقاقوۆ قۋانىشبەك دوسمايىلۇلى وبلىس اكىمى دە، وبلىس اكىمىنىڭ مىندەتىن اتقارۋشى دا بولماعان. ياعني بۇل داتا - ىسقاقوۆتىڭ ءوزى سياقتى وبلىس اكىمىنىڭ ورىنباسارلارىنا تاپسىرما بەرەتىندەي قۇزىرەتى جوق كەز.
ءدال سول كەزەڭدە ق.ىسقاقوۆتىڭ وبلىس اكىمىنىڭ ورىنباسارى لاۋازىمىنداعى قىزمەت فۋنكتسياسى تەك ەكونوميكا، بيۋدجەت، ەڭبەك سالاسىنداعى ماسەلەلەردى عانا قامتىعان. ونىڭ فۋنكتسيونالدىق مىندەتتەمەلەرىنىڭ قاتارىنا الەۋمەتتىك سالا ماسەلەلەرى كىرمەيدى. دەمەك ءوزى سياقتى ورىنباسارلارعا تاپسىرما بەرۋى مۇمكىن ەمەس.
25.11.2020 جىلى وتكەن سوت پروتسەسىندە سول كەزدەگى «نۇر وتان» پارتياسى قىزىلوردا وبلىستىق فيليالى توراعاسىنىڭ ءبىرىنشى ورىنباسارى 25 ماۋسىمدا قىزىلوردا وبلىسىنىڭ بۇرىنعى اكىمى ءوز ورنىندا بولعانىن جانە وبلىس اكىمىنىڭ ورىنباسارى قۋانىشبەك ىسقاقوۆتىڭ تاراپىنان ەشقانداي تاپسىرما بەرىلمەگەندىگىن راستايدى.
قۋانىشبەك ىسقاقوۆ سوت پروتسەسىندە ءوزىنىڭ بۇل قىلمىسقا ەش قاتىسى جوق ەكەنىنە بىلايشا دالەلدەر كەلتىرەدى:
«ءبىرىنشى دالەلدەمەسى: ايىپتىڭ جالعان، وتىرىك، ويدان قۇراستىرىلعانىن ءبىر سوزدەن-اق كورۋگە بولادى. ايىپقا كوڭىل ءبولۋىڭىزدى سۇرايمىن. وندا «وبلىس اكىمى ك.د.يسكاكوۆ تاپسىرما بەردى» دەپ كورسەتىپ وتىر. جارىلىس 24 ماۋسىمدا بولعان، ال مەن 7 كۇننەن كەيىن 1 شىلدە 2019 ج. اكىمنىڭ قىزمەتىنە رەسمي كىرىستىم. مەن ول كەزدە اكىم ەمەسپىن، اكىمنىڭ مىندەتىن دە اتقارعان ەمەسپىن.
ەكىنشى دالەلدەمەسى: ارىس قالاسىندا جارىلىس 24 ماۋسىمدا بولسا، ال قور 25 ماۋسىمدا شەشىم قابىلداسا، وندا وبلىس اكىمى تاراپىنان تاپسىرما 24 مەن 25 كۇنى اراسىندا بەرىلۋى كەرەك.
ونىڭ ۇستىنە «تاپسىرما الدىم» دەپ كورسەتىم بەرگەن ر.رۇستەموۆ، ءوزىنىڭ كورسەتىمدەرىن تاعى ءبىر مارتە وزگەرتىپ، 8 قازان 2020 جىلى بولعان سوت پروتسەسىندە «ىسقاقوۆ تاپسىرمانى 24-ءى مەن 25 ء–ى ارالىعىندا بەردى» دەيدى.
الايدا، مەن، ك.د.يسكاكوۆ، 24-25 ماۋسىم كۇندەرى ايىپتا كورسەتىلگەندەي، وبلىس اكىمى ەمەسپىن. مەن، ك.د.يسكاكوۆ، وبلىس اكىمى لاۋازىمىنا 28 ماۋسىم كۇنى كەشكە تاعايىندالدىم (2019 جىلدىڭ 29-30 ماۋسىم كۇندەرى سەنبى-جەكسەنبى بولعاندىقتان، جۇمىسقا رەسمي تۇردە 2019 جىلدىڭ 1 شىلدەسىندە قوسىلدىم), بۇنى تەرگەۋشىنىڭ ءوزى قاۋلىدا كورسەتتى. الايدا سوت وسى فاكتىلەردى تاعى دا ەسكەرمەيدى.
