«اق جول» دەموكراتيالىق پارتياسى ش.ءۋاليحانوۆ اتىنداعى تاريح جانە ەتنولوگيا ينستيتۋتى جانە «الاش» مادەنيەت جانە رۋحاني دامۋ ينستيتۋتىمەن بىرلەسە «اق جول» گازەتىنىڭ جارىق كورگەنىنە 100 جىل تولۋىنا وراي «الاشتىڭ تۇركىستان كەزەڭى» اتتى حالىقارالىق ونلاين كونفەرەنتسياسىن ءوتكىزدءى، دەپ حابارلايدى «ادىرنا» ءتىلشىسى. ءىس-شاراعا «اق جول» پارتياسىنىڭ توراعاسى ا.پەرۋاشەۆ, الاشتانۋشىلار، عالىمدار مەن قوعام قايراتكەرلەرى قاتىستى.
شارادا «اق جول» گازەتى ماتەريالدارى جيناعىنىڭ تۇساۋىن الاش قايراتكەرى، «اق جول» گازەتىنىڭ نەگىزىن قالاۋشى جانە ءبىرىنشى رەداكتورى س.قوجانوۆتىڭ ۇرپاعى، فيلولوگيا عىلىمدارىنىڭ كانديداتى سۆەتلانا قوجانوۆا مەن الاش ارىسى، «اق جول» گازەتىنىڭ قىزمەتكەرى حايرەتدين بولعانباەۆتىڭ ۇرپاعى، حايرەتدين بولعانباەۆ اتىنداعى قايىرىمدىلىق قورىنىڭ توراعاسى جامبىل كامەلوۆ كەستى.
جيناق قوعام قايراتكەرى، اقىن، «اق جول» پارتياسىنىڭ مۇشەسى ءحانبيبى ەسەنقاراعىزىنىڭ جەكە باستاماسى بويىنشا قۇراستىرىلعان. ول تاشكەنت، شىمكەنت، الماتى، ماسكەۋ كىتاپحانالارى مەن مۇراعاتتارىندا گازەت ماتەريالدارىن جيناۋ بويىنشا ۇلكەن جۇمىس جاسادى.
«اق جول» - 1920–26 جىلدارى باسىلىپ شىققان جانە الاش بەلسەندىلەرى قۇرعان قوعامدىق-ساياسي گازەت. ءبىرىنشى رەداكتورى - سۇلتانبەك قوجانوۆ. گازەتتە ن.تورەقۇلوۆ، م.دۋلاتوۆ، X. دوسمۇحامەدوۆ، ي. جانسۇگىروۆ، ا. بايتۇرسىنوۆ جانە باسقا دا كوپتەگەن قازاق زيالىلارىنىڭ تۇركىستان، قازاقاۆتونوميالىق سسر ءومىرى مەن وقيعالارى تۋرالى ماتەريالدارى جاريالاندى.
وزدەرىڭىز بىلەتىندەي، «اق جول» پارتياسى الاش قوزعالىسىنىڭ يدەيالىق مۇراسىن زەرتتەۋ جانە ناسيحاتتاۋ بويىنشا ۇنەمى جۇمىستار جۇرگىزەدى. جىل سايىن عىلىمي جۇمىستار كونكۋرستارى، عىلىمي-پراكتيكالىق كونفەرەنتسيالار وتكىزىلىپ، جاريالانىمدار جارىق كورەدى.
جيىنداعى قۇتتىقتاۋ سوزىندە ازات پەرۋاشەۆ جيناقتىڭ جارىققا شىعۋى مادەنيەت جانە سپورت مينيسترلىگىنىڭ قولداۋى جانە اقىن ءحانبيبى ەسەنقاراقىزىنىڭ ەڭبەگىنىڭ ارقاسىندا جۇزەگە اسقانىن اتاپ ءوتتى. «ۇرپاقتاردىڭ رۋحاني جانە مادەني تاجىريبەسىنىڭ ساباقتاستىعى - تاۋەلسىزدىكتى نىعايتۋدىڭ باستى نەگىزدەرىنىڭ ءبىرى. مۇنداي ماتەريالداردى باسىپ شىعارۋ ۇلتتىق تاريحتى ءتۇسىنۋ ءۇشىن، ونىڭ بۇرمالانۋىنا قارسى تۇرۋ ءۇشىن وتە ماڭىزدى»، - دەدى پەرۋاشەۆ.
سونداي-اق، ميمار سينان ۋنيۆەرسيتەتىنىڭ پروفەسسورى، تۇركىتانۋشى ابدىۋاقاپ قارا «الاش، تۇركى دۇنيەسى جانە ءباسپاسوز»، تاريح عىلىمدارىنىڭ دوكتورى، پروفەسسور، ش. ۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى زيابەك قابىلدينوۆ «اق جول» گازەتى – الاش تاريحىن زەرتتەۋ باعىتىندا قۇندى تاريحي دەرەك»، فيلولوگيا عىلىمدارىنىڭ دوكتورى، پروفەسسور، قر ۇعا اكادەميگى، الاشتانۋشى ديحان قامزابەكۇلى «تۇركىستان جانە ۇلت جوعارى مەكتەبىنىڭ ىرگەتاسى» تاقىرىبىندا بايانداما وقىدى.
«ادىرنا» ۇلتتىق پورتالى
