"شاكەن ايمانوۆ اتىنداعى "قازاقفيلم" اق جارىققا شىعارعان "قۇنانباي" ءفيلمى ۋفا قالاسىندا قازاننىڭ 26-ى مەن 28-ءى ارالىعىندا وتكەن "كۇمىس اقبوزات" اتتى ءىىى حالىقارالىق ۇلتتىق جانە ەتنيكالىق كينوفەستيۆالىندە ءامىر ابدىرازاقوۆ اتىنداعى "ۇلتتىق رۋح" جۇلدەسىمەن ماراپاتتالدى", - دەپ حابارلايدى "ادىرنا" "قازاقفيلم" اق ءباسپاسوز قىزمەتىنە سىلتەمە جاساپ.
ش.ايمانوۆ اتىنداعى «قازاقفيلم» اق جارىققا شىعارعان «قۇنانباي» ءفيلمى ۋفا قالاسىندا قازاننىڭ 26-ى مەن 28-ءى ارالىعىندا وتكەن «كۇمىس اقبوزات» اتتى ءىىى حالىقارالىق ۇلتتىق جانە ەتنيكالىق كينوفەستيۆالىندە ءامىر ابدىرازاقوۆ اتىنداعى «ۇلتتىق رۋح» جۇلدەسىمەن ماراپاتتالدى.
«قۇنانباي» ءفيلمى – اتاقتى دالا كەمەڭگەرى، قارادان شىعىپ حان اتانعان ۇلى ابايدىڭ اكەسى – قۇنانباي وسكەنبايۇلىنىڭ ونەگەلى ءومىرىنىڭ ءبىر كەزەڭىن قامتيدى. كارتينانىڭ رەجيسسەرى قازاقستاننىڭ حالىق ءارتيسى، مەملەكەتتىك سىيلىقتىڭ يەگەرى، قازاق مادەنيەتىنىڭ كورنەكتى قايراتكەرى، ونەر ارداگەرى دوسحان جولجاقسىنوۆ.
- شىعارماشىلىق توپتىڭ ءفيلمدى تۇسىرەردەگى ماقساتى: حالقىمىزدىڭ قۇندىلىقتارىن دارىپتەۋ ارقىلى، جاستاردىڭ بويىندا ۇلتتىق رۋحتى وياتۋ بولدى. ەندى مىنە، بۇگىندە ەڭبەگىمىزدى باعالانىپ جاتىر. كارتينانى تۇسىرۋگە اتسالىسقان ءتۇسىرۋ توبىن وسى جەڭىسپەن قۇتتىقتايمىن، - دەدى ءفيلمنىڭ رەجيسسەرى دوسحان جولجاقسىنوۆ.
ەستەرىڭىزگە سالا كەتسەك، «قۇنانباي» تاريحي كوركەم ءفيلمى بىلتىر قىركۇيەك ايىندا پروكاتقا شىقققان. وسى جىلدىڭ قىركۇيەك ايىندا رەسەيدىڭ ليپەتسك قالاسىندا وتكەن XII حالىقارالىق مۇسىلمان كينو فەستيۆالىنىڭ نەگىزگى بايقاۋىندا كورسەتىلگەن بولاتىن.
ال 30 قىركۇيەكتە «ەۋرازيا» كينوفەستيۆالى شەڭبەرىندە اتالمىش فيلم ۇلتتىق كينەماتوگرافيا ونەرى جانە عىلىمى اكادەمياسى تاعايىنداعان «تۇلپار» ۇلتتىق كينوجۇلدەسىمەن ماراپاتتالدى. باستى رولدى سومداعان اكتەر دوسحان جولجاقسىنوۆ «ەڭ ۇزدىك ەر ادام ءرولى» جۇلدەسىمەن، ءفيلمنىڭ كومپوزيتورى تولەگەن مۇحامەدجانوۆ «ءفيلمنىڭ ەڭ ۇزدىك مۋزىكاسى» جۇلدەسىمەن، ال كارتينانىڭ قويۋشى سۋرەتشىسى رۋستام وديناەۆ «ەڭ ۇزدىك سۋرەتشى-قويۋشى جۇمىسى» جۇلدەسىمەن ماراپاتتالدى. سونىمەن قاتار، مارقۇم تالاسبەك اسەمقۇلوۆ جانە دوسحان جولجاقسىنوۆ جازعان ءفيلمنىڭ ستسەناريى ۇزدىك دەپ تانىلدى.
حالىقارالىق «كۇمىس اقبوزات» كينوفەستيۆالى الەم حالىقتارىنىڭ رۋحاني جانە مادەني قۇندىلىقتارىن ناسيحاتتاۋعا، ۇلتتىق جانە ەتنيكالىق باعىتتاعى فيلمدەردى ءتۇسىرۋشى كينەماتوگرافيستەر شىعارماشىلىعىن دارىپتەۋگە، رەسەي ايماقتارى جانە شەتەلدەرمەن مادەني قاتىناستى دامىتۋ ءۇشىن ارنايى جاسالعان. كينوفەستيۆال ۋفا قالالىق وكرۋگى اكىمدىگىنىڭ قولداۋىمەن باشقۇرتستان ۇكىمەتى مەن باشقۇرتستان رەسپۋبليكاسىنىڭ مادەنيەت مينيسترلىگى، «باشقۇرتستان» كينوستۋدياسىنىڭ ۇيىمداستىرۋىمەن وتەدى.
"ادىرنا"