ولاي بولسا، وبلىس اكىمىنىڭ الەۋمەتتىك سالاعا جەتەكشىلىك ەتەتىن ورىنباسارى ر.رۇستەموۆ سول ۋاقىتتا ءوزىنىڭ لاۋازىمىمەن بىردەي، اتقارۋ فۋنكتسياسى مۇلدەم بولەك ورىنباساردىڭ (ك.د.يسكاكوۆتىڭ-مەنىڭ) تاپسىرماسىن نە سەبەپتى، نەنىڭ نەگىزىندە ورىندايدى؟ الەۋمەتتىك سالاعا تۇك قاتىسى جوق مەنىمەن اقىلداسپايدى دا، ورىندامايدى دا.
ءۇشىنشى دالەلدەمەسى: بۇدان بولەك، قىلمىستىق ىسكە «سىر مەيىرىمى» قور قۇرىلتايشىلارىنىڭ 2019 جىلدىڭ 25 ماۋسىمىنداعى جالپى جينالىسىنىڭ №4 حاتتاماسى تىركەلگەن. وندا كۇن تارتىبىندە: «سناريادتار جارىلىسىنان زارداپ شەككەن ارىس حالقىنا كومەك كورسەتۋ تۋرالى جانە ارىستىقتارعا كومەك كورسەتۋ بويىنشا كوميسسيا قۇرۋ تۋرالى» دەلىنگەن.
وسى جينالىستا ءبىرىنشى سۇراق بويىنشا وبلىس اكىمىنىڭ ورىنباسارى ر.رۋستەموۆ بايانداما جاساپ، ءسوز سويلەپ، جۇمىسكەرلەردىڭ بىركۇندىك جالاقىسىن «سىر مەيىرىمى» قوعامدىق الەۋمەتتىك قورى ەسەپشوتىنا اۋدارۋدى ر.رۇستەموۆتىڭ ءوزى ۇسىنعان. (1 بۋما 9 بەت)
ءتورتىنشى دالەلدەمەسى: 2020 ج. 30 قازان كۇنى سوت تەرگەۋى كەزىندە كۋا «سىر مەيىرىمى» قورى قامقورشىلىق كەڭەسىنىڭ مۇشەسى ج.ق. ءبىرىنشى سۇراق بويىنشا ر.رۋستەموۆتىڭ بايانداما جاساعانىن تولىق قۋاتتادى. جانە سول جەردە ءوزىنىڭ بۇل اقشا قاراجاتتارىن «نەگە «سىر مەيرىمى» قورىنا اۋدارامىز، نەگە تىكەلەي ارىس قالاسىنا اۋدارمايمىز؟» دەگەن سۇراعىنا بايانداما جاساۋشى «باسشىلىقتىڭ تاپسىرماسى» دەپ ايتتى دەيدى. مەنىڭ «بايانداما جاساۋشى يسكاكوۆ قۋانىشبەك دوسمايىلۇلىنىڭ تاپسىرماسى دەگەن اڭگىمە ايتتى ما؟» دەپ قويعان سۇراعىما ول «جوق، ءسىزدىڭ فاميلياڭىزدى ايتقان جوق، تەك وبلىس باسشىلىعىنىڭ تاپسىرماسى دەگەن اڭگىمەنى ايتتى» دەپ جاۋاپ بەردى». ال ول كەزدە مەن وبلىستىڭ اكىمى ەمەسپىن، بۇل فاكتىنى دوكۋمەنت دالەلدەپ تۇر. ول قۇجات، ول دوكۋمەنت! ءبىز اركىمنىڭ ايتقانىنا سەنەمىز بە، الدە قۇجاتقا سەنەمىز بە؟،- دەيدى ادىلدىك ىزدەگەن ىسقاقوۆ.
ق.ىسقاقوۆ «قۇرمەتتى سوت! ەسكەرۋىڭىزدى سۇرايمىن» دەپ 5-ءشى، 6-شى دالەلدەمەلەرىنە سوتتىڭ نازارىن ەرەكشە اۋدارادى.
