"Sháken Aımanov atyndaǵy "Qazaqfılm" AQ jaryqqa shyǵarǵan "Qunanbaı" fılmi Ýfa qalasynda qazannyń 26-y men 28-i aralyǵynda ótken "Kúmis Aqbozat" atty III Halyqaralyq ulttyq jáne etnıkalyq kınofestıvalinde Ámir Ábdirazaqov atyndaǵy "Ulttyq rýh" júldesimen marapattaldy", - dep habarlaıdy "ADYRNA" "Qazaqfılm" AQ baspasóz qyzmetine silteme jasap.
Sh.Aımanov atyndaǵy «Qazaqfılm» AQ jaryqqa shyǵarǵan «Qunanbaı» fılmi Ýfa qalasynda qazannyń 26-y men 28-i aralyǵynda ótken «Kúmis Aqbozat» atty III Halyqaralyq ulttyq jáne etnıkalyq kınofestıvalinde Ámir Ábdirazaqov atyndaǵy «Ulttyq rýh» júldesimen marapattaldy.
«Qunanbaı» fılmi – ataqty dala kemeńgeri, qaradan shyǵyp han atanǵan Uly Abaıdyń ákesi – Qunanbaı Óskenbaıulynyń ónegeli ómiriniń bir kezeńin qamtıdy. Kartınanyń rejısseri Qazaqstannyń Halyq artısi, Memlekettik syılyqtyń ıegeri, qazaq mádenıetiniń kórnekti qaıratkeri, óner ardageri Doshan Joljaqsynov.
- Shyǵarmashylyq toptyń fılmdi túsirerdegi maqsaty: halqymyzdyń qundylyqtaryn dáripteý arqyly, jastardyń boıynda ulttyq rýhty oıatý boldy. Endi mine, búginde eńbegimizdi baǵalanyp jatyr. Kartınany túsirýge atsalysqan túsirý tobyn osy jeńispen quttyqtaımyn, - dedi fılmniń rejısseri Doshan Joljaqsynov.
Esterińizge sala ketsek, «Qunanbaı» tarıhı kórkem fılmi byltyr qyrkúıek aıynda prokatqa shyqqqan. Osy jyldyń qyrkúıek aıynda Reseıdiń Lıpek qalasynda ótken XII Halyqaralyq musylman kıno festıvaliniń negizgi baıqaýynda kórsetilgen bolatyn.
Al 30 qyrkúıekte «Eýrazııa» kınofestıvali sheńberinde atalmysh fılm Ulttyq kınematografııa óneri jáne ǵylymy akademııasy taǵaıyndaǵan «Tulpar» ulttyq kınojúldesimen marapattaldy. Basty róldi somdaǵan akter Doshan Joljaqsynov «Eń úzdik er adam róli» júldesimen, fılmniń kompozıtory Tólegen Muhamedjanov «Fılmniń eń úzdik mýzykasy» júldesimen, al kartınanyń qoıýshy sýretshisi Rýstam Odınaev «Eń úzdik sýretshi-qoıýshy jumysy» júldesimen marapattaldy. Sonymen qatar, marqum Talasbek Ásemqulov jáne Doshan Joljaqsynov jazǵan fılmniń senarıi úzdik dep tanyldy.
Halyqaralyq «Kúmis Aqbozat» kınofestıvali álem halyqtarynyń rýhanı jáne mádenı qundylyqtaryn nasıhattaýǵa, ulttyq jáne etnıkalyq baǵyttaǵy fılmderdi túsirýshi kınematografıster shyǵarmashylyǵyn dáripteýge, Reseı aımaqtary jáne sheteldermen mádenı qatynasty damytý úshin arnaıy jasalǵan. Kınofestıval Ýfa qalalyq okrýgi ákimdiginiń qoldaýymen Bashqurtstan úkimeti men Bashqurtstan Respýblıkasynyń mádenıet mınıstrligi, «Bashqurtstan» kınostýdııasynyń uıymdastyrýymen ótedi.
"ADYRNA"
