بەلگىلى ءتىل جاناشىرى رۋزا بەيسەنبايتەگى تاۋەلسىزدىگىمىزدى العانىمىزعا 30 جىلعا جۋىق ۋاقىت وتسە دە پاۆلودار وڭىرىندە ءتىل ماسەلەسىنىڭ اسقىنىپ تۇرعانىنا قىنجىلىپ، قازاق تىلىنە بايلانىستى جۇمىستىڭ ءالى دە باستالماعانىنا اشىنادى. مەملەكەتتىك ءتىلىمىزدىڭ ۇستەم بولۋى ءۇشىن بەلسەندى ارەكەت ەتىپ جۇرگەن ول ەكى اپتا كولەمىندە جولاۋشىلاردى قازاق تىلىندە قارسى الۋىن، جۇك تەكسەرۋشىلەرىنىڭ كۇرتەشەسىندەگى «دوسموتر» ءسوزىنىڭ قازاق تىلىندە جازىلۋىن تالاپ ەتىپ، ورىنداتا الماعانىن ايتادى.
بەلسەندى: «ءبىز رف-نىڭ سۋبەكتىسى ەمەسپىز»، - دەپ مەملەكەت باسشىسىنا ۇندەۋ جولدادى: «جىلاپ تۇرىپ سىزگە ايتىپ تۇرمىن، تالاپ ەتىپ تۇرمىن! وسىنى مەن قاسىم-جومارت كەمەلۇلىنا دا جونەلتۋلەرىڭىزدى سۇرايمىن! سقاقوۆتان باسقا (ابىلقايىر سقاقوۆ – رەد). قاسىم-جومارت كەمەلۇلى ەگەر ءسىز سقاقوۆقا وسىنداي بۇيرىق بەرمەسەڭىز، وسىلاي قازاق ءتىلىن اياعىنا تاپتاتۋعا، كەرەكۋ قالاسىندا. رەسەيدىڭ گۋبەرنياسى بولدىرعىڭىز كەلمەسە، وندا بۇيرىق بەرىڭىزشى. كەرەكۋ قالاسىنا كەلگەن ادامدار قالا قاقپاسى – ۆوكزالدا قارسى الىنسىن، قازاقتىڭ سوزىمەن، «دوسموتر» ەمەس. ءبىز رەسەي فەدەراتسياسىندا جۇرگەندەيمىز. «دوسموتر» دەگەن تەك قانا رەسەي فەدەراتسياسىنىڭ ءسوزى. بىراق بىزدە «دوسموتر» مۇنداي بولۋى كەرەك – «تەكسەرۋ» دەگەن ءسوز. بىراق ءسوز بولۋى كەرەك، وسى مەملەكەتتىڭ تىلىندە. ءبىز وتىزجىلدىققا، كەلەسى جولى تاۋەلسىزدىككە – 30, 35 جىل، جەلتوقسانشى رەتىندە ايتىپ تۇرمىن، جەلتوقسان وقيعاسىنا 35 جىلدىقتى ءبىز «دوسموترمەن» قارسى الىپ جاتىرمىز. وسىنداي داتالاردى. كەرەكۋ قالاسى اكىمى سقاقوۆتىڭ تىرىسۋىمەن. سونىڭ ءتىلدى جولاتپاۋىمەن. باسقا ايتار ءسوزىم جوق (وزگەرتىلمەي بەرىلدى - رەد.)».
قازاق ءتىلى ءۇشىن ايانباي كۇرەسىپ جۇرگەن ول الەۋمەتتىك جەلىدەگى پاراقشاسىندا: «باكاۋوۆتىڭ (بولات باقاۋوۆ – رەد.) ءىسىن جالعاستىرىپ، قالتاسىن قامپايتۋعا جۇمىس جاساپ جاتقان شىعار مۇمكىن؟ مەمتىل، ۇلتتىق-مەملەكەتتىك مۇددە قايدا، اكىم سكاكوۆ قايدا؟ كەرەكۋ ۆوكزالىنا كەلگەن ءار ادام رپ كەلگەندەي بولاتىنى 100 پايىز!!! ءار شەتەلدىك، قز-تى ءالى وتارلىقتان شىعا الماعان قۇل كورەتىنى دە ءسوزسىز، سونىڭ ىشىندە بۇرىنعى قوجايىن دا.... ءوز تىرلىكتەرى كوزىنە شەل بولىپ قاتقان شىعار، ساتقىندىعىن-قۇلدىعىن كورمەي-سەزبەگەندەي (وزگەرىسسىز بەرىلدى - رەد)?» - دەپ قازىرگى اكىمنىڭ تەك تىلگە عانا كوڭىل بولمەگەنىمەن قويماي، الەۋمەتتىك تەڭسىزدىكتىڭ ورناۋىنا دا كوز جۇما قاراعاندىعىن ايتادى.
«ەگەر اكىمشىلىككە جاتاتىن عيماراتتاردا قىزمەت وسىنداي، «دوسموتر» بولسا جەكە مەنشىك كلينيكالاردا نەگە تەك رپ تىلىندە قىزمەت كورسەتپەسكە؟ (وزگەرىسسىز بەرىلدى – رەد.)»، - ماسەلەنى كوتەرەدى.
رۋزا بەيسەنبايتەگىنىڭ Facebook پاراقشاسىنداعى وسى ماسەلەگە قاتىستى جازبالارىنان كەيىن ءتيىستى ورىندار كۇرتەشە «تەكسەرۋ» دەگەن ءسوزدى جازعان. بىراق رۋزا حانىم ول ءسوزدىڭ كوزگە كورىنبەيتىندىگىن ايتادى: «مەن ۆوكزالعا شىعامىن دەگەن سوڭ «تەكسەرۋ» دەگەن ءسوزدى ترافارەتپەن جازىپ قويىپتى. ول تۇك كورىنبەيدى».
بەلسەندى ۆوكزالداعى بۇل جاعدايدى تۇزەتۋ ءۇشىن 18 قاراشادان بەرى تىرىسىپ كەلەدى. ازىرگە ناتيجەسى جوق. ءتىل جاناشىرى ماقساتىنا جەتپەي قويمايتىنىن، كەرەكۋ ۆوكزالىن قالاي دا قازاقشالاتىنىن جەتكىزدى.
«ادىرنا» ۇلتتىق پورتالى