ق.ىسقاقوۆ ءوزىنىڭ التىنشى دالەلدەمەسىندە «سىر مەيىرىمى» قور ەسەپشوتىنا اقشا قاراجاتتارىنىڭ جينالۋىنا ءوزىنىڭ ەشقانداي قاتىسىنىڭ جوق ەكەندىگىن ايتا كەلە، ونىڭ تاعى ءبىر دالەلى رەتىندە سول كەزدەگى وبلىس اكىمىنىڭ تۇركىستان وبلىسى ارىس قالاسىندا 2019 جىلى 24 ماۋسىمدا ورىن العان توتەنشە جاعدايعا بايلانىستى قر ۇكىمەتىنىڭ وتىرىسىندا 2019 جىل 26 ماۋسىم ساع. 08.00-دە سويلەگەن ءسوزىنىڭ جەلىسىن ۇسىنادى.
وندا جالپى ارىس قالاسى بويىنشا اتقارىلعان كومەكتەردىڭ باياندالۋىمەن قاتار، «بۇدان بولەك، وبلىس بويىنشا اتقارۋشى ورگاندارداعى 2 مىڭنان استام مەملەكەتتىك قىزمەتشى 1 كۇندىك جالاقاسىن اۋداراتىن بولادى» دەلىنگەن. وسىلايشا ق.ىسقاقوۆ قىزىلوردا وبلىسىنىڭ وزىنە دەيىنگى اكىمنىڭ ۇكىمەت وتىرىسىندا جاساعان بايانداماسىنان ءۇزىندى كەلتىرەدى. (30 بۋما 90-بەت). دەمەك مەكەمەلەردەن 1 كۇندىك جالاقىنى اۋدارۋ دا ىسقاقوۆتىڭ تاپسىرماسى ەمەس.
ويتكەنى بۇل كەزدە قۋانىشبەك ىسقاقوۆ وبلىس اكىمى بولاتىنىنان بەيحابار.
مىنە، سوت پروتسەسىندە وسىنداي بۇلتارتپاس ايعاقتار كورسەتىلىپ، ايتىلىپ، دالەلدەنسە دە سوت تاراپىنان وعان ماڭىز بەرىلمەگەنى مۇلدەم تۇسىنىكسىز.
سوت باستالاردا كۇدىكتى دەپ ۇستالىپ، ايىپ تاعىلعان قۋانىشبەك ىسقاقوۆ بۇكىل حالىق الدىندا ءوزىنىڭ كىناسىزدىگىن دالەلدەگىسى كەلىپ، سۋديادان سوتتىڭ اشىق ءوتۋىن ءارى سوت پروتسەسىنە جۋرناليستەردىڭ قاتىسۋىن وتىنەدى. بۇل دا كىناسىز ادامنىڭ سوت پروتسەسىنە جۋرناليستەر قاتىسسا، سوتتىڭ ءادىل شەشىم شىعارۋىنا سەپ بولار ما ەكەن دەگەن شاراسىزدىعى دەپ تۇسىنۋگە بولادى.
بۇلتارتپاس دالەل:
2018 جىلى تۇركىستان وبلىسىنىڭ قۇرىلۋىنا بايلانىستى تۇڭعىش پرەزيدەنت ن. نازارباەۆتىڭ جارلىعىمەن ءار وبلىسقا تۇركىستان قالاسىندا ءبىر نىساننىڭ قۇرىلىسىن جۇرگىزۋ مىندەتتەلگەنى بەلگىلى. وسىعان وراي قىزىلوردا وبلىسى دا ءوز ۇلەسىن قوسۋ ماقساتىندا تۇركىستان قالاسىندا «شىعىس مونشاسى» قۇرىلىسىن باستايدى.
20.04.2020 جىلى «باگام اۋديت» اۋديتورلىق كومپانياسى جۇرگىزگەن اۋديت قورىتىندىسىمەن جانە 6.05.2020 جىلعى № 908 سوت-ەكونوميكالىق ساراپتاما قورىتىندىسىمەن «سىر مەيىرىمى» قورىنان 4 كاسىپورىنعا اۋدارىلعان قاراجاتتىڭ قىزىلوردا وبلىسى اتىنان تۇركىستان قالاسىندا سالىنعان «شىعىس مونشاسىنىڭ» قۇرىلىسىنا جۇمسالعاندىعى، ودان ءارى ىسكە قاتىستى 4 كاسىپورىننىڭ ەسەپشوتىنان اقشانىڭ قولما-قول مۇلدەم بوساتىلماعانى دالەلدەنگەن.
وسىنداي بۇلتارتپاس دالەلدەر تۇرعاندا قۋانىشبەك ىسقاقوۆتى قانداي اقشا قاراجاتتاردى «جىمقىردى» دەگەن ايىپپەن سوتتاپ وتىرعانى تۇسىنىكسىز ءارى ميعا سىيمايتىن ءجايت.
ەڭ تاڭعالارلىعى قۋانىشبەك ىسقاقوۆتىڭ سوت بارىسىندا ايتقان دالەلدەمەلەرى دە، تاۋەلسىز ساراپشىلاردىڭ زەرتتەۋ ناتيجەلەرىنىڭ قورىتىندىسى دا سوت تاراپىنان مۇلدەم ەسكەرۋسىز قالادى.
4-ءشى دالەل
تەرگەۋ امالدارى مەن سوت پروتسەسى باستالعان ساتتەن باستاپ، ىسكە قاتىستى قاي كۋادان جاۋاپ الىنسا دا، قۋانىشبەك ىسقاقوۆتان ەشقانداي تاپسىرمالاردىڭ بولماعاندىعىن مالىمدەيدى.
ەسەسىنە، ولاردىڭ بارلىعى دا مۇنداي زاڭسىز تاپسىرما بۇرىنعى قۇرىلىس باسقارماسىنىڭ باسشىسى م.السەريكوۆتەن تۇسكەندىگىن كورسەتكەن. ال م.السەريكوۆ سوت پروتسەسى اياقتالعانعا دەيىن قىزمەتىنەن كەتىپ وتىر. م.السەريكوۆتىڭ سوت پروتسەسى اياقتالماي، قىزمەتتەن كەتۋى جانە كۇدىكتى تۇلعادان كۋاگەرگە اۋىسۋى دا ويلانتاتىن ءجايت.
سونداي-اق وبلىس اكىمىنىڭ سول كەزدەگى ورىنباسارلارى رۋسلان رۇستەموۆ، م.دەلمۇحانوۆ، بۇرىنعى قۇرىلىس باسقارماسىنىڭ باسشىسى م.السەريكوۆ، كاسىپكەر ج.يسكاكوۆ بولعان جاعدايدى «بەلگىسىز سەبەپتەرگە بايلانىستى» ناقتى بايانداۋدان جالتارىپ، جاۋاپتارىن ءار سوت پروتسەسىندە ءار ءتۇرلى ەتىپ ايتىپ وتىرعان. بۇعان دا ءبىر قىزىعى سۋديا ءمان بەرمەيدى.
تاعى ءبىر ماڭىزدى جايتكە ءمان بەرىلمەي قالعان. قر باس پروكۋراتۋراسىنىڭ 22 ماۋسىمداعى ءىستى قوسىمشا تەرگەۋگە جىبەرۋ تۋرالى قاۋلىسىنىڭ 9-پۋنكتىندە 25.06.2019 قايىرىمدىلىق قوردا اقشا جيناۋ تۋرالى شەشىمگە ق.ىسقاقوۆتىڭ قاتىستىلىعىن انىقتاۋ قاجەت» دەپ كورسەتىلسە دە قر پروكۋراتۋراسىنىڭ قاۋلىسىندا كورسەتىلگەن «انىقتاۋ قاجەت» دەگەن ماسەلەگە ءمان بەرىلمەگەن.
تەرگەۋ ورگانىمەن ىسقاقوۆتىڭ بۇل ىسكە قاتىستىلىعىنىڭ جوق ەكەنىن انىقتاماق تۇگىلى، وعان سوت تاراپىنان باعا دا بەرىلمەيدى.
ەگەر «سىر-مەيىرىمى» قورى اقشانى 4 مەكەمەگە اۋدارسا، نەلىكتەن قور ديرەكتورى ابدراحيموۆا ءتيىستى قۇجاتتارىن سۇراتپاعان؟ نەلىكتەن س.ز.ابدراحيموۆا قاراجات قۇجاتىن ىزدەپ، ءتورت مەكەمەنىڭ ۇستىنەن ارىز جازۋدىڭ ورنىنا، ارىزدى قورعا ەش قاتىسى جوق اكىمدىك باسشىلىعىنىڭ ۇستىنەن تۇسىرگەن؟
نەگە دەگەن سۇراقتىڭ سوت پروتسەسىندە ەسكەرىلمەگەنى قيسىنسىز. ويلاناتىن ءجايت.
قوردىڭ ديرەكتورى ابدراحيموۆا 4 مەكەمەگە اۋدارعان قارجىنىڭ يگەرىلۋىن راستايتىن قۇجاتتاردى جازباشا دا، اۋىزشا دا سۇراتپاعانى ءتىپتى تۇسىنىكسىز.
ونى سوت تەرگەۋى بارىسىندا 3 مەكەمە باسشىسى ا.ەرنازاروۆ، س.سادىقوۆ، ر.يمانوۆا دا تولىعىمەن راستايدى.
ياعني ابدراحيموۆا ءوزى اقىماقتىقپەن نە باسقالاي سەبەپپەن قۇجاتسىز اۋدارا سالعان قاراجات ءۇشىن قورىقسا دا، قور مەن 4 مەكەمە اراسىندا تۋىنداعان ماسەلەنى ازاماتتىق ءىس تارتىبىمەن شەشۋ ءۇشىن ەشقانداي ارەكەت جاساماعان.
ءارى قاراي ءىستىڭ وربۋىندە «سىر مەيىرىمى» قايىرىمدىلىق قورىنان شىققان 80 ملن سومانىڭ «باق-بەرەكە» قۇرىلىس كومپانياسى ارقىلى تۇركىستان قالاسىنداعى «مونشا» قۇرىلىسىنا جۇمسالعانى تايعا تاڭبا باسقانداي انىق بولسا دا، پروتسەسس قىلمىستىڭ قۇيتۇرقى ستسەناريىنە جالعاسادى.
اۋەلى ىسقاقوۆتىڭ كۋرستاس دوسى جەڭىسبەك ىسقاقوۆ كۇدىكتى رەتىندە ىسكە كىرگىزىلەدى. ج. يسكاكوۆتى تەرگەۋ بارىسىندا قۋانىشبەك ىسقاقوۆقا قارسى كورسەتىم بەرۋگە ۇگىتتەيدى. ءبىر قىزىعى اكىم ىسقاقوۆتىڭ دوسىمىن دەپ جۇرگەن جەڭىسبەك يسكاكوۆ تەرگۋشىلەر ۇگىتىنە بىردەن كونە كەتەدى.
ءىستىڭ ءمان –جايىمەن تانىسقان ادامعا «قۇيتۇرقى ستسەناري» بويىنشا جەڭىسبەك يسكاكوۆتىڭ اۋەلى ايىپتالۋشىنىڭ تۋىسقانى رەتىندە ىسكە قاتىستىرىلعانىن بايقاۋ قيىن ەمەس. ودان تۋىسى بولماي شىققان جەڭىسبەك يسكاكوۆتى بۇل ىستە جاڭا فيگۋرانت شىعارۋعا پايدالانادى. ءسويتىپ ج. يسكاكوۆتىڭ كومەگىمەن قۋانىشبەك ىسقاقوۆتىڭ شىن باۋىرى ازات دوسمايىلوۆ قىلمىستىق ءىستىڭ ءبىر فيگۋرانتى بوپ شىعا كەلەدى.
ءبىر سوزبەن ايتقاندا، 4 قۇرىلىس كومپانياسىنىڭ قۇجاتتارى بويىنشا تۇركىستان قالاسىنداعى «شىعىس مونشاسى» قۇرىلىسىنا جۇمسالىپ كەتكەن 80 ملن قاراجاتتى، ياعني جوق قاراجاتتى اعاسى ق. ىسقاقوۆقا اپارىپ بەرۋشى رەتىندە تانىلعان ازات دوسمايلوۆ «قولماقول اقشا تاسۋشى» دەگەن ايىپپەن قاماۋعا الىنادى.
ازات دوسمايلوۆتى قاماۋعا العان ساتتەن باستاپ قارجى پوليتسياسىنىڭ قىزمەتكەرلەرى ونى قۋانىشبەك ىسقاقوۆقا ناقاقتان جالا جابۋعا، قارسى تۇسىنىكتەمە بەرۋگە ۇگىتتەيدى.
بىراق ءىستىڭ باسى-قاسىندا بولماعان ازات دوسمايلوۆ ۇگىتتەۋگە كونبەي، وزىنە قارسى جانە اعاسى قۋانىشبەك ىسقاقوۆقا قارسى جالعان كورسەتىمدەر بەرۋدەن باس تارتادى. ول ءۇشىن كارتسەرگە قامالادى.
وسىنداي سوت پروتسەسىندەگى سۋديا مەن تەرگەۋشىلەردىڭ ارەكەتتەرىنە قاراپ، ءبىزدىڭ قازاقستان رەسپۋبليكاسىنىڭ سوت جۇيەسىنە، قۇقىق قورعاۋ ورگاندارىنىڭ قىزمەتىنە قانداي باعا بەرۋگە بولادى؟ زاڭدىلىقتىڭ سقاتالۋىن قاداعالاۋشى ورگان قايدا قاراپ وتىر؟
قۋانىشبەك ىسقاقوۆتىڭ ىسىمەن تانىسقان تاجىريبەلى زاڭگەرلەر، ىسقاقوۆتىڭ قورعاۋشى ادۆوكاتتارى جوعارىدا اتالعان ورگان قىزمەتكەرلەرىنىڭ مۇنداي ارەكەتتەرىن ءوز ۋاكىلەتتىكتەرىن اسىرا پايدالانۋ جانە ادامگەرشىلىك پرينتسيپتەرگە جات نارسە دەپ اشىق ايتىپ وتىر.
ەگەر ءدال وسى سوت پروتسەسىنە وركەنيەتتى ەلدەر سوتىنىڭ وكىلى قاتىساتىن بولسا، قازاق ەلىن دەموكراتيالىق، پرەزيدەنتتىك ەمەس، شەكتەن شىعۋشى قۇقىق ورگاندارى بيلەيتىن ەل رەتىندە باعالار ەدى.
52 تومعا قاتتالعان بۇل سوت پروتسەسىندە ايىپتالۋشى، بۇگىندە 7 جىلعا باس بوستاندىعىنان ايىرىلعان ق. ىسقاقوۆ پەن ونىڭ وسى ىسكە نەگىزسىز تارتىلعان ءىنىسى ازات دوسمايىلوۆتىڭ كىناسىز ەكەنىن دالەلدەيتىن ايعاقتار كوپ كەلتىرىلگەن. تەلەفون دەتاليزاتسياسى، كۋاگەرلەردىڭ جۇرگەن، كەزدەستىك دەگەن اۋماقتارىنىڭ سايكەسسىزدىگى سوت بارىسىندا انىق كورسەتىلگەن.
سوت پروتسەسىندە بەرىلگەن ايعاقتار مەن ءسوز جارىستارىندا كەلتىرىلگەن ناقتى بۇلتارتپاس دالەلدەرگە ءمان بەرمەگەن سۋديا سايدۋللاەۆ ابدۋللاجان سايدجاپپارۇلىنىڭ ارەكەتى – تاپسىرىس كارتيناسىنا ۇقسايدى دەيى زاڭگەرلەر.
بۇل جەردە جوعارعى جاقتاعى لاۋازىمدى كىسىلەردىڭ ابىرويىن ساقتاۋ تاپسىرماسى دا تۇرۋى مۇمكىن دەگەن بولجام دا جوق ەمەس.
ەلىمىزدە ەڭ ماڭىزدى ساياسي ناۋقان – قر پارلامەنتى جانە بارلىق دەڭگەيدەگى ءماسليحاتتار دەپۋتاتتارىن سايلاۋى كۇنى جاقىن قالدى. وسىنداي جاۋاپتى ناۋقان الدىندا تۇرعان قوعامىمىزعا سوتتىڭ ادىلەتسىز شەشىمىنە نارازالىق تانىتىپ، ادىلدىك ىزدەگەن شۋدىڭ قاجەتى جوق.
سوندىقتان وسى ادەلەتسىزدىكتىڭ قايراعىنا تۇسكەن بۇرىنعى اكىم قۋانىشبەك ىسقاقوۆقا قاتىستى قىلمىستىق ءىستىڭ اق-قاراسىن اشۋعا، ونىڭ ادىلەتتى شەشىلۋىنە
قر كونستيتۋتسياسىنىڭ كەپىلى، قر پرەزيدەنتى قاسىم-جومارت توقاەۆ،
قر جوعارعى سوتى، قر باس پروكۋراتۋراسى،
قالىڭ حالىقتىڭ سەنىم-ىقىلاسىنا يە بوپ كەلە جاتقان «نۇر وتان» پارتياسى ءىستىڭ قايتا قارالۋىنا ىقپال ەتىپ، ءادىل شەشىلۋىن قاداعالاۋىنا السا عانا وتباسىندا 8 بالاسى، بالا كۇتىمىندەگى جان جارى، 85 جاستاعى قارت اناسى بار كوپبالالى وتباسىنىڭ تاعدىرى شەشىلمەك.

پىكىرلەر